Read Kalanga Mishingo 15 Bible Online

Mishingo 15 - Kalanga bible

Mishingo 15

¹Bamwe balume bakazha bedwa ku Judiya, ngono bakatangisa kudiya zwikamu beti, “Amungatjidziwe ha musakathumbigwa kuyendidzana ne mpanga wa Mushe.”

²Paulo na Bhanabhasi bakanyanyayidzana nabo kwazo ngekwa ikoku, ndizo kukathamwa kuti Paulo na Bhanabhasi ne bamwe bayende ku Jerusalema banobona batumwa ne bakulu ngekwa ikoku.

³Bakalongwa mu zila nge gubungano; ngono bakati bepinda ne mu Fenikiya ne Samariya, bakabika ngekwe kushandugwa kwe Bezwitjaba, ngono bakashathisa zwikamu zose kwazo.

⁴Bakati beswika mu Jerusalema bakaamutjigwa nge gubungano ne batumwa ne bakulu, ngono bakababudza kose Ndzimu kwawakashinga ndibo.

⁵Koga bamwe be bagalimoyo bakabe bali be bhiko le Bafarasi bakamilika bakati, “Bezwitjaba bakafanila thumbigwa kakale babudziwe kulondolodza nlayo wa Mushe.”

⁶Batumwa ba Jesu ne bakulu bakashangana kukanuka ndebo iyeyi.

⁷Shule kwe kunyanyayidzana nge tjibaka tjilefu Pita kamilika, ngono kati “Zwikamu zwangu, moziba kuti Ndzimu wakandishalula mu kutangisa pakati kwenyu kusumikila ndebo mbuya kuna Bezwitjaba kuti bahwe, bagalemoyo.

⁸Koga Ndzimu iwo unoziba moyo we nthu wakabatendekela nge kupa Meya yakayengemala koga sekwa wakathama ku tili.

⁹Auzothubukanya pakati kwedu na ibo, wakasuka mimoyo yabo nge kugalamoyo.

¹⁰Ngono ngwenu ini mulika Ndzimu nge kubiga jokwi mu mitshibha ye badiyiwa, ilo lisakatubugwa kusengwa ndi bobatategulu bedu kene ndiswi?

¹¹Koga iswi takagalamoyo kuti towotjidziwa nge ngoni dza She Jesu, koga sa ibo.”

¹²Gubungano lose lakanyalala lihwa Bhanabhasi na Paulo beleba zwilakidzo ne matjenamiso Ndzimu zwawakashinga ndibo pakati kwe Bezwitjaba.

¹³Bakati bepedza kulebeleka, Jakubo kalebeleka eti, “Mundibhulutane, zwikamu!

¹⁴Simoni watjenesa Ndzimu sekwa wakazha muna Bezwitjaba gwe kutanga kutola bathu pakati kwabo kuti babe bawo.

¹⁵Matama e balebesambeli anodumana nge buzhalo na ikoku, sekwa kwakakwagwa kuyi,

¹⁶“ ‘Shule kwa ikoku ndowobuya, ngono ndowomusa bugalo gwa Dafite igo gwakakolomoka. Ndowomusa matongo ago, ngono agumusa kakale,

¹⁷kuti ndizo bathu bose bashake She na bose Bezwitjaba banodang'wa nge zina langu.

¹⁸Kojalo She ibo bakathama ikoku kuti kuzibgwe kudwa ntolo.’ ”

¹⁹Jakubo kadwilila eti, “Bona kwangu hwuti tisidziyidzeni Bezwitjaba banoshandukila ku Ndzimu.

²⁰Koga ngatibakwalileni, kuti basije zojiwa zwisizwibuyanana, ngobe zwakapigwa midzimu, bazwidzibe mu bupombgwe ne mu kuja phuka yabulawa ngosiniwa nenge kuja malopa.

²¹Kudwila ntolo nlayo wa Mushe wakabe ubagwa mu ng'umba dze mitembezelo dzose, Sabata limwe ne limwe ne mahwi awe anosumikigwa mu mizi yose.”

²²Ndizo batumwa ne bakulu ne gubungano lose bakawana kwakalulwama kushalula balume kudwa mubali kuti babatume ku Antiyoki bana Paulo na Bhanabhasi. Bakashalula balume babili bakabe bali bakulu mu zwikamu, Judasi wakabe edang'wa Bhasabhasi na Silasi,

²³ngono bakatumila lukwalo ogu nabo, “Iswi, batumwa ne bakulu be gubungano, tili zwikamu zwenyu, tomudumilisa imwi zwikamu zwedu zwe Bezwitjaba zwinogala mu Antiyoki, Siriya ne Silisiya.

²⁴Takahwa kuti bamwe balume bakadwa mutili bakamudziyidza nge matama, betjinya mikumbulo yenyu, nenguba iswi tisakabatuma.

²⁵Ndizo takawana kwakalulwama shule kwe tadumana kushalula bathu tibatuma kumuli bana badiwa bedu Bhanabhasi na Paulo,

²⁶ibo bakalonga matjilo abo mu mbhatsha ngekwe nshingo wa She wedu Jesu Kirisiti.

²⁷Ndizo tatumila Judasi na Silasi, ibo banowomubudza nge nlomo izwezwi zwithu zwatakwala.

²⁸Meya yakayengemala naswi takabona kwakafanila kuti tisibige ntolo pezhugwi kwenyu kuzhe kwe zwithu izwezwi zwakafanila:

²⁹musije zojiwa zwakapiwa midzimu, musije malopa, musije phuka yakabulawa ngosiniwa, muzwidzibe mu bupombgwe. Mowotjila zubuyanana amuzwidziba muna izwezwi. Salani zubuyanana.”

³⁰Bakati batjidusiwa bakadelukila ku Antiyoki ngono bakati bakubunganya gubungano bakayisa lukwalo.

³¹Bathu bakati begubala bakashathisiwa nge gulumbidzo lago.

³²Judasi na Silasi ibo bakabe nge kwabo bali balebesambeli bakakulumbidza zwikamu nge matama manjinji bakabasimisa.

³³Bakati bapitsha tjibaka, bakabgwilila shule kuna bakabe babatuma, bakadusiwa nge kunyalala. [

³⁴Koga Silasi kabona kwakafanila kusala ikoko.][7]

³⁵Paulo na Bhanabhasi bakasala mu Antiyoki bediya kakale besumikila dama la She bana bamwebo banjinji.

³⁶Shule kwe mazhuba Paulo kati kuna Bhanabhasi, “Ngatibgwilile shule kukumba zwikamu zwedu mu nzi mmwe ne mmwe kwatakasumikila dama la She, tibone kuti batjani.”

³⁷Bhanabhasi wakabe eshaka kuti batole Johani wakabe edang'wa Mako bayende naye.

³⁸Koga Paulo wakabe ekumbula ha kusakalulwama kuntola, ngobe aazodwilila nabo mu nshingo wabo, koga wakashanduka kabasiya mu Pamufiliya.

³⁹Kwakabe ne kunyanyayidzana kwakasima, ngono bakathubukana. Bhanabhasi katola Mako, ngono kayenda nge gungwa ku Sipuro,

⁴⁰Paulo iye kashalula Silasi, ngono kayenda, ebigwa mu ngoni dza She nge zwikamu.

⁴¹Wakapalama Siriya ne Silisiya, esimisa makubungano.