Read Kalanga Mishingo 16 Bible Online

Mishingo 16 - Kalanga bible

Mishingo 16

¹Paulo kayenda ku Debhe ne ku Lisitira, kwakabe kugala n'diyiwa wakabe eyi Timoti. Mme yabe bakabe na ibo bali n'galimoyo, bakabe bali Njuta, koga tate babe bakabe bali N'giriki.

²Zwikamu zose mu Lisitira ne Ikoniyo zwakabe zwileba zwakanaka ngekwa Timoti.

³Paulo kada kuyenda na Timoti, ndizo kantola kanthumbila. Wakathama sa ikoko, kushathisa Bajuta bakabe begala mu magalo iyawo, ngobe bakabe beziba kuti tate ba Timoti bakabe bali N'giriki.

⁴Bakati beyenda nge mizi, bakapa bagalimoyo milayo yakabe yabigwa nge batumwa ne bakulu mu Jerusalema, bakababudza kulondolodza milayo iyeyo.

⁵Ndizo makubungano kasimisiwa mu kugalamoyo ngono kawanda zhuba ne zhuba.

⁶Bakapinda ne mu ntuthu we Firigiya ne Galatiya, ngobe Meya yakayengemala yakabe yabadzibisa kusumikila dama mu Ezhiya.

⁷Bakati beswika pa n'gathu we Misiya, bakagwisa kungina mu ntuthu we Bhitiniya, koga Meya ya Jesu ikasibadumile.

⁸Ndizo bakapinda ne mu Misiya bedelukila ku Tiroasi.

⁹Mu busiku igogo Paulo kabona mbono, muili wakabona nthu we Makedoniya ali mile enkumbila eti, “Izha ngeno ku Makedoniya utibhatshe!”

¹⁰Kwakati Paulo asino bona mbono iyeyo tikalulwamisila kuyenda ku Makedoniya, ngobe tigalamoyo kuti Ndzimu wakatidana kusumikila ndebo mbuya ku bathu ikoko.

¹¹Takayenda nge ikepe kudwa mu Tiroasi tikatambunuka nge gungwa titjulukila ku Samotiraki, tjimuka tikayenda ku Neapoli.

¹²Kudwa ipapo takayenda ku Filipi, nzi nkulu mu ntuthu we Makedoniya kwakabe kubusa Baroma. Takapitsha mazhuba ikoko.

¹³Nge Sabata tikabhuda mu nzi tikayenda pejo nge gwizi kwatakakumbula kuti kungabe kuna pathu panotembezelegwa. Tikagala pasi tikalebeleka ne bakadzi bakabe bakubungana ikoko.

¹⁴Mmwe wa ibabo wakatihwilila wakabe ali Lidiya edwa ku Tiyatira, wakabe etengesa matyila mashaba e themba ipezhugwi. Wakabe ali nkadzi wakabe enamata Ndzimu, ngono She wakazhula nkumbulo uwe kuhwilila nge njele tjakabe tjilebgwa ndi Paulo.

¹⁵Shule kwe adubikwa ne be nsha uwe, katikoka kati, “Izhani mugale mu nzi wangu ha mabona kuti ndi n'galimoyo muna She.” Ngono katitshindilidza kuyenda.

¹⁶Limwe zhuba titjayenda ku bugalo gwe ntembezelo, takashanganidziwa nge tjanana tje nlandakadzi tjakabe tjina meya mbi wakabe utjithama kuti tjilebe zwimbeli. Tjakabe tjiwanila botetshi batjo mari manjinji ngoleba zwinozha.

¹⁷Katobelela Paulo naswi, emimila eti, “Balume ibaba balanda be Ndzimu upezhugwi zhugwi! Banomubudza zila ye jidzo!”

¹⁸Wakathama ikoku mazhuba manjinji, kudzina Paulo esilingika, katendebuka, ngono kati ku meya, “Nge zina la Jesu Kirisiti, ndokulaya kubhuda munli!” Meya ukabhuda munli nge tjibaka itjetjo.

¹⁹Botetshi babe bakati bebona kuti kuthama mari ndiye akutjipo, bakabhata Paulo na Silasi bakabakwebela ku basumikilisi ku lubazhe.

²⁰Bakabayisa mbeli kwe basumikilisi bakulu be Roma, ngono bakati, “Balume ibaba Bajuta, ngono banodzonga nzi wedu nkulu.

²¹Banodiya mipanga inonyanyayidzana ne milayo yedu; iswi Baroma, atingaamutjile mipanga iyeyi nenguba kuli kuishingisa.”

²²Ngono mbunga ukama nabo mu kuthasela Paulo na Silasi. Basumikilisi bakulu be Roma bakapalula hazu dza Paulo na Silasi bakalaya kuti balobgwe.

²³Shule kwe kulobgwa kwakabipa, bakalongwa mu ng'umba ye busungwa, ngono nlindi we ng'umba ye busungwa kalayiwa kuti ailise nge njele.

²⁴Nlindi we ng'umba ye busungwa kati aamutjila ndayo iyeyi, kabalonga mu ng'umba i tje mukati kasungilila makumbo abo pakati kwe mapango anolema.

²⁵Koga pakati kwe busiku Paulo na Silasi bakabe betembezela bembila Ndzimu njimbo, ngono basungwa bamwe bakabahwilila.

²⁶Tjinyolotjo kukabe ne kutengenyeka kwe shango kukulu, kwakazunguza ng'umba ye busungwa nenge thiwa dzayo. Kang'ompela mikoba yose ikazhuka, ketani dzikasununguka mu basungwa bose.

²⁷Nlindi we ng'umba ye busungwa kamuka, ngono kati ebona mikoba ye ng'umba ye busungwa yakazhuka, kakumbula kuti basungwa batizha, ndizo kashomola bukanu gugwe, eti unozwibulaya.

²⁸Koga Paulo kamilidza hwi kati, “Usizwikubadze! Tiyapo tose!”

²⁹Nlindi kadana kuti kuzhisiwe mavone, kalabukila mukati, kawila pa makumbo a Paulo na Silasi etetema etja.

³⁰Ipapo kabadusila kuzhe, ngono kakumbila eti, “Botate, ndakafanila thamani kuti nditjidziwe?”

³¹Bakadabila beti, “Galamoyo muna She Jesu, ndizo unowotjidziwa, iwe ne nsha uwo.”

³²Ipapo bakasumikila dama la She kunli ne ku bamwe bose mu ng'umba iye.

³³Nge tjibaka itjetjo tje busiku nlisi we ng'umba ye busungwa kabatola kangudza mabanga abo; ngono iye ne be nsha uwe bose bakadubikwa tjinyolotjo.

³⁴Ipapo katola Paulo na Silasi kabayisa ku ng'umba iye ngono kabapa zojiwa kuti baje. Iye ne be nsha uwe bakazhala kushatha, ngobe agalamoyo mu Ndzimu.

³⁵Koga tjimuka mangwanana basumikilisi bakulu be Roma bakatuma maphorisa abo nge ndayo inoti, “Letjani balume ibabo bayende.”

³⁶Ndizo Nlindi we ng'umba ye busungwa kabudza Paulo kati, “Basumikilisi bakulu be Roma bazhisa ndayo nge kuko na Silasi kuti musunungugwe. Mungayenda zwenyu ndizo bhudani muyende, nge kunyalala.”

³⁷Koga Paulo kati ku bali, “Bakatiloba mmwe ne mmwe akalinga koga tisawang'wa nlandu nenguba tili Baroma kakale bakatilashila mu ng'umba ye busungwa. Apa ngwenu banotidusa nge kwakasumbikala kene? Aa, ngabazhe tje kwabo batiduse.”

³⁸Maphorisa akaleba matama iyawa ku basumikilisi bakulu be Roma; ngono bakati behwa kuti Paulo na Silasi Baroma, bakatja.

³⁹Ndizo bakayenda bakabakumbila mazwiibhatigo; ipapo bakabadusa mu ng'umba ye busungwa bakabakumbila kuti babhude mu nzi.

⁴⁰Paulo na Silasi bakabhuda mu ng'umba ye busungwa bakakumba Lidiya. Bakashangana ne zwikamu bakabapa matama e gulumbidzo ngono kudwapo bakayenda.