Read Kalanga Mishingo 17 Bible Online

Mishingo 17 - Kalanga bible

Mishingo 17

¹Paulo na Silasi bakayenda bakapinda ne mu Amfipoli ne Apoloniya bakaswika ku Tesalonika, iko kwakabe kuna ng'umba ye mitembezelo ye Bajuta.

²Se wolobela kukwe Paulo kayenda ku ng'umba ye mitembezelo. Kagala tshipi thatu enyanyayidzana nabo ngekwe hwalo, ebala

³etjenesa Hwalo dze Ndzimu elakidza mudzili kuti Mesiya wakabe akafanila kudziyila ne kumuka mu bafi. Paulo kati, “Jesu iwoyu wandinoleba nge kukwe kumuli ndiye Mesiya.”

⁴Bamwe babo bakahwisisa, ndizo bakama na Paulo na Silasi; ne bafumakadzi bana mamo banjinji ne Bagiriki banjinji bakabe benamata Ndzimu.

⁵Koga Bajuta bakabe ne ndandala, ngono bakakubunganya bamwe bathu basibe tjimwe mu dzizila bakabumba mbunga. Bakadzonga nzi wose, ngono bakangina mu nzi we nlume wakabe edang'wa Jasoni, beti banowowana Paulo na Silasi kuti babazhise ku bathu.

⁶Koga bakati babasheta, bakazuzuta Jasoni ne zwimwe zwikamu bakabayisa mbeli kwe babusi be nzi bemimila beti, “Ibaba balume bakadzonga pamwe ne pamwe! Ngwenu batjizhabo ngeno,

⁷ngono Jasoni wakabagadza mu ng'umba iye. Bose banotjuluka milayo ya Kaisara, beti kuna mmwe mambo, unoyi Jesu.”

⁸Bathu ne balauli be nzi bakadzongeka ha behwa ikoku.

⁹Balauli bakalipisa Jasoni na ibabo bamwe, themba ye mari inoshakika kuti basunungugwe, ndizo bakabaletja bakayenda.

¹⁰Kukati kube busiku, zwikamu zwikanyelusila Paulo na Silasi ku Bhereya. Bakati beswika bakayenda ku ng'umba ye mitembezelo ye Tjijuta.

¹¹Bathu baikoko bakabe bakashaladuka kupinda Batesalonika. Bakaamutjila dama nge mazwihwo abo wose, ngono mazhuba wose bakabe belingisisa mu Hwalo dze Ndzimu kubona kene tjadiyiwa ndi Paulo tjili malebeswa.

¹²Bunji mubali bakagalamoyo; ne bakadzi be Tjigiriki banjinji bana mamo ne balume banjinji be Tjigiriki na ibo bakagalamoyo.

¹³Koga Bajuta mu Tesalonika bakati behwa kuti Paulo wakasumikilabo dama le Ndzimu mu Bhereya, bakazha ikoko bakatangisa kudzonga bathu.

¹⁴Tjinyolotjo zwikamu zwikadusa Paulo kayenda ku gungwa; koga Silasi na Timoti bakasala mu Bhereya.

¹⁵Balume bakabe bepelekedza Paulo bakayenda naye kunoti mu Atene ipapo bakashandukila ku Bhereya ne ndayilo inodwa muna Paulo kuti Silasi na Timoti bantobele tjinyolotjo.

¹⁶Paulo kati atjakamilila Silasi na Timoti mu Atene meya iye ikakodzongeka mukati kukwe ha ebona nzi sekwa uli zhele midzimu.

¹⁷Ndizo kalebesana ne Bajuta ne Bezwitjaba banonamata Ndzimu mu ng'umba ye mitembezelo ne mu lubazhe mazhuba wose elebeleka ne bathu banopinda zwabo.

¹⁸Badiyi bamwe be zwidiyo zwe Tjiepikuri[8] ne be zwidiyo zwe Tjisitoiki[9] bakanyanyayidzana naye. Bamwe babo bakabhuzwa beti, “Nlebanyi iwoyu katini?” Bamwe bakadabila beti, “Unonga unoleba ngekwe midzimu ipoga.” Bakaleba ikoku, ngobe Paulo wakabe esumikila ngekwa Jesu nenge kumuka mu bafi.

¹⁹Ndizo bakatola Paulo bakanzhisa pa lubazhe gwe nzi iwoyo gunoyi Areopago, ngono bakati, “Toshaka kuziba kudiya ikoku kutshwa kwaunoleba nge kwako.

²⁰Zwithu zwatinohwa uzwileba zwitshwa mutili, ngono toshaka kuziba kuti zodwani.”

²¹Bathu bose be Atene ne bataya bakabe begala ikoko bakapitsha tjibaka tjabo beleba kene behwilila tjimwe tjitshwa.

²²Paulo kama pakati kwe lubazhe gwe Areopago kati, “Ndobona kuti mu zila dzose imwi Baatene mu banamati.

²³Ngobe ndati ndipalama nzi wenyu ndilinga magalo amunonamata, ndawana tjibeso tjakakwagwa kuyi, ‘Ku Ndzimu usingazibgwe.’ Itjetjo tjamunonamata, nenguba musingatjizibe, nditjo tjandinoleba kumuli nge kwatjo ngwenu.

²⁴Ndzimu iwo wakathama shango ne tjimwe ne tjimwe tjimuili, ndi She we kudzimu ne shango, ngono autogala mu ng'umba dze mitembezelo dzakathamwa nge nthu,

²⁵kene kuli kushaka tjimwe tjatingaunamata nge kuushingila, se uli iwo unopa butjilo ne meya inofemiwa ne tjimwe ne tjimwe ku mmwe ne mmwe.

²⁶Wakathama zwitjaba zose kudwa mu nthu nng'ompela kuti bagale mu shango yose. Iwo nge kwawo wakabiga kale misi ne migathu ye magalo kwabanowogala.

²⁷Wakathama ikoku kuti ndizo baushake, kuti pamwe bangaambamba bakauwana. Nenguba Ndzimu usi kule kule ne mmwe ne mmwe wedu ngoti;

²⁸‘Muuli totjila tikayenda tikabepo.’ “Koga sekwa kalebgwa nge batetembeli bamwe benyu beti, ‘Nge malebeswa ti bana bawo.’

²⁹“Se tili bana be Ndzimu, tisikumbule kuti mbumbiko yawo inonga ye tjifano tjakathamwa nge golide kene siliva kene bgwe, tjithamwa nge bunyambi ne njalakang'wa dze nthu.

³⁰Misi ye kusaziba Ndzimu wakailinga ukaitjuludza mesho, koga ngwenu unolaya bose kumwe ne kumwe kuti bashandukile matjinyo abo.

³¹Ngobe wakabiga zhuba launowosumikilisa shango yose nge ndulamo nge nlume wawakashalula. Wakalakidza malebeswa a ikoku ku mmwe ne mmwe nge kumusa nlume iwoyo mu bafi!”

³²Bakati behwa Paulo eleba ngekwe kumusiwa kwe bafi, bamwe babo bakanseka mahanya, koga bamwe bakati, “Toshaka kukuhwa ulebeleka ngekwa ikoku kakale.”

³³Ndizo Paulo kadwa mubali.

³⁴Koga bamwe balume bakabhatana naye, ngono bakagalamoyo, pakati kwabo kwakabe kuna Diyonisiyo we N'areopago;[10] ne mmwe nkadzi edang'wa Damarisi ne bamwe.