Read Kalanga Mishingo 18 Bible Online

Mishingo 18 - Kalanga bible

Mishingo 18

¹Shule kwa ikoku, Paulo kabhuda mu Atene, ngono kayenda ku Korinta.

²Ikoko kashangana ne Njuta unodang'wa kuyi Akhwila wakabe ezwagwa ku Ponto. Wakabe atjamboswika edwa ku Italiya ne nkadzi uwe Purisila, ngobe Kilaudiyo wakabe adwa Bajuta bose kuti babhude mu Roma. Paulo wakayenda kunobabona,

³ngobe wakabe ali nthumi we dzitente sa ibo, wakagala kashinga nabo.

⁴Sabata limwe ne limwe wakalebeleka mu ng'umba ye mitembezelo, egwisa kugadzamoyo Bajuta ne Bagiriki.

⁵Kukati Silasi na Timoti bezha bedwa ku Makedoniya, Paulo wakabe akasimisila esumikila, epa butendeki ku Bajuta kuti Mesiya ndi Jesu.

⁶Koga Bajuta bakati benyanyayidza Paulo ben'gongobola, kashashamula zwiambalo zwizwe kulakidza kusadumana nabo, ngono kati ku bali, “Butjilo gwenyu ngagube mu maboko enyu! Imi andina nlandu. Kudwa ngwenu ndowoyenda kuna Bezwitjaba.”

⁷Paulo kadwa ipapo kayenda ku nzi we nlume unodang'wa Tito Jusito nnamati we Ndzimu. Nzi uwe wakabe uli pejo ne ng'umba ye mitembezelo.

⁸Kirisipo, ntungamili we ng'umba ye mitembezelo wakagalamoyo muna She kose ne nsha uwe ngono Bakorinta banjinji bakati behwa Paulo bakagalamoyo.

⁹Gumwe busiku She kalebeleka na Paulo mu mbono eti, “Usitje koga lebeleka, usinyalale.

¹⁰Ngobe ndinawe, ngono akuna unowokumukila kakukubadza, ngobe ndina bathu banjinji mu nzi iwoyu nkulu.”

¹¹Ndizo Paulo kagala ikoko gole lina gaswa ebadiya dama le Ndzimu.

¹²Galiyo kati ali nlauli we Akaiya, Bajuta bakashangana bakamukila Paulo, ngono bakanzhisa ku lubazhe.

¹³Bakati, “Nlume iwoyu unotshindilidza bathu kunamata Ndzimu nge zila dzisingayendidzane nge nlayo.”

¹⁴Koga kukati Paulo ali pejo ngolebeleka, Galiyo kati ku Bajuta, “Ikoku ha kwabe kuli ngekwe tjakabipa kene nlandu nkulu, kwabe kungahwika kuti ndimuhwilile Bajuta.”

¹⁵Ngono se kuli ngekwe matama ne mazina nenge nlayo wenyu, pedzani ndebo imwi. Ndolamba kube nsumikilisi we zwithu zwakajali.

¹⁶Ndizo kabatata mu lubazhe.

¹⁷Ipapo bose bakashandukila Sositenesi ntungamili we ng'umba ye mitembezelo bakanloba mbeli kwe lubazhe. Koga Galiyo kasibe ne hanya.

¹⁸Shule kwa ikoko Paulo kagala ikoko mazhuba manjinji. Ipapo kasiya zwikamu kayenda ku Siriya nge gungwa ana Purisila na Akhwila. Wakatesela mavudzi ku Kenikiriya, ngobe wakabe atuna.

¹⁹Bakaswika ku Efeso Paulo kwaakasiya Purisila na Akhwila. Iye nge kukwe kangina mu ng'umba ye mitembezelo, ngono kalebeleka ne Bajuta.

²⁰Bakati benkumbila kuti agale nabo tjibakana kalamba.

²¹Koga wakati eyenda, kagadzabgwe kati, “Ndowobuya akuli kuda kwe Ndzimu.” Ipapo kayenda nge gungwa kudwa ku Efeso.

²²Kati edeluka ku Sizariya, kanodumilisa gubungano kudwapo kadelukila ku Antiyoki.

²³Kukati Paulo agala tjibaka tjilefu mu Antiyoki, kamilika kudwa ipapo, ngono kayenda edwa mu bugalo gumwe engina mu gumwe mu ntuthu wose we Galatiya ne Firigiya esimisa badiyiwa bose.

²⁴Ipapo, Njuta unodang'wa Apolosi n'gali we Alekizanda, kazha ku Efeso. Wakabe ali nlume wakadiyika ana zibo hwulu ye hwalo.

²⁵Wakabe adiyiwa mu zila ya She, ngono kalebeleka akalonga meya ediya zubuyanana ngekwa Jesu nenguba akabe eziba kudubika kwa Johani koga.

²⁶Wakatangisa kulebeleka mu ng'umba ye mitembezelo akasimamoyo. Kukati Purisila na Akhwila benhwa, bakantola ngono bakantjenesela zila ye Ndzimu zubuyanana.

²⁷Apolosi kati eshako yenda ku Akaiya, zwikamu zwikankulumbidza zwikakwalila badiyiwa ikoko kun'amutjila. Kati eswika, kabe ne bhatsho hwulu kuna ibabo bakabe bakagalamoyo nge ngoni dze Ndzimu.

²⁸Wakanyanyayidza Bajuta kwakabangalala elebeleka mbeli kwe bathu, elakidza mu hwalo dze Ndzimu kuti Mesiya ndi Jesu.