Read Kalanga Mishingo 19 Bible Online

Mishingo 19 - Kalanga bible

Mishingo 19

¹Apolosi kati atjimu Korinta, Paulo kayenda ali tje mukati kwe ntuthu, ngono kaswika mu Efeso. Ikoku kawana bamwe badiyiwa,

²ngono kababhuzwa kati, “Apa makaamutjila Meya yakayengemala pamakabe bagalimoyo kene?” Bakadabila beti, “Aa, atithu tikahwa na iko kuti kuna Meya yakayengemala.”

³Paulo kabhuzwa kati, “Ngono makaamutjila kudubikwa kwakatini?” Bakadabila beti, “Kudubikwa kwa Johani.”

⁴Paulo kati, “Kudubika kwa Johani kwakabe kuli kwe kushandukila matjinyo; ngono wakabudza bathu kugalamoyo muna iye wakabe ewozha shule kukwe, iye Jesu.”

⁵Bakati behwa ikoku, bakadubikwa nge zina la She Jesu.

⁶Paulo kabiga maboko awe pezhugwi kwabo, ngono Meya yakayengemala ikadelukila mubali; bakalebeleka nge ndimi kakale bakalebabo dama le Ndzimu.

⁷Bose bakabe bangabe balume bali gumi lina babili.

⁸Paulo kangina mu ng'umba ye mitembezelo, ngono mu mimwedzi ili mitatu kalebeleka ngosimamoyo ne bathu, elebeleka nabo egwisa kubagadzamoyo mu bushe gwe Ndzimu.

⁹Koga kwakabe kuti bamwe bakakukutala, bakasigalemoyo, bakaleba zwakabipa ngekwe Zila ya She mbeli kwe gubungano. Ndizo Paulo kabasiya, katola ibabo bakabe begalamoyo, ngono mazhuba wose elebeleka mu ng'umba ye zwidiyo ya Tirano kudwa mu lubaka gwe gumi lina ling'ompela.

¹⁰Ikoku kukadwilila makole mabili, ndizo bathu bose bakabe begala mu ntuthu we Ezhiya, Bajuta ne Bezwitjaba bakahwa dama la She.

¹¹Ndzimu wakabe ushinga ndi Paulo makaabadzo asakawolobegwa.

¹²Tukwana ne khiba dzaakashingisa dzakabe dziyisiwa ku bagwele, ngono magwele abo ebhuda mubali ne meya yakabipa ibhuda mubali.

¹³Bamwe Bajuta bakabe beyenda bedusa meya yakabipa bakagwisa kushingisa zina la She Jesu kuthama ikoku. Bakati ku meya yakabipa, “Ndokulaya nge zina la Jesu, iye Paulo waanosumikila.”

¹⁴Bakololo bali kutendeka ba Sikeva Ntungamili we bapirisiti we Tjijuta bakabe bethama ikoku.

¹⁵Koga meya mbi ikati ku bali, “Jesu ndonziba, na Paulo ndonziba koga imwi, muboani?”

¹⁶Nlume iwoyo wakabe ana meya mbi kabatjulukila kagwanabo kabakulila nge masimba. Bakatizha bakabhuda mu ng'umba iye basakasungila kakale bana mbonje.

¹⁷Ikoku kukazibgwa nge bagali bose be Efeso ne Bajuta kose ne Bezwitjaba bakazhala kutja, ngono zina la She Jesu likakudziwa.

¹⁸Bunji gwa ibabo bakabe batjibe bagalimoyo bakazha, bezwileba matjinyo abo kakale bedusila patjena mishingo yabo mibi yabakabe bethama.

¹⁹Bunji gwa ibabo bakabe beshingisa malipa bakakubunganya hwalo dzabo, ngono bakadzipisa mbeli kwe bathu. Bakashanganya themba ye hwalo idzedzo, ngono yose yakabe zwiwulu zwili makumi mashanu (50 000) e maloso e siliva.

²⁰Dama la She likakula likawanda nge masimba.

²¹Shule kwe zwithu izwezwi zwashingikala, Paulo kakumbula kuyenda epalama Makedoniya ne Akaiya eyenda ku Jerusalema, eti, “Kudwa ikoko ndakafanila kuyenda ku Roma.”

²²Ndizo katuma Timoti na Erasito, babili be babhatshi babe mu Makedoniya iye esala kwe tjibakana mu Ezhiya.

²³Kwakabe kuna kudzongeka kukulu mu Efeso mu tjibaka itjetjo ngekwe Zila ya She.

²⁴Mmwe nthuli we siliva wakabe eyi Demetiriyo wakabe ethama zwifano zwe siliva zwe ng'umba ye ndzimukadzi Aritemisi, ngono nshingo uwe wakabe ubuzila bashingi kwazo.

²⁵Ndizo kabadana bose ne bamwe bakabe bana nshingo unoyendidzana ne wabo, kati ku bali, “Balume, moziba kuti fumwa yedu inodwa mu nshingo iwoyu.

²⁶Ngwenu, mobona mukazwihwigwa tjinoshingwa nge nthu iwoyu Paulo. Kati midzimu yakabezhiwa nge bathu ate ili midzimu dumbu, ndizo wakatubula kugadzamoyo bathu banjinji kabatungamilila ntome kose muno mu Efeso ne mu ntuthu wose we Ezhiya.

²⁷Ndizo kuna mbhatsha dze kuti nshingo wedu iwoyu ube ne zina lakabipa. Ate ikoku koga, kuna mbatshabo dze kuti ng'umba ye ndzimukadzi nkulu Aritemisi inowolengudzika nge kuti unowodelusiwa mu bukulu gwawo, ndzimukadzi unonamatiwa nge mmwe ne mmwe mu Ezhiya ne mu shango yose!”

²⁸Bakati behwa matama iyawa, bakazhala bushongola bakatangisa kumimila beti, “Nkulu Aritemisi we Baefeso!”

²⁹Zhoba ikayenda nge nzi wose. Mbunga wose ukalabuka ukangina mu ng'umba ye mizano ukazuzuta Gayo na Arisitako be Makedoniya ibo bakabe beyenda na Paulo mu njendo dzidze.

³⁰Paulo nge kukwe wakabe eshaka kungina pakati kwe mbunga, koga badiyiwa bakasin'dumile.

³¹Bamwe be babusi be Ezhiya, bakabe bali bazwalani babe, bakayisa thumo kunli benkumbila kuti asitongo zwilakidza mu ng'umba ye mizano.

³²Mu tjibaka itjetjo gubungano lose lakabe lili mu phipiti, bamwe bathu bakabe bemimila beleba tjabanoleba, bamwe bemimila beleba tjipoga, ngono bunji gwabo gwakabe gusingazibe kuti bakubunganilani.

³³Bamwe be bathu ipapo bakatola kuti Alekizanda wakabe ali iye u nlandu, se Bajuta bakanthama kuti ayende mbeli. Ipapo Alekizanda kalakidza nge luboko kuti bathu banyalale, ngono kagwisa kulebeleka ezwimila.

³⁴Koga bakati beziba kuti Njuta, bakamimila bose beleba tjithu tjing'ompela mu awara mbili beti, “Aritemisi we Efeso ndiye nkulu!”

³⁵Ku bupelo nkwalili we nzi katubula kudzikamisa mbunga. Kati, “Bakanyi kwedu Baefeso! Mmwe ne mmwe unoziba kuti nzi we Efeso nlondolodzi we ng'umba ya Aritemisi nkulu nenge bgwe lakayengemala lakawa lidwa kudzimu.

³⁶Aapo ungalandula zwithu izwezwi. Ndizo makafanila dzikama, musithame tjimwe nge phupu.

³⁷Mazhisa balume ibaba ngeno nenguba basatolela ng'umba dze midzimu yedu kene kuli kuleba tjakabipa ngekwe ndzimukadzi wedu.

³⁸Ha Demetiriyo ne bashingi babe bana nlandu wabanopa mmwe, mabazhe akazhuka ne balauli bayapo ndizo ngabatjetane.

³⁹Koga ha kuna tjimwe kakale tjamunoshaka, pana itjetji tjowolulwamisiwa mu gubungano le babaki bamuno kuyendidzana nge nlayo.

⁴⁰Ngobe ngekwe tjashingikala nasi, kuna mbatsha dze kuti tingatjetegwa phipiti. Akuna dama latingaleba labanga zhoba iyeyi.”

⁴¹Kati aleba ikoku kapaladza nshangano.