Read Kalanga Mishingo 2 Bible Online

Mishingo 2 - Kalanga bible

Mishingo 2

¹Kwakati zhuba le Pentekosite lazha, bose bakabe bakakubungana pathu pang'ompela.

²Tjinyolotjo, nsindo unonga kuhwuhwudza kwe phepo ina masimba ukazha udwa kudzimu, ukazhala ng'umba yose yabakabe bali muili.

³Bakabona kunofanana ne ndimi dzinonga nthuto we moto dzakapalalana, ngono dzikazha dzikagala pezhugwi kwe mmwe ne mmwe wabo.

⁴Bose bakazhala Meya yakayengemala, ngono bakatangisa kulebeleka nge ndimi dzipoga sekwa bakapiwa nge Meya.

⁵Mu Jerusalema kwakabe kugala Bajuta, balume banotja Ndzimu, banodwa mu njudzi dzose dze shango.

⁶Bakati behwa nsindo iwoyu, mbunga nkulu ukakubungana nge gaabadzo, ngobe mmwe ne mmwe wabo wakabahwa belebeleka nge lulimi gugwe.

⁷Ngono bakakaabala kwazo, bakabhuzwa beti, “Apa bathu bose ibaba banolebeleka ate Bagalili kene?

⁸Ini ngono mmwe ne mmwe wedu ehwa mmwe ne mmwe wabo elebeleka nge lulimi gugwe?

⁹Iswi todwa ku Patiya ne ku Mediya ne ku Elamu ne ku Mesopotamiya ne ku Judiya ne ku Kapadokiya ne ku Ponto ne ku Ezhiya

¹⁰ne ku Firigiya ne ku Pamufiliya ne ku Egipiti ne mituthu imu Libhiya pejo ne Sirene, ne bezi banodwa ku Roma,

¹¹Bajuta kose ne bakabe beshanduligwa mu bugalimoyo gwe Tjijuta ne ku Kirete ne ku Arabhiya tobahwa beleba makaabadzo e Ndzimu nge ndimi dzedu!”

¹²Bakakaabala basingahwisise, ngono bakabhuzwana beti, “Ikoku kodwani?”

¹³Koga bamwe bakabadadila beti, “Bakalaladza.”

¹⁴Koga Pita kamilika ne bali gumi lina nng'ompela, kamilidza hwi lile, ngono kalebeleka ne mbunga eti, “Bathu be Judiya, namwi mose bamu Jerusalema, imani ndimutjenesele ikoku; hwililani nge njele tjandinoleba.

¹⁵Bathu ibaba abazolaladza sekwa munokumbula. Kutji tjibaka tje zhanalume mangwanana.

¹⁶Koga etji nditjo tjakalebgwa nge nlebesambeli Jowele eti,

¹⁷“ ‘Ndzimu ukati: Kowoti mu mazhuba e bupelo ndowodila Meya yangu mu bathu bose. Bakololo ne bakololokadzi benyu banowolebela mbeli bazhuzha benyu banowobona mbono ne bathuntana benyu banowowolota.

¹⁸Kose ne mu balandalume bangu ne mu balandakadzi bangu ndowodila Meya yangu mu mazhuba iyawo, ngono banowolebela mbeli.

¹⁹Ngono ndowothama matjenamiso pezhugwi kudzimu ne zwilakidzo mu shango, pasi, kowobe ne malopa ne moto nenge bhulubusi.

²⁰Zhuba lowotemapala kukabe zhalima ngono mwedzi ukashandugwa ukashabapala se malopa mbeli kwe kuzha kwe zhuba gulu la She.

²¹Ngono kowoshingikala kuti iye unodana zina la She mu tjibaka itjetjo atjidziwe.’

²²“Bathu be Iziraela, hwililani woku, Jesu we Nazareta nthu wamakalakidziwa nge Ndzimu nge matjenamiso makaabadzo nenge matjenamiso ne zwilakidzo, Ndzimu zwawakathama pakati kwenyu ndiye, sekwa munoziba imwi.

²³Jesu iwoyu makampiwa nge ndongoloso yakabigwa ye Ndzimu nenge kuziba zwimbeli kwawo; koga imwi makashingisa bathu babi kumbulaya nge kumbambula.

²⁴Koga Ndzimu wakammusa; unsunungula mu zogwadza zwe lufu, ngobe kwakabe kusingatubuke kuti lufu gumbhatile tjose.

²⁵Dafite wakati nge kukwe, “ ‘Ndobona She misi yose mbeli kwangu. Se bali ku luboko gwangu gwe luji, akuna tjingandizunguza.

²⁶Ndizo moyo wangu unoshatha ne lulimi gwangu goshatha ne mbili wangubo unowotjilila mu kugalabgwe,

²⁷ngobe amutowondisiya mu ikumbu naiko amungaletjedzele N'yengemali wenyu kubola.

²⁸Makandilakidza zila ye butjilo, mowondishathisa nge kubepo kwenyu!’

²⁹“Zwikamu, ndomubudza nge malebeswa kuti batategulu Dafite bakafa bakabiganyiwa, ngono ikumbu tjabo tjiyapo na nasi.

³⁰Bakabe bali nlebesambeli ngono bakaziba kuti Ndzimu wakabagadzabgwe nge kutuna kuti unowobiga mmwe we bana babo mu tjigalo tjabo tje bushe.

³¹Bakabona zwimbeli ndizo bakaleba ngekwe kumuka kwe Mesiya kuti, ‘Aazosiyiwa mu ikumbu ne mbili uwe auzobola.’

³²Ndzimu wakamusa Jesu ihwoyu, ngono iswi tose ti batendeki bekuti ikoku kwakayitikala.

³³Kati amilidzigwa ku luboko gwe luji gwe Ndzimu, aamutjila Meya yakayengemala se kugadzabgwe kwa Tate, ndizo watebulila mutili itjetji tjamunobona ne tjamunohwa.

³⁴Ngobe Dafite aazotathila kudzimu, koga iye kati, “ ‘She bakati kuna She wangu: Gala ku luboko gwangu gwe luji

³⁵kudzina ndithama zwita zwizo tjigalo tje makumbo awo.’

³⁶“Ndizo bose be ng'umba ye Iziraela ngabazibe nge malebeswa kuti Ndzimu wakathama Jesu iwoyu wamakabambula kube She ne kube Mesiya!”

³⁷Kukati bathu behwa ikoku, bakadziyidzika, ngono bakati kuna Pita ne batumwa bamwe, “Zwikamu, tishingeni ngono?”

³⁸Pita kashandula eti, “Shandukilani matjinyo enyu mudubikiwe, mmwe ne mmwe wenyu nge zina la Jesu Kirisiti kuti ndizo matjinyo enyu muazwiibhatigwe. Ngono mowoamutjila tjipo tje Meya yakayengemala.

³⁹Kugadziwabgwe nge kwenyu ne bana benyu na bose bakule kule, mmwe ne mmwe She Ndzimu wedu waunowodana.”

⁴⁰Ngono katendeka nge matama mamwe manjinji kabakulumbidza eti, “Muzwitjidze mu tjizekugwana itjetji tjakabipa.”

⁴¹Ibabo bakaamutjila ndebo iye bakadubikiwa, ngono ilelo zhuba bakapaphidziwa nge bathu bali zwiwulu zwitatu (3 000).

⁴²Bakamusila meya zwidiyo zwe batumwa ba Jesu nenge kushangana nenge kupemula tjiwunga nenge mitembezelo.

⁴³Mmwe ne mmwe kazhigwa ngotja, ngono makaabadzo manji ne zwilakidzo zwinotjenamisa zwinji zwakathamiwa nge batumwa ba Jesu.

⁴⁴Bagalimoyo bose bakabe bali tjithu tjing'ompela, bakashanganyila tjimwe ne tjimwe.

⁴⁵Bakatengesa zwithu zwabo, kose ne thundu dzabo, ngono bakapa mmwe ne mmwe kuyendidzana nge kushaya kukwe.

⁴⁶Bakadwilila mazhuba wose beshangana mu Ng'umba ye Ndzimu. Bakabe bepemula tjiwunga mu mizi yabo beja bose nge moyo yakashatha nenge moyo mitjena,

⁴⁷bekudza Ndzimu kakale beamutjigwa zubuyanana nge bathu bose. Ngono She bakapapha zhuba ne zhuba ibabo bakabe betjidziwa.