Read Kalanga Mishingo 21 Bible Online

Mishingo 21 - Kalanga bible

Mishingo 21

¹Tikati tathubukana nabo, tikayenda nge gungwa takatambunukila ku Kosi, tjimuka tikanoti ku Rodesi, kudwa ipapo tikayenda ku Patara.

²Takawana ikepe tjitjulukila ku Fenikiya tikatatha ngono tikayenda nge gungwa.

³Tikapinda nzi we Sipuro tili ku burwa tiwubonela kujana ngono tikadwilila tiyenda nge gungwa ku Siriya. Takadeluka ku Tire ikepe tjedu kwatjakabe tjakafanilo tula thundu yatjoko.

⁴Tikati tiwana badiyiwa ikoko, tikagala nabo mazhuba ali kutendeka. Nge Meya, bakakumbila Paulo kuti asipindile ku Jerusalema.

⁵Koga kukati mazhuba edu ikoko awila, tikadwilila mu zila yedu. Bagalimoyo bose ne bakadzi babo ne bana babo bakatidusa mu nzi, ngono ipapo mu phili dze gungwa tikatembezela tikawonekana.

⁶Kudwapo tikatatha ikepe, ngono ibo bakabgwilila kanyi.

⁷Takati tawidza gwendo gwedu kudwa ku Tire tikaswika ku Pitolemeo ngono takadumilisa zwikamu tikagala nabo zhuba ling'ompela.

⁸Takapinda tjimuka tikanoti ku Sizariya ngono tikaswika ku ng'umba ya Filipo nsumikili mmwe we bali kutendeka tikagala naye.

⁹Wakabe ana bakololokadzi bali banna basakalobogwa bakabe belebesambeli.

¹⁰Tikati tagala ikoko mazhuba mashomanana, nlebesambeli unodang'wa Agabho kaswika edwa ku Judiya.

¹¹Kazha ku tili, ngono katola mwandabula wa Paulo kazwisunga ndiwo maboko ne makumbo, ngono kati, “Meya yakayengemala ikati, ‘Nge zila iyeyi Bajuta be Jerusalema banowosunga mweni we mwandabula iwoyu, ngono banowompa Bezwitjaba.’ ”

¹²Tikati tihwa ikoku, iswi ne bathu bakabe bali ipapo tikakumbila Paulo kuti asiyende ku Jerusalema.

¹³Ipapo Paulo kadabila eti, “Apa ini mulila muhwisa moyo wangu zogwadza kene? Andizozwilulwamisila kusungwa koga, koga ne kufila ku Jerusalema ndakaguzwilulwamisila ndifila zina la She Jesu.”

¹⁴Kukati Paulo asingadumane naswi tikatoboka ngono tikati, “Kuda kwa She ngakuyitiwe.”

¹⁵Shule kwe mazhuba iyawa takazwilulwamisa, ngono tikatathila ku Jerusalema.

¹⁶Bamwe batobeli be ku Sizariya bakayenda naswi bakatiyisa ku nzi wa Munasoni kwatakabe takafanila gala. Wakabe ali nlume unodwa ku Sipuro kakale ali mmwe we badiyiwa be kutanga.

¹⁷Takati tiswika ku Jerusalema, zwikamu zwikatiamutjila zubuyanana.

¹⁸Tjimuka, Paulo kayenda naswi kunobona Jakubo, ngono bakulu bose bakabe bali yapo.

¹⁹Paulo kabadumilisa, ngono kabika nge buzhalo kuti Ndzimu wakathamani pakati kwe Bezwitjaba nge kuushingila kukwe.

²⁰Bakati behwa ikoku, bakakudza Ndzimu. Ipapo bakati kuna Paulo, “Ikamu Paulo unobona kuti zwiwulu zwingapani zwe bathu pakati kwe Bajuta zwagalamoyo? Ngono bose bakatukutilila kulondolodza nlayo.

²¹Bakabudziwa nge kuko kuti unodiya Bajuta bose banogala ne Bezwitjaba kufupatila Mushe, ubabudza kuti basithumbile bana babo kene kulondolodza tjilenje.

²²Towothamani? Nge malebeswa banowohwa kuti wazha,

²³ndizo shinga tjatinokubudza. Tina balume banna bakatuna.

²⁴Tola balume ibaba uzwitjenapadze kang'ompela nabo ulipe tjinyikilo dzabo kuti misholo yabo itesegwe. Ipapo mmwe ne mmwe unowoziba kuti akuna malebeswa mu ndebo dzinolebgwa nge kuko ne kuti iwe unotjilila mu kuhwa nlayo.

²⁵Koga ngekwe Bezwitjaba bakabe bagalimoyo takabatumila lukwalo tibabudza kuti takalebeleka tikapedza titi basitongo ja zojiwa zwakapiwa midzimu kene malopa kene phuka yakasiniwa nenge kuti bazwidzibe mu bupombgwe.”

²⁶Tjimuka Paulo katola balume ibabo ngono kazwitjenapadza nabo. Ipapo kayenda ku Ng'umba ye Ndzimu kupa zibiso ye kuti mazhuba ekutjenapadziwa anowowila lini nenge kuti tjibhayilo tjithamigwe mmwe ne mmwe wabo.

²⁷Kukati mazhuba ali kutendeka abe pejo ngopela, bamwe Bajuta banodwa ku Ezhiya bakabe babona Paulo ku Ng'umba ye Ndzimu, bakadzonga mbunga wose, kakale bakambhata

²⁸bemimila beti, “Balume be Iziraela, mutibhatshe! Oyu ndiye nlume unodiyila bathu bose ntome ngekwe bathu bedu ne nlayo wedu nenge bugalo igogu. Pezhugwi kwa ikoko, wakazhisa Bagiriki kabalonga mu Ng'umba ye Ndzimu, ngono bakatemapadza bugalo igogu gwakayengemala.”

²⁹Bakabe batongo bona Tirofimo N'efeso ali mu nzi ana Paulo, ngono bakaalakana kuti Paulo wakabe anzhisa ku Ng'umba ye Ndzimu.

³⁰Nzi nkulu wose ukadzongeka, ngono bathu bakazha bose bakalabuka. Bakabhata Paulo ngono bakankakatila kuzhe kwe Ng'umba ye Ndzimu, ngono tjinyolotjo mikoba ikazhaligwa.

³¹Bakati batjagwisa kumbulaya, matama ekuti nzi wose we Jerusalema wapanduka kaswika ku Nkulu we babhayani be Roma.

³²Tjinyolotjo katola babhayani ne balauli be babhayani bali zana ngono bakalabukila ku mbunga. Kukati bapanduki bebona Nkulu ne babhayani bakamisa kuloba Paulo.

³³Nkulu we babhayani kazha kansunga, ngono kati asungwe nge ketani mbili. Ipapo kabhuzwa kuti ndiani nenge kuti watjinyani.

³⁴Bamwe mu mbunga bakamimila beleba tjimwe, koga bamwe belebabo tjipoga, ngono Nkulu we babhayani kasitubule kuhwa malebeswa nge zhoba, kalaya kuti Paulo ayisiwe ku nzi we babhayani.

³⁵Paulo kati eswika pa datho kudzongeka kwe mbunga kwakabe kuli kukulu kwaakadzina kasengwa nge babhayani.

³⁶Mbunga wakatobela ukadwilila mbeli umimila uti, “Mumbulaye!”

³⁷Kukati babhayani babe pejo ngolonga Paulo mu nzi we babhayani, kabhuzwa Nkulu we babhayani kati, “Apa ndingaleba tjimwe nawe?” Kadabila eti, “Unoziba Tjigiriki kene?

³⁸Apa ate iwe N'egipiti wakatangisa bupanduki, ngono kabe ntungamili we bapanduki be babulayi bali zwiwulu zwili zwinna (4 000) ku tjilambanyika mazhuba akapinda kene?”

³⁹Paulo kadabila kati, “Imi ndi Njuta, unodwa ku Taso mu Silisiya, ndili n'gali we nzi wakalumba. Ndokumbila kuti mundiletje ndilebeleke ne bathu.”

⁴⁰Paulo kati adumigwa nge Nkulu we babhayani kama mu datho ngono kanyaladza bose nge maboko awe, kukati kwabe ne kunyalala kukulu kati ku bali nge Tjihebheru: