Read Kalanga Mishingo 22 Bible Online

Mishingo 22 - Kalanga bible

Mishingo 22

¹“Zwikamu na botate, mundihwilile andizwimila ngwenu mbeli kwenyu!”

²Bakati behwa elebeleka nabo nge Tjihebheru bakanyalala kwazo; ngono Paulo kadwilila kati:

³“Imi ndi Njuta ndakazwaligwa mu Taso mu Silisiya, koga alegwa mu nzi iwowuno ndili pasi kwa Gamaliyele. Ndakaamutjila ndayo yakasima mu nlayo wa bobatategulu bedu ngono ndakabe ndakatukutilila Ndzimu samwi mose nasi.

⁴Ndakadziyidza kunoti mu lufu, bathu bakabe betobela zila iyeyi. Ndakabhata balume ne bakadzi ha balashila mu ng'umba ye busungwa.

⁵Ntungamili we bapirisiti ne Gulukota lose bangatendeka kuti ndoleba malebeswa. Ndakaamutjila mubali hwalo dzakwaligwa zwikamu mu Damasiko, ndizo ayenda ikoko kubhata bathu ibaba ne kubazhisa ngeno ku Jerusalema bakasungwa kuti balobgwe.

⁶“Ndakati nditjayenda ndiabilila Damasiko, kungabe pakati kwe masikati tjinyolotjo tjedza tjikulu tjidwa kudzimu tjakandipoteleka.

⁷Ndakawila pasi, ngono ahwa hwi liti kundili, ‘Saulo, Saulo! Apa unondidziyidzilani kene?’

⁸Adabila ndibhuzwa nditi, ‘Ndimwi ani She?’ Iye kadabila eti kundili, ‘Ndimi Jesu we Nazareta, iye waunodziyidza.’

⁹Balume bakabe banami bakabona tjedza, koga abazohwa hwi lakabe lilebeleka nami.

¹⁰Abhuzwa ati, ‘Ndishingeni ngono She?’ Ngono She kati kundili, ‘Milika ungine mu Damasiko, ngono ikweno unowobudziwa tjimwe ne tjimwe tjawakashaluligwa kutjishinga!’

¹¹Ndakabe bhofu ngekwe tjedza tjinopenya, ndizo bandakabe ndinabo bakandikweba nge luboko bakanditungamilila mu Damasiko.

¹²“Mu nzi iwowuje kwakabe kuna nlume edang'wa kuyi Ananiyasi, nlume wakabe enamata kunoyendidzana ne nlayo, etetiwa kwazo nge Bajuta bose bakabe begala ikoko.

¹³Kazha kundili, kama pandili, ngono kati, ‘Ikamu Saulo, pofunuka!’ Nge tjibaka itjetjo apofunuka, ngono ambona.

¹⁴Kati, ‘Ndzimu wa bobatategulu bedu wakushalulila kuziba kuda kwawo, kubona Nlulwami ne kuhwa hwi linodwa mu nlomo uwe.

¹⁵Ngobe unowobe ntendeki ku bathu bose ngekwe tjawakabona nenge tjawakahwa.

¹⁶Ndizo ngwenu, utjigelileni? Milika, udubikiwe ungule jinyo lilo udana zina lile.’

¹⁷“Ndakazha ku Jerusalema, ngono ati nditjatembezela mu Ng'umba ye Ndzimu, abe ne mbono,

¹⁸yandakabona She muili beti kundili, ‘Libilidza ubhude mu Jerusalema tjinyolotjo, ngobe bathu muno abatowoamutjila butendeki gugo nge kwangu.’

¹⁹Adabila nditi, ‘She, bathu banoziba zubuyanana kuti ndakayenda ku ng'umba dze mitembezelo kulonga mu ng'umba ye busungwa ne kuloba ibabo bakabe begalamoyo mu muli.

²⁰Kwakati lopa le ntendeki wenyu Sitifani litebugwa, imi ndakabe ndili ipapo ndidumana ne kubulawa kukwe ndakalinda zwiambalo zwe babulayi babe.’

²¹She bakati kundili, ‘Yenda, ngobe ndowokutuma kule kule kuna Bezwitjaba.’ ”

²²Bathu bakahwilila Paulo kudzina eleba ikoku, koga ipapo bakatangisa mimilila pezhugwi beti, “Dusani nthu wakajali mu shango! Mumbulaye! Aazofanilo tjila!”

²³Bakabe bemimila belashanya zwiambalo zwabo, bepukula hwuluba.

²⁴Nkulu we babhayani kalaya kuti Paulo ayisiwe mu ng'umba ye babhayani, kabadwa kati banlobe nge rwabha kuti babone kuti ini Bajuta bemmimila sa ikoku.

²⁵Koga bakati bansunga kuti banlobe Paulo kati ku nlauli we babhayani bali zana wakabe ali mile ipapo, “Apa ku mu nlayo kuti ulobe n'gali we Roma asatongo sumikilisigwa mmwe nlandu kene?”

²⁶Nlauli we babhayani kati ehwa ikoku, kayenda ku Nkulu we babhayani, ngono kambhuzwa kati, “Moshaka thamani kene? Nlume iwoyu Nroma!”

²⁷Ndizo Nkulu we babhayani kayenda kuna Paulo kambhuzwa eti, “Undibudze, apa un'gali we Roma kene?” Paulo kadabila eti, “Ee.”

²⁸Nkulu we babhayani kati, “Ndakabe Nroma ngolipa themba hwulu ye mari.” Paulo kashandula eti, “Koga imi ndakazwagwa ndili Nroma.”

²⁹Tjinyolotjo balume bakabe bewombhuzwa bakabuyila shule bedwa panli; Nkulu we babhayani kapalukamoyo asinoziba kuti Paulo Nroma nenge kuti wansunga nge dziketani.

³⁰Nkulu we babhayani kada kuziba malebeswa kuti Bajuta bakabe bebona Paulo nlandu weni; ndizo tjimuka kasunungula Paulo kalaya bapirisiti bakulu ne Gulukota lose kushangana. Ipapo katola Paulo kammisa mbeli kwabo.