Read Kalanga Mishingo 23 Bible Online

Mishingo 23 - Kalanga bible

Mishingo 23

¹Paulo kalingisisa Gulukota, ngono kati, “Zwikamu zwangu, hana yangu i mbuyanana ngekwe zila yandakatjila ndiyo mbeli kwe Ndzimu kuswikila zhuba lino.”

²Ngekwa ikoku Ntungamili we bapirisiti Ananiyasi kadwa bakabe bali mile pejo na Paulo kuti banlobe mu nlomo.

³Ipapo Paulo kati kunli, “Ndzimu unowoloba iwe, iwe guma lakadzulugwa butjena ndiwe! Apa ugele ipapo undisumikilisa nge nlayo, koga iwe nge kuko utjuluka nlayo nge kuti ndilobgwe!”

⁴Ibabo bakabe bali mile pejo na Paulo bakati, “Apa unotuka Ntungamili we bapirisiti we Ndzimu kene?”

⁵Paulo kati, “Zwikamu, ndabe ndisingazibe kuti ndiye Ntungamili we bapirisiti; ngobe kwakakwagwa kuyi, ‘Usilebe bubi ngekwe nlauli we bathu ba kanyi kuko.’ ”

⁶Paulo kati ebona kuti bamwe babo Basadusi koga bamwe Bafarasi kamilidzila hwi pezhugwi mu Gulukota kati, “Zwikamu, imi ndi Nfarasi, nkololo we Bafarasi. Ndosekesegwa kugalabgwe nenge kumuka kwe bafi!”

⁷Kati aleba ikoku kukabe ne zhoba pakati kwe Basadusi ne Bafarasi, ngono gubungano likabe ne kuthubukana pakati.

⁸Basadusi banoti akuna kumuka mu bafi ne kuti akuna batumwa be Ndzimu kene Meya, koga Bafarasi banoti zwithu zose izwezwi zwiyapo.

⁹Kwakabe ne zhoba hwulu, ngono bamwe be badiyi be nlayo bakabe bali Bafarasi bakamilika, ngono bakakakabala kwazo beti, “Iswi atitobona nlandu mu nlume iwoyu. Meya kene ntumwa we kudzimu ha alebeleka nayeke?”

¹⁰Kukakabadzana kwakabe kwakabangalala kwakati Nkulu we babhayani katja kuti banowopalula Paulo. Kadwa babhayani kuti badeluke bankombeledze banzhise mu nzi we babhayani.

¹¹Busiku igogo She bakama hwunde na Paulo, ngono bakati, “Ibe nge tjilopa! Sekwa wakapa butendeki nge kwangu mu Jerusalema wakafanila kunopabo butendeki ku Roma.”

¹²Mangwanana etjimuka Bajuta bakathama nlangano ngono bakazwisunga nge kutuna kuti basije kene kuli kung'wa kudzina bebulaya Paulo.

¹³Balume banopinda makumi manna (40) bakabe bali mu nlangano iwoyo.

¹⁴Bakayenda ku bapirisiti bakulu neku bakulu, ngono bakati, “Tatuna takalonga meya kusaja tjimwe kudzina tibulaye Paulo.

¹⁵Ndizoke ngwenu, imwi ne Gulukota, kumbilani Nkulu we babhayani kunzhisa mbeli kwenyu muti moshaka matama mamwe e malebeswa ngekwe ndebo iye. Takazwilulwamisila kumbulaya asathu kaswika ipapa.”

¹⁶Koga kukati nzekulu wa Paulo we tjilisana ehwa ngekwe nlangano iwoyo kangina mu nzi we babhayani, ngono kabudza Paulo.

¹⁷Ipapo Paulo kadana mmwe we balauli be babhayani bali zana kati, “Yisa mbisana iwoyu ku Nkulu we babhayani; una tjaanoshaka kumbudza.”

¹⁸Ndizo kansa ku Nkulu we babhayani ebe eti, “Paulo we nsungwa wandidana, ngono kandikumbila kuti ndizhise mbisana iwoyu kumuli, ngobe una tjaanoshaka kumubudza.”

¹⁹Nkulu we babhayani kabhata mbisana nge luboko, kamila naye ntome ngono kambhuzwa bali boga kati, “Ini tjaunoshaka kundibudza?”

²⁰Kati, “Bajuta badumana kuti bamukumbile kuzhisa Paulo mbeli kwe Gulukota mangwana beti banoshaka matama mamwe e malebeswa nge kukwe.

²¹Musibadumile, ngobe balume banopinda makumi manna (40) babo bakanlalila mu zila. Batuna kuti abatowoja kene kuli kung'wa kudzina bambulaya. Bakazwilulwamisa ngwenu bamilile kuti mubadumile mu kukumbila kwabo.”

²²Nkulu we babhayani kadwa nzhuzha kati ayende, ngono kantjemela eti, “Usibudze mmwe kuti wandibudza ikoku.”

²³Ipapo kadana babili be balauli be babhayani bali zana, kabadwa kati, “Lulwamisani goko le babhayani bali mazana mabili (200) ne balume bali makumi ali kutendeka (70) bakatatha mbizi ne balume bali mazana mabili (200) bakabhata mathumo, kuyenda ku Sizariya nge tjibaka tje buzhanalume busiku guno.

²⁴Muwanile Paulo mbizi kuti atathe, kuti ndizo anoswika zubuyanana ku mbusi Felikisi.”

²⁵Ngono kakwala lukwalo eti,

²⁶“Ndimi Kilaudiyo Lisiyasi, kuna Mbilimangenje, Mbusi Felikisi, Dumiliso.

²⁷Nlume iwoyu wakabhakhwa nge Bajuta, ngono bakabe bali pejo nge kumbulaya koga azha ne babhayani bangu an'gwila, ngobe ndakabe ndahwa kuti n'gali we Roma.

²⁸Ndakabe ndishako ziba kuti ini bempa nlandu ndizo anzhisa ku Gulukota labo.

²⁹Ndakawana ili kuti nlandu waanobong'wa wakalingisana nge nlayo wabo, koga kwakabe kusina nlandu wakalizana kuti afe kene alongwe mu ng'umba ye busungwa.

³⁰Ndakati ndabudziwa ngekwe nlangano unoyitiwa ngekwe nlume iwoyu, antumila ku muli tjinyolotjo. Kakale ndakadwa banombona nlandu kuti bamubudze nlandu uwe.”

³¹Ndizo babhayani, ngolondolodza ndayo, bakayenda na Paulo busiku, ngono bakanzhisa ku Antipatirisi.

³²Tjimuka babhayani banoyenda nge makumbo bakabgwilila ku nzi we babhayani, ngono bakaletja babhayani be mbizi kuyenda naye.

³³Kukati babhayani banoyenda nge mbizi beswika mu Sizariya bakayisa lukwalo ku mbusi, na Paulo bakansa kunli.

³⁴Mbusi kabala lukwalo, ngono kabhuzwa kuti unodwa ku ntuthu upi. Wakati ehwa kuti unodwa ku Silisiya

³⁵kati, “Ndowokuhwilila ha banokubona nlandu baswika.” Ipapo kalaya kuti Paulo alisiwe ali mu ng'umba ya Herode ye bushe.