Read Kalanga Mishingo 24 Bible Online

Mishingo 24 - Kalanga bible

Mishingo 24

¹Shule kwe mazhuba mashanu Ntungamili we bapirisiti Ananiyasi kayenda ku Sizariya ana bamwe bakulu ne mmilili wakabe eyi Tetulo. Bakabudza mbusi milandu yabanotilika Paulo.

²Ipapo Paulo kadanigwa mukati, ngono Tetulo katangisa kubika sahwoku: “Nge kwenyu totjilila mu mbakiso kakale nge butjenjedu gwenyu mbilimangenje Felikisi, dwililo mbeli yakazhisiwa mu itjaba itjetji.

³Nge zila dzose kakale pamwe ne pamwe, ikoku tokuamutjila nge mboko.

⁴Anditoshaka kutjinya tjibaka tjenyu, ndizo ndomukumbila kuti mube ne nzhazho kuhwilila mbiko yedu fupi.

⁵Iswi takawana nlume iwoyu ali mbatsha; unomusa phipiti pakati kwe Bajuta bose mu shango yose kakale ntungamili we bhiko le Banazareta.

⁶Wakagwisa kulonga shambgwa Ng'umba ye Ndzimu, koga tikambhata. [Iswi takalangana kunsumikilisa nge nlayo wedu.

⁷Koga Lisiyasi Nkulu we babhayani kazha, ngono nge masimba makulu kantola mutili.

⁸Ipapo Lisiyasi kalaya kuti basumikilisi babe bazhe mbeli kwenyu.][11] Ha mumbhuzwa iwoyu nlume, imwi nge kwenyu mowotubula kuziba munli zwithu zose zwatinombona nlandu muzwili.”

⁹Bajuta bakadumabo kuti zwithu izwezo malebeswa.

¹⁰Mbusi kadwa Paulo kuti alebeleke, ngono Paulo kati: “Ndoziba kuti makabe nsumikilisi we itjaba itjetji makole manjinji, ndizo ndakashatha kuzwimila mbeli kwenyu.

¹¹Sekwa mungaziba nge kwenyu, ate mazhuba anopinda gumi lina mabili ndakayenda ku Jerusalema kunonamata Ndzimu.

¹²Bajuta abazondiwana ndinyanyayidzana ne mmwe mu Ng'umba ye Ndzimu kene kuli kundiwana ndidzonga bathu, mu Ng'umba ye Ndzimu kene mu ng'umba dze mitembezelo kene kumwe nzi.

¹³Na iko abangape butendeki guzhele gwe milandu yabanondipa.

¹⁴Tjandinoduma etji: Ndonamata Ndzimu wa bobatategulu bedu kuyendidzana nge Zila ye Ndzimu ibo yabanoti manyepkhwa. Koga ndogalamoyo tjimwe ne tjimwe tjakakwagwa mu nlayo ne mu hwalo dze balebesambeli.

¹⁵Ndina kugalabgwe iko kwabanako ibaba nge kwabo mu Ndzimu, kuti bathu bose, bakalulwama ne babi banowomuka mu lufu.

¹⁶Ndizo ndoshinga ne matatabuko angu wose misi yose kube ne hana mbuyanana mbeli kwe Ndzimu na mbeli kwe bathu.

¹⁷“Ndakabuya ku Jerusalema shule kwe makole manjinji ndowopa itjaba tja kanyi kwedu zwipo zwe bashayi ne zwibhayilo.

¹⁸Ndakati nditjashinga ikoku bakandiwana mu Ng'umba ye Ndzimu ndapedza nshingo we kuzwitjenapadza. Kwakabe kusina mbunga wakabe unami, kusina phipiti.

¹⁹Koga bamwe Bajuta bakabe bedwa ku ntuthu we Ezhiya bakabe bali ipapo; ibo nge kwabo bakafanila kuzha mbeli kwenyu balebe milandu yangu ha banayo.

²⁰Kene letja balume ibaba balebe jinyo labakandibona nlandu ndilo pandakama mbeli kwe Gulukota,

²¹kuzhe kwe tjithu tjing'ompela tjandakaleba pandakama mbeli kwabo nditi, ‘Ndimile mbeli kwenyu nasi ndisumikilisigwa kumuka kwe bafi.’ ”

²²Ipapo Felikisi, iye wakabe ana zibo hwulu ngekwe Zila ye Ndzimu kamisa ndebo. Kabadwa kati, “Kowoti Lisiyasi Nkulu we babhayani azha ndowopedza ndebo yenyu.”

²³Kalaya nlauli wakalinda Paulo kun'gadza akalindiwa, koga abe ne sununguko ne kuti kakale aletje bazwalani babe kumpa zwaanosheta.

²⁴Shule kwe mazhuba Felikisi kazha ne nkadzi uwe Durusila, wakabe ali Njuta. Kadanigwa Paulo ngono kanhwilila elebeleka ngekwe kugalamoyo muna Kirisiti Jesu.

²⁵Paulo kati edwilila eleba ngekwe ndulamo nenge kuzwidziba ne zhuba linozha le kusumikilisiwa, Felikisi katja ngono kati, “Ungayendazo ngwenu. Ndowokudana kakale ha ndawana tjibaka.”

²⁶Wakabe eyemula kuti Paulo ampe mari; ngono ndi ikoku kan'danigwa kanjinji, ngono kalebeleka naye.

²⁷Shule kwe makole mabili, Porokiyo Fesito katola mamo a Felikisi. Felikisi kashaka kuti athamile Bajuta tjabanoda ndizo kaletja Paulo ali mu ng'umba ye busungwa.