Read Kalanga Mishingo 26 Bible Online

Mishingo 26 - Kalanga bible

Mishingo 26

¹Agiripa kati kuna Paulo, “Una ndetjedzelo kuzwilebelekegwa.” Paulo katambunudza luboko gugwe kazwimila sahwoku:

²“Mambo Agiripa! Ndozwikumbula ndina phazha kuti nasi ndizwimile mbeli kuko mu zwithu zose Bajuta zwabanonditjeta ndizo,

³ngobe uziba zubuyanana milenje ne ndebo dze Bajuta dzabanonyanyayidzana mudzili. Ndizo ndomukumbila kuti mundihwilile nge moyonlefu.

⁴“Bose Bajuta banoziba sekwa ndakatjila kudwila ndili ntukununu. Banoziba sekwa ndakapitsha butjilo gwangu gose, kutanga mu shango ya kanyi kwedu nenge ku Jerusalema.

⁵Kwabe ntolo beziba, ha beda kutendeka kuti kudwa mu kutangisa ndakatjila ndili ndungululo ye bhiko le milayo yakasima kwazo ye kunamata kwedu, le Bafarasi.

⁶Ngono ngwenu ndimile pano ndisumikilisiwa ngekwe kugalabgwe kwandinako mu kugadziwabgwe kwa bobatategulu nge Ndzimu,

⁷itjo tjithu njudzi dza kanyi kwedu dzili gumi lina mbili tjadzinogalabgwe kuamutjila, dzinamata Ndzimu siku ne sikati dzakalongamoyo. Ngono ngekwa ikoku kugalabgwe, Mambo, Bajuta banonditilika nlandu!

⁸Ini muwana kwakasima kuduma kuti Ndzimu unomusa bafi?

⁹“Imi nge kwangu ndakawana kwakafanila kuti ndithame zwithu zwinjinji kunyanyayidza zina la Jesu we Nazareta.

¹⁰Itjetjo nditjo tjandakashinga mu Jerusalema. Ndakaamutjila simba mu bapirisiti bakulu, ngono alonga bunjinji gwe bagalimoyo mu ng'umba ye busungwa; bakati besumikilisigwa lufu, namibo adumana nako.

¹¹Ndakabadziyidza kanjinji mu ng'umba dzose dze mitembezelo, ngono agwisa kubathama kuti batuke Ndzimu wabo. Nge kubagwadzilamoyo kukulu, ndakabadziyidza ne ku mizi ye zwitjaba zwipoga.

¹²“Nditjo tjandakabendayendila ku Damasiko nge simba nenge ndayo dzinodwa mu bapirisiti bakulu.

¹³Mambo, kwakabe kuli pakati kwe masikati, ndili mu zila ha ndibona tjedza tjinopenya kupinda zhuba, tjidwa pezhugwi ngono tjikapenya kundipoteleka na ibabo bakabe bayenda nami.

¹⁴Takati tawila pasi tose, ahwa hwi liti kundili mu Tjihebheru, ‘Saulo, Saulo! Apa unondidziyidzilani kene? Unozwikubadza nge kuthula theswi dze mbambo.’

¹⁵Abhuzwa ati, ‘Ndimwi ani She?’ Ngono She bakadabila beti, ‘Ndimi Jesu, waunodziyidza.

¹⁶Koga milika ume nge makumbo. Ndakuzwilakidza ngekwa ikoku, kukushalula kuti ushinge kakale ube ntendeki mu zwithu zwawandibona muzwili ne muna izwezo zwandinowokuzwilakidza.

¹⁷Ndowokuangulila mu bathu be Iziraela ne muna Bezwitjaba ibo bandinokutuma ku bali,

¹⁸kuzhula mesho abo, kuti ndizo bashandukile zhalima babe tjedza. Bashandukila simba la Satani bazhe ku simba le Ndzimu, kuti ndizo nge kugalamoyo kwabo mundili baamutjile kuzwiibhatigwa zwibi zwabo, ngono bawane bugalo pakati kwe bayengemali.’

¹⁹“Ngono ndizo, Mambo Agiripa, andizonyanyayidza mbono yandakabona kudwa kudzimu.

²⁰Ndakatanga ku Damasiko, kudwapo ati ku Jerusalema ne Judiya ne kuna Bezwetjaba, ndisumikila kuti bashandukile matjinyo abo bazhe ku Ndzimu kakale bashinge mishingo inolakidza aba shanduka.

²¹Ngekwa ikoku Bajuta bakandibhata ndili mu Ng'umba ye Ndzimu ngono bakagwisa kundibulaya.

²²Koga kuswikila zhuba lino ndabe ndibhatshiwa nge Ndzimu, ndizo ndimile pano kupa butendeki gwangu kuna bose, ku batukununu ne bakulukulu nge kunofanana. Tjandinoleba nditjozwatjo balebesambeli na Mushe tjabakati tjowoshingikala,

²³kuti Mesiya wakadziyila, ngono nge kube we kutanga kumuka mu bafi, kuleba tjedza tje jidzo ku Bajuta ne kuna Bezwitjaba.”

²⁴Kukati Paulo ezwimila nge zila iyeyi, Fesito kamilidza hwi kati “Iwe unopenga Paulo! Kuzwidiya kuko kukulu kokupengesa!”

²⁵Paulo kadabila eti, “Anditopenga Mbilimangenje Fesito! Ndoleba matama ana malebeswa asina bupengo.

²⁶Mambo banoziba ngekwe zwithu izwezwi, ndizo ku bali ndolebeleka ndakasununguka, ngoti ndogalamoyo kuti zwithu izwezwi azwizobalashikila ngoti azwizoshingikalila mu ikotjo.

²⁷Mambo Agiripa, apa mogalamoyo balebesambeli kene? Ndoziba kuti mobagalamoyo!”

²⁸Agiripa kati kuna Paulo, “Apa unokumbula kuti mu tjibaka itjetji tjifutshwanana unowondithama Nkirisiti kene?”

²⁹Paulo kadabila eti, “Kene tjibaka tjifutshwana kene tjilefu, ntembezelo wangu ku Ndzimu hwuti kusibe imwi koga nanga na bose makandihwilila nasi, mube tjandili itjo, kuzhe kwe ketani idzedzi!”

³⁰Ipapo mambo ne mbusi na Bherinisi ne bakabe bali gele nabo bakamilika,

³¹ngono bakati badwa ipapo, bakalebesana beti, “Nlume iwoyu aazothama tjimwe tjaangafila kene kuli kulongwa mu ng'umba ye busungwa.”

³²Ngono Agiripa kati kuna Fesito, “Nlume iwoyu unobe asunungugwa ha asakabe asapitshila ndebo kuna Kaisara.”