Read Kalanga Mishingo 27 Bible Online

Mishingo 27 - Kalanga bible

Mishingo 27

¹Kwakati kwapedzisisiwa kuti toyenda nge gungwa ku Italiya, bakayisa Paulo ne bamwe basungwa ku nlauli we babhayani bali zana “We goko la Agusito, iye edang'wa Juliyo.”

²Tikatatha ikepe tjakabe tjidwa ku Adiramitiumi, tjakabe tjakalulwamisigwa kuyenda ku mizi ye ntuthu we Ezhiya imu manginilo e gungwa, ngono tikayenda nge gungwa. Arisitako we Makedoniya wakabe edwa ku Tesalonika wakabe anaswi.

³Tjimuka tikaswika ku Sidoni. Juliyo wakabe ana buthu kuna Paulo kanletja kayenda kunobona bazwalani babe, kupiwa tjaanosheta.

⁴Tikadwilila kudwa ipapo, se phepo yakabe itutudza yakalingisana naswi, takayenda nge gungwa tili ku ndzibo wakasitilika we tjigwizi tje Sipuro.

⁵Tikatjuluka gungwa gwe Silisiya ne Pamufiliya ngono tikaswika ku Mira mu Lisiya.

⁶Ikoko nlauli kawana ikepe tje Alekizanda tjakabe tjiyenda ku Italiya, ndizo katitathisa.

⁷Tikayenda nge gungwa nge bunono mazhuba, ngono nge bukukutu bukulu bhelelo tikanoswika kwakalingisana ne nzi we Kinido. Phepo ikasitidumile kuyendila mbeli mu ndzibo iwoyo, ndizo tikayenda nge gungwa mu ndzibo wakasitilika we tjigwizi tje Kirete, tipinda ne pa Salimone.

⁸Takayenda nge bukukutu bukulu takasupha nge phili tikanoswika ku bugalo gunoyi Mamilo asina Mbatsha, pejo ne nzi we Laseya.

⁹Takapitsha tjibaka tjilefu ikoko, kudzina kube mbatsha kudwilidza gwendo nge gungwa, ngobe ngwenu zhuba le kuzwinyima zojiwa lakabe lapinda. Ndizo Paulo kabakumbuludza eti,

¹⁰“Balume, ndobona kuti gwendo gwedu gowobe ne hwubadzi ne kutjinyikigwa kukulu kusi kwe thundu ne ikepe koga, koga nenge matjilo edu.”

¹¹Koga nlauli we babhayani bali zana kagadziwamoyo nge tjakalebgwa nge ntakuli ne mweni we ikepe, koga, kasihwilile tjakalebgwa ndi Paulo.

¹²Mamilo e zwikepe akabe asi akalulwama kupitshila mbaba muali; ndizo bunji gwe balume ibabo gukada kuyenda nge gungwa ne kugwisa kuswika ku Fenikiya, akutubuka kupitshila mbaba ikoko. Fenikiya mamilo, amu Kirete akalingisana ne pakati kwe burwa guku bhezhuba ne bunandzwa guku bhezhuba.

¹³Phepo ndelu ndelu inodwa ku burwa ikatangisa kuhwuhwudza, ndizo balume ibabo bakakumbula kuti bangadwilidza mano abo, ndizo bakasunungula zwibhati zwe ikepe bakayenda nge gungwa bakasupha ne Kirete.

¹⁴Koga tjinyolotjo dutu linodang'wa “Bunandzwa bhezhuba” likatutudza lideluka mu tjigwizi.

¹⁵Ikaloba ikepe, ngono sekwa kabe kusingatubuke kuti ikepe tjilingisane ne phepo, tikaletja kugwisa, ngono tikatjiletja tjitakugwa nge phepo.

¹⁶Takawana mbakililo ha tipinda ku burwa nge tjigwizi tjitukununu tjinoyi Kauda. Ikoko nge bukukutu, tikatubula kutjidza n'goro we ikepe.

¹⁷Bakaukwebela mukati, kakale ipapo bakasungilila misungo besimisa kupoteleka ikepe. Bakabe betja kuti pamwe banowowila mu nsetje vula paili shomanana kwakadziba ku Libhiya, ndizo bakadelusa saile bakaletja ikepe tjitakugwa nge phepo.

¹⁸Dutu lina masimba likadwilila, ndizo tjimuka bakatangisa kulashila thundu ye ikepe kuzhe,

¹⁹ngono mu zhuba le butatu bakaposela kuzhe zwishingiswa zwimwe zwe ikepe.

²⁰Mu mazhuba manjinji takabe tisingabone zhuba kene nyenyedzi, ngono phepo ikadwilila ngotutudza kwazo. Ipapo tikapelegwa nge kugalabgwe kwe kutjidziwa.

²¹Shule kwe tjibaka tjilefu balume basingaje, Paulo kama mbeli kwabo kati, “Balume, mobe makandihwilila ngono mukasibhude mu Kirete; ipapo tobe takaleya tjinyikilo ne ndashikilo dzose idzedzi.

²²Koga ngwenu ndomukumbila, Simisani moyo! Akuna ne nng'ompela wenyu unowolashikigwa nge butjilo gugwe; ikepe nditjo tjoga tjinowolashikigwa.

²³Ngobe busiku gwapinda ntumwa we kudzimu wandili wawo, iwo wandinonamata wakazha kundili

²⁴kati, ‘Usitje Paulo! Wakafanilo ma mbeli kwa Kaisara. Ndzimu watjidza bose banoyenda nawe mu gungwa.’

²⁵Ndizo simisani moyo, balume! Ndogalabgwe Ndzimu kuti kowobe koga sekwa ndakabudziwa.

²⁶Koga towotakuligwa mu tjimwe tjigwizi.”

²⁷Gwakabe guli busiku gwe bugumi lina kunna, ngono takabe titakugwatakugwa nge dutu mu gungwa gwe Adiriya. Nge tjibaka tjingabe tje pakati kwe busiku bayendisi be ikepe bakakumbulila kuti takabe tisedzela pejo ne shango.

²⁸Ndizo bakalashila nsungo mu vula wakasungiligwa tjithu tjinolema, ngono bakawana vula yakangina kungapa mitha dzili makumi manna (40); shule kwe tjibaka tjitukununu bakathama sa ikoko kakale, ngono bakawana ili makumi matatu (30) e thambo kungina.

²⁹Bakatja kuti ikepe tjingathulana ne shongwe, ndizo bakadelusa zwibhati zwinna shule kwe ikepe, ngono bakatembezela kuti kuyedze.

³⁰Ipapo bayendisi be ikepe bakagwisa kutizha bebhuda mu ikepe, bakadelusila n'goro we ikepe mu vula bethama se banonodelusa zwibhati zwimwe mbeli kwe ikepe.

³¹Koga Paulo kati ku nlauli we babhayani ne ku babhayani, “Ha bayendisi be ikepe basingagale mu ikepe, amungatjidziwe.”

³²Ndizo babhayani bakathubula nsungo wakabhata n'goro ne ikepe bakauletja ukayenda.

³³Kukati kuyendila kuyedza, Paulo kabakumbila bose kuja zojiwa eti, “Magala mazhuba ali gumi lina manna (14) ngwenu, ngono tjibaka tjose itjetjo amuzoja tjimwe.

³⁴Ndomukumbila, ijani zojiwa; zowomupa masimba, ngoti akuna tjinowomulashikila.”

³⁵Shule kwe kuleba ikoku, Paulo katola zojiwa, kaboka Ndzimu mbeli kwabo bose, kapemula katangisa kuja.

³⁶Bakakulumbidzika, ngono mmwe ne mmwe wabo kajabo zojiwa.

³⁷[Tose takabe tili mazana mabili ana makumi ali kutendeka ne bathu bali kutathatu (276) mu ikepe.]

³⁸Shule kwe mmwe ne mmwe aja kwakalizanila, bakalelusa ikepe ngolashila mathunde wose mu gungwa.

³⁹Kukati kuyedza, bayendisi be ikepe bakasizibe shango iyeyo, koga bakabona bunginilo guna nsetje, ngono bakakumbula kuti, akutubuka balonge ikepe ipapo.

⁴⁰Ndizo bakathubula zwibhati bakazwiletja zwinyungila mu gungwa, ngono bakasunungula misungo yakabe yakabhata migoti inolaula ikepe. Ipapo bakamilidza saile limbeli kwe ikepe kuti ndizo phepo isundile ikepe mbeli, ngono tikayenda mbeli ku phili.

⁴¹Koga ikepe tjikathula duluthulu le nsetje ngono tjikama pasi; ngono tjikabhaya pasi tjikasitubule kuyenda, ku bhato latjo kukavunanyiwa zwitibhutibhu nge mapundu e vula.

⁴²Babhayani bakaluka mano e kubulaya basungwa bose, kubadzibila kulobela bhamu ku phili beti bangatizha.

⁴³Koga nlauli we babhayani kashaka kutjidza Paulo, ndizo kabadzibila kuthama ikoku. Koga kalaya bose balume bangaloba bhamu kudzatila mu vula kutanga babhudile ku phili;

⁴⁴bakasala bekotobela, bakabhatilila mu mapulanka ne mu zwitibhutibhu zwavunika zwe ikepe. Oku ndiko sekwa takabhudila tose mu phili titjila.