Read Kalanga Mishingo 4 Bible Online

Mishingo 4 - Kalanga bible

Mishingo 4

¹Pita na Johani bakati batjalebeleka ne bathu bapirisiti ne nlauli we ng'umba ye Ndzimu ne Basadusi bakazha ku bali.

²Bakazha bakadzongeka ngoti batumwa bakabe bediya bathu beleba ngekwe kumusiwa kwe bafi ndi Jesu.

³Bakabhata Pita na Johani, ngobe kwakabe kuli madekwana bakabalonga mu ng'umba ye busungwa kuswikila tjimuka.

⁴Koga banjinji bakahwa dama bakagalamoyo, ngono palo ye balume yakakula ikalizana zwiwulu zwili zwishanu (5 000).

⁵Tjimuka balauli babo ne batungamili ne badiyi be nlayo bakakubungana mu Jerusalema,

⁶Anasi mpirisiti nkulu na Kaifasi na Johani na Alekizanda na bose be ng'umba ye bupirisiti.

⁷Bakati Pita na Johani bezhisiwa mbeli kwabo bakatangisa kubabhuzwa beti, “Makashinga ikoku nge simba lipi kene nge zina laani?”

⁸Ipapo Pita, ali zhele Meya yakayengemala kati ku bali, “Balauli ne bakulu be bathu!

⁹Ha ili kuti todang'wa nasi kuwodabilila nshingo mbuya wathamigwa tjilema ngono tibhuzwiwa kuti tjapodziwa tjini,

¹⁰ndizo zibani woku mose imwi ne bathu bose be Iziraela, takashinga ikoku nge zina la Jesu Kirisiti we Nazareta iye wamakabambula, iye Ndzimu wawakamusa mu bafi, nge kukwe nlume iwoyu umile mbeli kwenyu apola kwakapelela.

¹¹Ndiye “ ‘Bgwe lamakalamba imwi babaki, koga ndilo lakabe bgwe linotambunudza mbako.’

¹²“Jidzo ali towang'wa mu mmwe kakale, ngobe akuna limwe zina kakale mu shango lakapiwa bathu latingatjidziwa ndilo.”

¹³Bakati bebona kube nge tjilopa kwa Pita na Johani, ngono beziba kuti abazodiyika, bathu koga, bakatjenama ndizo bakapedzisisa kuti bathu ibaba bakabe bana Jesu.

¹⁴Koga ngobe bebona nlume wakabe apodziwa ali mile ipapo nabo, kwakabe kusina tjabangaleba benyanyayidza.

¹⁵Koga bakabadwa bakati babhudile kuzhe kwe lubazhe, ngono bakalebeleka bali boga.

¹⁶Bakabhuzwa beti, “Ini tjatinowoshinga nge balume ibaba kene? Mmwe ne mmwe mu Jerusalema unoziba kuti bashinga jenamiso gulu, ngono atingalandule ikoko.

¹⁷Koga kumisa tjithu itjetji kuandama mu bathu, ngatitjemeleni balume ibaba kuti basitjayite wabanolebeleka naye nge zina ileli.”

¹⁸Ipapo bakabakowomesedza kuti basibe batjabe belebeleka kene bediya nge zina la Jesu.

¹⁹Koga Pita na Johani bakashandula beti, “Muzwithubukanyile imwi kuti apa kwakalulwama mu mesho e Ndzimu kuhwa imwi kene Ndzimu.

²⁰Ngobe atingatubule kuletja kulebeleka ngekwe tjatakabona ne tjatakahwa.”

²¹Bakati basinobatjemela bakabaletja bakayenda. Abazoziba kuti bangabapa shamu tjini ngekwe bathu, ngobe bathu bose bakabe bekudza Ndzimu ngekwe tjakabe tjashingikala.

²²Nlume iwoyu wakapodziwa nge kunotjenamisa, wakabe ana makole anopinda makumi manna.

²³Bakati basinobe basunungugwa Pita na Johani bakabgwilila ku bakwinya babo ngono bakababikila kose kwakabe kwalebgwa nge bapirisiti bakulu ne bawola.

²⁴Bakati behwa ikoku, bakamilidzila mahwi abo bose ku Ndzimu betembezela beti, “She una masimba, imwi makathama kudzimu ne shango ne gungwa naizo zose zwimu magalo iyawa.

²⁵Makaleba nge Meya yakayengemala nge nlomo we nlanda wenyu, tate bedu Dafite muti, “ ‘Ini zwitjaba zwizhala bushongola, ne bathu belanganila suli?

²⁶Bomambo be shango bakazwilulwamisa, ne balauli bakakubungana kumukila ne Ndzimu She ne Mesiya uwe.’

²⁷“Nge malebeswa Herode na Pontiyo Pilato ne Bezwitjaba ne bathu be Iziraela mu nzi iwoyu bakashangana kulangana ngekwe Nlanda wenyu wakayengemala Jesu iye wamakashalula.

²⁸Bakashinga tjakabe tjabigwa kale nge simba nenge kuda kwenyu kuti tjowoshingikala.

²⁹Ngwenu She, bonani kutjisa kwabo, ngono muyite kuti balanda benyu batubule kuleba dama lenyu nge kusimamoyo kukulu.

³⁰Tambunudzani luboko gwenyu kupodza ne kuthama zwilakidzo ne matjenamiso nge zina le nlanda wenyu wakayengemala iye Jesu.”

³¹Shule kwe batembezela, pathu pabakabe bakakubunganilapo pakazunguzika. Ngono bose bakazhala Meya yakayengemala bakaleba dama le Ndzimu nge kusimamoyo.

³²Bagalimoyo bose bakabe bana moyo ng'ompela ne nkumbulo ng'ompela. Akuna wakabe eti tjithu tjaanatjo nge tjitje, koga bakabe bekobana tjimwe ne tjimwe tjabanatjo.

³³Ngono, nge simba gulu batumwa bakadwilila mbeli bepa butendeki ngekwe kumuka kwa She Jesu, ngono ngoni hwulu dzinodwa ku Ndzimu dzakabe dzili mubali.

³⁴Kwakabe kusina nshayi pakati kwabo. Ibabo bakabe bana minda kene ng'umba bakabe betengesa, bezhisa mari edwa mu kutengesa

³⁵beayisa ku batumwa, ngono ekokobanyiwa mmwe ne mmwe kulizana nge kusheta kukwe.

³⁶Josefa, wakabe ali Nlevi we Sipuro, iye batumwa wabakadana beti Bhanabhasi, kunodwa kuti “Nkololo we Gulumbidzo,”

³⁷wakatengesa nnda wakabe uli uwe, ngono kazhisa mari kaayisa ku batumwa.