Read Kalanga Mishingo 6 Bible Online

Mishingo 6 - Kalanga bible

Mishingo 6

¹Mu mazhuba iyawo badiyiwa ba Jesu bakabe bewanda, Bajuta banoleba Tjigiriki bakanenela ibabo banoleba Tjihebheru, ngobe tjilikadzi idzedzo dzakabe dzishayigwa hanya mu makobe e zhuba ne zhuba.

²Ndizo batumwa ba Jesu bali gumi lina babili bakakubunganya badiyiwa bose pathu pang'ompela bakati, “Akuzolulwama kuti tiletje kusumikila dama le Ndzimu kuti ndizo tishinge nshingo wekukoba zwinoshetiwa nge tjilikadzi.

³Zwikamu, shalulani pakati kwenyu balume bali kutendeka banozibgwa bakatambunuka bali zhele Meya yakayengemala ne butjenjedu, batingapa nshingo iwoyu.

⁴Koga iswi towozwimisila nshingo we kutembezela ne kuyendisa dama.”

⁵Tjabakaleba tjakashathisa mbunga wose. Bakashalula Sitifani, nlume wakabe ali zhele kugalamoyo ne Meya yakayengemala. Bakashalula na Filipo na Purokoro na Nikanori na Timoni na Pamenasi na Nikolasi unodwa ku Antiyoki wakabe ashandukila mu bugalimoyo gwe Tjijuta.

⁶Bakayisa balume ibabo ku batumwa ba Jesu, bakatembezela bakababiga maboko.

⁷Ndizo dama le Ndzimu likaandama. Badiyiwa bakawanda kwazo mu Jerusalema ngono bapirisiti banjinji bakashanduka bakagalamoyo muna Jesu.

⁸Sitifani, nlume wakabe ali zhele ngoni dze Ndzimu ne masimba, kashinga makaabadzo makulu ne zwilakidzo zwinotjenamisa pakati kwe bathu.

⁹Ipapo bamwe be bathu be Ng'umba ye mitembezelo ye Balume bakasununguka (sekwa yakabe idang'wa) ne Bajuta be Sirene ne be Alekizanda, bose ne Bajuta be mituthu ye Silisiya ne Ezhiya bakatangisa kukakabadzana na Sitifani.

¹⁰Koga bakabe basingatubule kumidzana ne butjenjedu kene Meya yaakabe elebeleka ndiyo.

¹¹Ipapo nge kwakasumbikala bakakulumbidza bamwe bathu kuti bati, “Tahwa eleba matama anotuka Mushe ne anotuka Ndzimu.”

¹²Ndizo bakadzonga bathu ne batungamili babo kose ne badiyi be nlayo. Bakabhata Sitifani bakanzhisa mbeli kwe lubazhe.

¹³Bakazhisa batendeki be manyepkhwa bakapa butendeki beti, “Nlume iwoyu aatotongo misa kuleba kusakalulwama ngekwe pathu ipapa pakayengemala nenge nlayo.

¹⁴Takahwa eti Jesu iwoyu we Nazareta unowokolomodza bugalo igogu kakale kashandula mipanga Mushe yaakatipa.”

¹⁵Bose bakabe bali gele mu lubazhe bakalingisisa Sitifani, ngono bakabona buso gugwe gunga buso gwe ntumwa we kudzimu.