Read Kalanga Mishingo 7 Bible Online

Mishingo 7 - Kalanga bible

Mishingo 7

¹Ntungamili we bapirisiti kabhuzwa Sitifani kati, “Apa zwithu izwezwi malebeswa kene?”

²Sitifani kadabila kati, “Zwikamu na botate, mundihwilile! Ndzimu we gudzo wakaboneka kuna bobatategulu bedu Abhurahama batjiku Mesopotamiya, basathu bakanogala ku Harani,

³ngono Ndzimu ukabadwa ukati, ‘Bhuda mu shango ya kanyi kwenyu ne muna bakanyi kwenyu, ngono uyende ku shango yandinowokulakidza imi.’

⁴“Ndizo bakabhuda mu shango ya kanyi kwabo ye ba Kalideya bakanogala ku Harani. Shule kwe lufu gwa tate ba Abhurahama Ndzimu wakabadusa ikoko ukabazhisa mu shango iyeyi yamugele muili.

⁵Ndzimu ipapo auzopa Abhurahama pamwe payo se pape ndodwa ne paangabiga gumbopo, koga Ndzimu wakagadzabgwe kumpa iyo ne kuti inowobe iye ne bana babe. Nenguba Abhurahama akabe asina mwana.

⁶Ndzimu tjawakaleba kunli etji, ‘Ludzi gugo gowogala mu shango ye bamwe, kwabanowobe balanda, ngono banowobhakhwa zwakabipa makole ali mazana manna.

⁷Koga ndowosumikilisa itjaba itjetjo tjabanowoshingila, ngono shule banowobhuda mu shango iyeyo, ngono banowondinamata mu bugalo igogu.’

⁸Ipapo Ndzimu ukapa Abhurahama tjidumano tje kuthumbigwa. Abhurahama kazwala Isaki, ngono kanthumbila nge zhuba le buzhanakadzi shule kwe azwagwa. Isaki kazwala Jakubo, Jakubo kazwala bobatategulu bedu bali gumi lina babili.

⁹“Bobatategulu bakathamila fupa nnung'una wabo Josefa ngono bakantengesa kube nlanda mu Egipiti. Koga Ndzimu wakabe unaye.

¹⁰Wakansunungula mu tshiyilo dzidze dzose. Ndzimu wakathama kuti adiwe ndi Faro, ukampa butjenjedu mu mesho awe. Ndizo Faro Mambo we Egipiti kanthama nlauli we Egipiti newe nsha uwe wose.

¹¹Ipapo kukabe ne bhamba mu Egipiti yose ne mu Kanana lakazhisa kudziyila kukulu. Bobatategulu bedu bakasheta zojiwa.

¹²Jakubo kati ehwa kuti kuna mathunde ku Egipiti, katuma bobatategulu bedu kutanga.

¹³Ngono gwe bubili Josefa kazwizibisa bakulu babe, ndizo Faro kaziba ngekwe nsha wa kanyi kwa Josefa.

¹⁴Ipapo Josefa kadana tate babe Jakubo, kose ne nsha wose, bathu bali makumi ali kutendeka ana bashanu, kuti bazhe ku Egipiti.

¹⁵Ipapo Jakubo kayenda ku Egipiti, iko kwaakafila na bobatategulu bedu.

¹⁶Mibili yabo yakasengegwa ku Shekemu, kwayakabiganyiwa mu ikumbu tjakatengwa ndi Abhurahama nge themba ye mari e siliva mu bana ba Hamori mu Shekemu.

¹⁷“Kukati tjibaka tjakagadziwabgwe Abhurahama nge Ndzimu tjabe pejo, palo ye bathu bedu ikakula bakawanda mu Egipiti.

¹⁸Ngono kukabepo mambo mu Egipiti usingazibe tjimwe ngekwa Josefa.

¹⁹Katjebela bobatategulu bedu, ngono kabadziyidza, ebakombeledza kuti balashe shabana dzabo, kuti ndizo dzife.

²⁰Nditjo tjibaka tjakazwagwa Mushe ali mwana wakanaka mbeli kwe Ndzimu. Wakalelegwa mu nzi wa tate babe mimwedzi ili mitatu,

²¹ngono kati adusiwa mu nzi uwe, nkololokadzi wa Faro kantola kanlela se mwana uwe.

²²Ngono Mushe kadiyiwa butjenjedu gose gwe Baegipiti, ngono kabe akasima mu ndebeleko ne mu mishingo.

²³“Kati ana makole ali makumi manna, kakumbula kukumba bakanyi kukwe, bakololo Baiziraela.

²⁴Wakati ebona mmwe wa kanyi kukwe edziyidziwa kamila nlume iwoyo unotshambilidziwa ngono kambuzuludzila nge kubulaya N'egipiti.

²⁵Wakabe ekumbula kuti bathu ba kanyi kukwe banowohwisisa kuti Ndzimu wakabe uwonshingisa kubasunungula, koga ibo bakasihwisise.

²⁶Tjimuka kawana Baiziraela babili begwa, ngono kagwisa kubagadzanya. Kati ku bali, ‘Balume mu bana be nthu ini muthamilana bubi?’

²⁷Koga nlume iwoyu wakabe edziyidza mmwe katshindikila Mushe ntome. Kabhuzwa eti, ‘Ndiani wakakuthama nlauli ne nsumikilisi mutili kene?’

²⁸‘Unoshaka kundibulaya sekwa wakabulaya N'egipiti madekwe?’

²⁹Mushe kati ehwa ikoku, katizha mu Egipiti kayenda kanogala mu shango ye Midiya. Kabe ne bakololo babili ikoko.

³⁰“Shule kwe makole ali makumi manna, ntumwa we kudzimu kaboneka kuna Mushe mu tjilambanyika tje Dombo le Sinai mu nthuto we moto mu denjana.

³¹Mushe katjenamisiwa nge tjaakabona, ngono kasedzela pejo ne denjana kuti abone zubuyanana. Koga kahwa hwi la She liti,

³²‘Ndimi Ndzimu wa bobatategulu babo, Ndzimu wa Abhurahama, na Isaki na Jakubo.’ Mushe katetema ngotja, ngono kasilinge.

³³She bakati kunli, ‘Ambula khwebana dzidzo, ngobe pathu paumile pathu pakayengemala.

³⁴Ndabona kudziyidziwa kwe bathu bangu mu Egipiti. Ndahwa kulila kwabo, ndizo ndadeluka kuwobasunungula. Izha ngwenu; ndowokutuma ku Egipiti.’

³⁵“Mushe iwoyu ndiye zwe wabakalamba beti, ‘Ndiani wakakuthama nlauli ne nsumikilisi mutili kene?’ Ndzimu wakantuma kunolaula bathu ne kubasunungula nge bhatsho ye ntumwa we kudzimu iwoyu wakaboneka kunli mu denjana lakabe lithuta moto.

³⁶Wakatungamilila bathu kubhuda mu Egipiti athama matjenamiso ne zwilakidzo mu Egipiti ne ku Gungwa Shaba ne mu tjilambanyika makole ali makumi manna.

³⁷Mushe ndiye wakati ku bathu be Iziraela, ‘Ndzimu wenyu unowomuzhisila nlebesambeli, koga sekwa wakandizhisa, ngono unowodwa mu ludzi gwenyu.’

³⁸Ndiye wakabe ana gubungano mu tjilambanyika, ndiye wakabe ali mile pakati kwa bobatategulu bedu ne ntumwa we kudzimu, iwoyu wakalebeleka naye ali pezhugwi kwe Dombo le Sinai ngono Mushe kaamutjila matama e Ndzimu anotjila kutipa iwo.

³⁹“Koga bobatategulu bedu bakalamba kunhwa, bakansundila ntome, ngono bakayemula kubgwilila ku Egipiti.

⁴⁰Ndizo bakati kuna Aroni, ‘Utithamile midzimu inowotitungamila. Atitoziba kuti kwashingikalani kuna Mushe, iye wakatidusa mu Egipiti.’

⁴¹Nditjo tjibaka tjabakathama ndzimu we ifano tje phulu, bakatjipa zwipo ngono bakabe ne nzano unokudza itjo tjabathama ibo.

⁴²Ndizo Ndzimu ukabafupatila, ngono ukabayisa mu kunamata nyenyedzi dze kudzimu, sekwa kwakakwagwa mu hwalo dze balebesambeli kuyi, “ ‘Ng'umba ye Iziraela. Apa makandipa zwibhayilo zwe phuka dzakabulawa nenge zwipo makole ali makumi manna mu tjilambanyika kene?

⁴³Makasenga tente ya Moleki, ne nyenyedzi ye ndzimu wenyu Refani, zwifano zwamakathama kuzwinamata. Ndizo wali ndowomudusa amuyisa mbeli kwe Bhabhiloni.’

⁴⁴“Bobatategulu bedu bakabe bana tente ye butendeki mu tjilambanyika. Yakabe yakathamiwa sekwakabe kwalebgwa nge wakabudza Mushe kuti ithamiwe tjini.

⁴⁵Bobatategulu bedu bakati bakazha nayo bana Joshuwa pabakatolela tjaba shango, idzo Ndzimu dzawakatata mbeli kwa botate bedu. Ngono kwakagala kwakajalo kuswikila misi ya Dafite,

⁴⁶iye wakaamutjigwa nge Ndzimu, ngono kakumbila Ndzimu kun'dumila kubakila Ndzimu wa Jakubo bugalo.

⁴⁷Koga Solomoni ndiye wakabakila Ndzimu ng'umba.

⁴⁸“Ndzimu upezhugwi zhugwi autogala mu ng'umba dzakabakwa nge bathu, se kunoleba nlebesambeli eti,

⁴⁹“ ‘She bakati, kudzimu tjigalo tjangu tje bushe, shango tjigalo tje makumbo angu. I ng'umba yakatini yaungandibakila kene? Ndiapi magalo andinganyaluluka muali kene?

⁵⁰Apa andizothama zwithu izwezwi zose nge luboko gwangu kene?’

⁵¹“Bathu ndimwi bana mitshibha yakawomelela, bana mimoyo mikukutu ne zebe dzisingashako hwa lebeswa. Molamba Meya yakayengemala misi yose, tjakathamwa ndi bobatategulu benyu namwibo motjithama.

⁵²Apa wakatongo bepo nlebesambeli bobatategulu benyu wabasakadziyidza kene? Bakabulaya na ibabo bakalebelambeli nge kuzha kwa iye Wakalulwama, iye wamakati ngwenu mukawonga mukambulaya.

⁵³Imwi makaamutjila nlayo wakazhisiwa nge batumwa be kudzimu, koga mukasiulondolodze!”

⁵⁴Bakati behwa ikoku bakan'gwadzilamoyo kwazo.

⁵⁵Koga Sitifani ali zhele Meya yakayengemala, kalinga kudzimu kabona tjedza tje Ndzimu na Jesu ali mile ku luboko gwe luji gwe Ndzimu.

⁵⁶Kati, “Bonani! Ndobona kudzimu kwakazhuka ne Nkololo we Nthu ali mile ku luboko luji gwe Ndzimu!”

⁵⁷Ngono bakamimila bakazwina zebe dzabo ngono bakalabukila kunli bakan'wila bose.

⁵⁸Bakankwebela kuzhe kwe nzi, ngono bakankikithidza nge mabgwe. Batendeki bakabiga zwiambalo zwabo pa makumbo e nzhuzha wakabe eyi Saulo.

⁵⁹Bakatibekikithidza Sitifani ngono iye katembezela kati, “She Jesu, amutjilani meya yangu!”

⁶⁰Kathigama pasi kamilidza hwi kati “She! Musibabone nlandu we jinyo ileli!” Wakati aleba ikoku kafa.