Read Kalanga Mishingo 8 Bible Online

Mishingo 8 - Kalanga bible

Mishingo 8

¹Ngono Saulo kadumila kubulawa kwa Sitifani. Mu zhuba ilelo gubungano limu Jerusalema likatangisa kube ne kudziyidziwa kwakabipa. Bose bakabe bepalala betizhila ku mituthu ye Judiya ne Samariya kuzhe kwe batumwa ba Jesu.

²Balume banotja Ndzimu, bakabiganya Sitifani, bakanlilila nge tjililo tjikulu.

³Koga Saulo kapaladza gubungano, engina ng'umba ne ng'umba ekwebela kuzhe bagalimoyo, balume kose ne bakadzi ebalonga mu ng'umba ye busungwa.

⁴Bagalimoyo ibabo bakapalala bakayenda kumwe ne kumwe, besumikila dama.

⁵Filipo kayenda ku nzi nkulu Samariya, ngono kasumikila ngekwa Mesiya ku bali.

⁶Mibunga ikahwilila tjakabe tjilebgwa ndi Filipo nge moyo nng'ompela nenge njele, benhwilila bebona zwilakidzo zwaakabe eshinga.

⁷Meya mibi yakabe ibhuda mu bathu banjinji imimila ne banjinji bakalobgwa nge gulukadzi ne zwilema bakapodziwa.

⁸Ndizo kwakabe ne kushatha kukulu mu nzi iwoyo.

⁹Kwakabe kuna nlume unodang'wa Simoni wakabe abe ne tjibaka ethama masalamusi mu nzi ngono akadziyanya itjaba tje Samariya ezwikudza eti iye nge kukwe mmwe nkulu kulu.

¹⁰Bose bakabe benhwilila kudwa mu ntukununu kunoti mu nkulu tjose beti, “Nlume iwoyu ndiye masimba e Ndzimu anodang'wa kuyi masimba makulu.”

¹¹Bakabe benhwilila, ngobe kwakabe kwabe tjibaka ebadziyanya nge masalamusi awe.

¹²Koga bakati begalamoyo Filipo esumikila ndebo mbuya ye bushe gwe Ndzimu nenge zina la Jesu Kirisiti, bakadubikwa, bose balume ne bakadzi.

¹³Simoni na iyebo kagalamoyo, ngono shule kwe adubikwa, kabhatana na Filipo. Ngono kati ebona zwilakidzo ne makaabadzo makulu eshingwa katjenama.

¹⁴Batumwa ba Jesu mu Jerusalema bakati behwa kuti bathu mu Samariya bakaamutjila dama le Ndzimu, bakatuma Pita na Johani ku bali.

¹⁵Bakati beswika, bakabatembezelela kuti baamutjile Meya yakayengemala.

¹⁶Ngobe Meya yakayengemala yakabe isathu ikadelukila mubali, koga bakabe badubikiwa nge zina la She Jesu koga.

¹⁷Ipapo Pita na Johani bakababiga maboko, ngono bakaamutjila Meya yakayengemala.

¹⁸Simoni kati ebona kuti Meya yapiwa bagalimoyo ha batumwa ba Jesu bebabiga maboko, kapa Pita na Johani mari,

¹⁹eti ku bali, “Mundipebo simba ileli, kuti mmwe ne mmwe wandinobiga maboko aamutjile Meya yakayengemala.”

²⁰Koga Pita kan'dabila kati, “Mari awo ngaalobe nawe, ngobe wakumbula kuti tjipo tje Ndzimu tjingatengwa nge mari!

²¹Auna bugalo kene gobe muna ikoku, ngobe moyo uwo auzolulwama mu mesho e Ndzimu.

²²Shanduka mu bubi gugo igogu, utembezele She, kuti, ha kutubuka bakuzwiibhatigwe mazwimisilo e moyo uwo.

²³Ngobe ndobona kuti uzhele ndandala kakale u nsungwa we jinyo.”

²⁴Simoni kati kuna Pita na Johani, “Ndomukumbila munditembezelele kuna She, kuti kusibe ne tjimwe tje zwithu izwezwi zwamaleba tjinowondishingikalila.”

²⁵Shule kwe bapa butendeki, basumikila dama la She, Pita na Johani bakabgwilila ku Jerusalema, besumikila ndebo mbuya mu mizi minjinji ye Basamariya.

²⁶Ntumwa wa She kati kuna Filipo, “Milika uyende ku ndzibo we ku burwa ku zila inodeluka idwa ku Jerusalema iyenda ku Gaza.” I zila inopalama tjilambanyika.

²⁷Ndizo Filipo kamilika kayenda, kashangana ne nlume we ngomwa we ku Itopiya wakabe ali nkadzasha nkulu ali mbhati we fumwa ya Kandake shekadzi we Itopiya, wakabe abe azha ku Jerusalema kunamata Ndzimu.

²⁸Ndizo wakabe wobgwilila kanyi akatatha koloyi iye ebala lukwalo gwe nlebesambeli Isaya.

²⁹Meya ikati kuna Filipo, “Yenda ku koloyi iyeyije uyende nayo.”

³⁰Filipo kalabukilako, ngono kanhwa ebala mu lukwalo gwe nlebesambeli Isaya. Kambhuzwa kati, “Apa unohwisisa tjaunobala kene?”

³¹Nlandalume kashandula eti, “Ndingahwisisa tjini kusina unonditjenesela kene?” Ndizo kakumbila kuti Filipo atathe agale naye mu koloyi.

³²Paakabe ebala mu lukwalo ndiapa, “Se pkhwizi inokwebegwa ku mbulayi, kene pkhwizana inyelele mbeli kwe nteseli wayo, ndizo aazozhula nlomo.

³³Kalengudziwa kalambigwa ndulamo. Ndiani kene ungaleba ngekwe ludzi gugwe? Ngoti butjilo gugwe gwapela mu shango.”

³⁴Nlanda kabhuzwa Filipo kati, “Mundibudze kuti, nlebesambeli unoleba ikoku ngekwa ani? Unoleba nge kukwe kene ngekwe mmwe upoga?”

³⁵Ipapo Filipo kadwa nlomo, ngono katangisa nge lukwalo igogu, kambudza ndebo mbuya ngekwa Jesu.

³⁶Bakati beyenda mu zila, bakaswika pathu pakabe pana vula, ngono nlanda kati, “Bona, eyi vula. Ini tjingandidzibila kudubikwa kene?”

³⁷[Filipo kati kunli, “Ungadubikwa ha ugalamoyo nge moyo uwo wose.” Kadabila eti, “Ndogalamoyo, kuti Jesu Kirisiti Nkololo we Ndzimu.”]

³⁸Nlanda kamisa koloyi, ngono bose Filipo ne nlanda bakangina mu vula, ngono Filipo kan'dubika.

³⁹Bakati bebhuda mu vula, Meya ya She ikatola Filipo. Nlanda aazotjambona kakale, koga kadwilila mu zila iye akashatha kwazo.

⁴⁰Filipo kaboneka mu Azotu; ngono kayendila mbeli esumikila ndebo mbuya ku mizi yose, kudzina eswika ku Sizariya.