Read Kalanga Mishingo 9 Bible Online

Mishingo 9 - Kalanga bible

Mishingo 9

¹Mu tjibaka itjetji Saulo wakabe atjizhelilane eshaka bulaya badiyiwa ba She. Kayenda ku Ntungamili we bapirisiti ngono

²kankumbila hwalo dzinoyenda ku ng'umba dze mitembezelo ku Damasiko kuti ha angawana bamwe ikoko be Zila iyeyo bali balume kene bakadzi abatole abayise ku Jerusalema bali basungwa.

³Kati ali mu gwendo gugwe abe pejo ne Damasiko, tjinyolotjo tjedza tjinodwa kudzimu tjikapenya kumpoteleka.

⁴Kawila pasi, ngono kahwa hwi liti kunli, “Saulo, Saulo, apa unondidziyidzilani kene?”

⁵Iye kati, “Ndimwi ani She?” Hwi likati, “Ndimi Jesu, iye waunodziyidza.

⁶Ngwenu, milika ungine mu nzi, ngono unowobudziwa kuti uthameni.”

⁷Balume bakabe beyenda na Saulo bakama ipapo basingalebeleke; behwa hwi koga basina wabanobona.

⁸Saulo kamuka pasi, koga kati ezhula mesho awe, kasibone tjimwe. Ndizo bakankwebela mu Damasiko nge luboko.

⁹Wakabe bhofu mazhuba matatu, ngono kasije kene kuli kung'wa tjimwe.

¹⁰Mu Damasiko kwakabe kuna n'diyiwa unodang'wa kuyi Ananiyasi. She bakan'dana mu mbono beti, “Ananiyasi!” Iye kadabila eti, “Ndipano She.”

¹¹She kambudza kati, “Milika uyende ku ng'umba ya Judasi mu zila inodang'wa kuyi, Yakatambunuka ubhuzwe ngekwe nlume unodwa ku Taso unoyi Saulo, ngobe unotembezela.

¹²Wabona mu mbono nlume unoyi Ananiyasi ezha embiga maboko kumpofunula.”

¹³Ananiyasi kadabila kati, “She, ndakahwa nge bathu banjinji ngekwe nlume iwoyu nenge kuti wakathama bubi gungapani ku bayengemali benyu mu Jerusalema.

¹⁴Wakazha muno nge simba linodwa ku bapirisiti bakulu kusunga bose banodana zina lenyu.”

¹⁵Koga She bakati kuna Ananiyasi, “Yenda! Nlume iwoyu tjija tjangu tjandakashalula kuyisa zina langu kuna Bezwitjaba na bomambo babo kose neku bana be Iziraela.

¹⁶Ndowonlakidza kuti wakafanila dziyila kungapani ngekwe zina langu.”

¹⁷Ipapo Ananiyasi kayenda ku ng'umba iyeyo, ngono kangina muili. Kati ebiga Saulo maboko etembezelela kati, “Ikamu tjangu Saulo, She Jesu iye wakaboneka ku kuli mu zila yawakazha ndiyo, wandituma kuti ubone kakale ne kuti uzhale Meya yakayengemala.”

¹⁸Tjinyolotjo zwithu zwinonga makwapa zwikawa mu mesho a Saulo ngono kabona kakale. Kamilika, ngono kadubikiwa,

¹⁹ngono kati aja, kazhigwa kakale nge matatabuko awe. Saulo wakagala mazhuba ne bagalimoyo mu Damasiko.

²⁰Tjinyolotjo katangisa kusumikila ngekwa Jesu mu ng'umba ye mitembezelo eti, “Jesu Nkololo we Ndzimu.”

²¹Ngono bose bakanhwa bakatjenama, ngono bakabhuzwa beti, “Apa ate iye nlume wakabe ebulaya banodana zina la Jesu mu Jerusalema kene? Kakale aazozhila kuti abasunge abayise ku bapirisiti bakulu kene?”

²²Koga Saulo kasimila mbeli, ngono kashanganya Bajuta banogala mu Damasiko misholo nge kubalakidza kuti Jesu ndiye Mesiya.

²³Kwakati shule kwe mazhuba manjinji Bajuta bakalangana kumbulaya,

²⁴koga kaziba ngekwe nlangano wabo. Bakabe belinda nkoba we nzi siku ne sikati kuti bambulaye.

²⁵Koga badiyiwa babe bakantola busiku bakan'delusila kuzhe bentjuludza guma ali mu itundu.

²⁶Wakati eswika mu Jerusalema kagwisa kuzwishanganya ne badiyiwa, koga bose bakabe bentja basingagalemoyo kuti n'diyiwa.

²⁷Koga Bhanabhasi kantola, ngono kanzhisa ku batumwa. Kababudza sekwa Saulo akabona She mu gwendo gugwe, ngono She kalebeleka naye, kababudza sekwa Saulo akasumikila ana tjilopa mu Damasiko nge zina la Jesu.

²⁸Ndizo Saulo kagala nabo kayenda akasununguka mu Jerusalema elebeleka akasimisamoyo nge zina la Jesu.

²⁹Wakabe esumikila ana tjilopa enyanyayidzana ne Bajuta banoleba Tjigiriki, koga ibo bakagwisa kumbulaya.

³⁰Kukati zwikamu zwaziba ngekwa ikoku zwikantolela ku Sizariya ngono zwikantumila ku Taso.

³¹Ipapo gubungano lose mu Judiya ne limu Galili ne limu Samariya likabe ne mbakiso, likasimisiwa, likanyaladziwa nge Meya yakayengemala, likakula litjilila mu kutja She.

³²Pita kati etendeleka nge shango kayenda kunokumbabo bayengemali ku Lida.

³³Ikoko kawana nlume unoyi Aneasi wakabe atjibe nge makole ali zhanakadzi ali lele akalobgwa nge gulukadzi.

³⁴Pita kati kunli, “Aneasi, Jesu Kirisiti unokupodza. Milika uwalule.” Tjinyolotjo Eneasi kamilika.

³⁵Bose bagali be Lida ne Sharoni bakambona ndizo bakashandukila kuna She.

³⁶Mu Jopa kwakabe kuna n'diyiwa unodang'wa Tabhita. Zina lile mu Tjigiriki loyi Dokasi. Iye wakabe misi yose ethama mishingo mibuya ebhatsha bashayi.

³⁷Mazhuba iyawo kagwala ngono kafa, ngono bakati banngudza bakanladzika mu ng'umba ipezhugwi kwe imwe.

³⁸Nzi we Lida wakabe uli pejo ne Jopa. Ndizo badiyiwa bakati behwa kuti Pita umu Lida bakatuma balume babili kunli ngono bakankumbila beti, “Izha ku tili ngwenu usinonoke.”

³⁹Pita kamilika kayenda nabo, ngono kati eswika bakantathisila pezhugwi ku ng'umba iyeyo. Tjilikadzi dzose dzikama kumpoteleka dzilila dzinlakidza hazu ne zwiambalo zwimwe Dokasi zwaakabe athama atji nabo.

⁴⁰Pita kabadusila bose kuzhe kwe ng'umba; ipapo kathigama ngono katembezela, ngono kati etendebukila ku itumbu kati, “Tabhita, milika.” Tabhita kazhula mesho awe, ngono kati ebona Pita kamuka, ngono kagala.

⁴¹Pita kambhata nge luboko, ngono kambatsha kuma nge makumbo. Ipapo kadana bayengemali ne tjilikadzi, ngono kabapa iye etjila.

⁴²Oku kwakazibgwa mu Jopa yose, ngono bathu banjinji bakagalamoyo muna She.

⁴³Pita kagala mu Jopa mazhuba manjinji, egala na Simoni nsuki we makukuta.