Read Kalanga Baroma 1 Bible Online

Baroma 1 - Kalanga bible

Baroma 1

¹Ndimi Paulo, nlanda wa Kirisiti Jesu ndakadang'wa kube ntumwa ndikashaluligwa ndebo mbuya ye Ndzimu,

²yawakagadzabgwe ntolo nge balebesambeli ne mu hwalo dzakayengemala,

³ili ndebo mbuya ngekwe Nkololo wawo, wakazwagwa ali tjizekugwana tja Dafite.

⁴Wakalakidziwa kuti nkololo we Ndzimu nge Meya yakayengemala ha emusiwa nge simba mu bafi, iye Jesu Kirisiti She wedu,

⁵watakaamutjila ngoni ne butumwa ndiye, kuti ndizo Bezwitjaba bose baamutjile bugalimoyo ngekwe zina lile,

⁶kudwiwa namwibo banodang'wa kuti mube ba Jesu Kirisiti.

⁷Ndokwalila bose Ndzimu bawunoda mu nzi we Roma bakadang'wa kube bayengemali nditi: Ngoni ne kunyalala kunodwa ku Ndzimu Tate bedu na She Jesu Kirisiti kube namwi.

⁸Tjekutanga ndoboka Ndzimu wangu nge zina la Jesu Kirisiti nge kwenyu mose, ngobe kugalamoyo kwenyu kolebgwa shango yose.

⁹Ngobe Ndzimu wandinoshingila nge moyo wangu wose ndisumikila ndebo mbuya ye Nkololo wawo, ntendeki wangu unoziba sekwa ndinomukumbula

¹⁰misi yose ha nditembezela, ndikumbila kuti nge imwe zila ngeda kwe Ndzimu nditubule kuzha kumuli.

¹¹Ngobe ndoyemula kumubona, kuti ndimukobele tjipo tje tjimeya kumusimisa,

¹²kuti ndizo tikulumbidzane nge kugalamoyo kwedu, imi nge kwenyu, namwi nge kwangu.

¹³Ndoshaka kuti muzibe etji zwikamu, ndikanjinji* nditi ndozha kumuli koga kuna zwinomanikanya kuti ndivune zwizwalo, mu muli ne muna bose Bezwitjaba.

¹⁴Ndakasungika kusumikila ndebo mbuya, ku Bagiriki ne kubamwe basi Bagiriki, kuna bakatjenjela ne kuna basakatjenjela.

¹⁵Ndizo, ndina nyota ye kusumikila ndebo mbuya kumulibo imwi baku Roma.

¹⁶Anditobhatisiwa shoni nge ndebo mbuya, ngobe i simba le Ndzimu kutjidza mmwe ne mmwe unogalamoyo, ku Bajuta kutanga kunoti ne kuna Bezwitjaba.

¹⁷Ngobe mu ndebo iyeyi ndulamo ye Ndzimu inozumbunugwa nge kugalamoyo, sekwa kwakakwagwa kuyi, “Iye wakalulwamisiwa nge kugalamoyo unowotjila.”

¹⁸Bushongola gwe Ndzimu gozumbunugwa gudwa kudzimu gudelukila bose babi nenge mbipo ye bathu banodzibila malebeswa nge mbipo yabo.

¹⁹Ngobe tjingazibgwa ngekwe Ndzimu tjipatjena ku bali, ngoti Ndzimu wakabalakidza itjo.

²⁰Tjinga Ndzimu kwawakabumba shango, mbumbiko yawo isingaboneke ne simba lawo lisingapele ne budzimu gwawo zose izwezwi zwakatjeneseka zubuyanana mu zwithu zwakabumbiwa. Ndizo bathu abana tjabangabhatila patjili.

²¹Ngoti nenguba bakabe beziba Ndzimu abazoukudza se Ndzimu kene kuli kuuboka, koga zose zwabanoalakana azwina nshingo, bakafa meya, mikumbulo yabo izhalima.

²²Nenguba bezwidwa beti bakatjenjela, koga bazwilengwe,

²³mu bumo gwekuti bakudze Ndzimu usingalobe, banokudza zwifano zwakathamiwa se nthu unoloba kene se nyuni kene se phuka kene zwitjili zwinosoba na pasi.

²⁴Ndizo Ndzimu wakaletja bathu ibabo kushinga zwithu zose zwe shambgwa zwinoyemugwa nge mimoyo yabo, ngono banothamana zwinobhatisa shoni nge mibili yabo.

²⁵Ngoti banotenganya malebeswa ngekwe Ndzimu nge manyepkhwa, bakanamata kakale bakashingila tjibumbiwa mu bumo gwe Mbumbi iye wakafanila kudziwa nge kusingapele! Ngakujalo.

²⁶Ngekwa ikoku, Ndzimu wakabaletjedzela mu njemulo dzabo dzinobhatisa shoni. Ne bakadzi babo bakashandulila yendiso yakawolobeleka ye kuwalilana kuna isakawolobeleka.

²⁷Ne balumebo bakaletja zila yakawolobeleka yekuwalilana ne bakadzi ngono bakawalilana tjekwabo. Balume banothama mishingo inobhatisa shoni ne bamwe balume. Ngekwa ikoku banoamutjila mbhayilo we shamu wakabafanila.

²⁸Ngono ngekuti abazowana kwakafanila kuti bazibe Ndzimu, wakabaletja bali mu mikumbulo yabo yakabola, kuti bashinge zwithu izwezo zwabasakafanila shinga.

²⁹Bazhele zila dzose dze bubi, ne kusalulwama ne bugovu ne bubi, bazhele fupa ne kubulaya ne kugwa ne kutjebela ne sudze. Bana bung'wa,

³⁰ngono banolebelana bubi, banobenga Ndzimu, bana masapa, banozwida, bezwikudza, banokumbula zila njinji dze kushinga bubi abatohwa bazwadzi babo.

³¹Abana mikumbulo kakale abatogalikabgwe, abatolakidza buthu kene kuhwila bamwe zogwadza.

³²Nenguba beziba nlayo we Ndzimu, kuti banothama zwakajali bakafanigwa nge lufu, abatothama izo koga, koga banolumbidza bamwe kuzwishingabo.