Read Kalanga Baroma 10 Bible Online

Baroma 10 - Kalanga bible

Baroma 10

¹Zwikamu, kuyemula kwe moyo wangu ne ntembezelo wangu ku Ndzimu hwuti Baiziraela batjidziwe.

²Ndopa butendeki ngekwabo kuti banoshingayilila Ndzimu, koga kushingayila kwabo akuna luzibo.

³Nge kushaya luzibo ngekwe ndulamo inodwa mu Ndzimu, ne kushaka kuzwithamila kwabo, abazozwipa mu ndulamo ye Ndzimu.

⁴Ngobe Kirisiti ndiye bhelelo le nlayo, kuti mmwe ne mmwe unakugalamoyo alulwamisiwe.

⁵Mushe wakakwala eti, “Iye unolondolodza ndulamo inolebgwa nge nlayo unowotjila ndiyo.”

⁶Koga ndulamo yakatemelela mu kugalamoyo ikati, “Usitongo zwibhuzwa mu moyo uti ndiani, unowotathila kudzimu?” Kodwa kuti kudelusila Kirisiti pasi.

⁷Kene “Ndiani unowodelukila mu gomba?” Kodwa kumusa Kirisiti mu bafi.

⁸Koga dama le Ndzimu likatini kene? “Dama lipejo nawe, limu nlomo ne mu moyo uwo.” Ndilo dama le kugalamoyo, latinosumikila.

⁹Ngekuti ha uleba nge nlomo uwo uti Jesu ndi She uduma mu moyo uwo kuti Ndzimu wakammusa mu bafi, unowotjidziwa.

¹⁰Ngekuti nthu unoduma nge moyo uwe, ndizo kalulwamisiwa, kaleba nge nlomo uwe, katjidziwa.

¹¹Hwalo dzoti, “Akuna iye unogalamoyo munli unowobhatisiwa shoni.”

¹²Akuna kuthubukana pakati kwe Njuta ne N'giriki, ngobe She iyezwe ndiye She wa bose, ngono unokombolela bose banon'dana.

¹³Ngekuti, “Mmwe ne mmwe unodana zina la She unowotjidziwa.”

¹⁴Koga bathu bangan'dana tjini iye wabasakagalamoyo? Ngono bangagalamoyo tjini muna wabasakahwa nge kukwe? Kakale banowohwa tjini kusina nsumikili.

¹⁵Ngono bathu banowosumikila tjini basatumwa? Sekwa kwakakwagwa kuyi “Kwakanaka seni ha basumikili be zhisa ndebo mbuya!”

¹⁶Koga ate bose bakaamutjila ndebo mbuya. Isaya wakati, “She, ndiani wakagalamoyo tjaakahwa naswi?”

¹⁷Ndizo wali, kugalamoyo kodwa muna tjawahwa, tjawahwa tjodwa mukusumikigwa kwa Kirisiti.

¹⁸Koga ndobhuzwa nditi: Apa abazohwa kene? Tjose bakahwa! “Mahwi e basumikili akazhala shango yose, matama abo kaswika ku phelelo dze shango.”

¹⁹Ndobhuzwa kakale nditi: Apa bathu be Iziraela abazohwisisa kene? Mushe kutanga wakati, “Ndowokuthama kuti uthamile fupa basi itjaba, kuti ndizo mube ne fupa nge itjaba tjisakatjenjela ndowokugwadzisamoyo.”

²⁰Ngono Isaya unoleba akasima eti, “Ndakawang'wa ndi ibabo bakabe basingandishake, ndakazwilakidza kuna ibabo bakabe basingabhuzwe nge kwangu.”

²¹Koga ngekwe Iziraela kati, “Zhuba lose ndakatjinga nge maboko angu, nditjingila bathu basingahwe kakale banonyanyayidza.”