Read Kalanga Baroma 11 Bible Online

Baroma 11 - Kalanga bible

Baroma 11

¹Ndobhuzwa ngono kuti, apa Ndzimu wakalamba bathu bawo kene? Ndodwa! Imi nge kwangu ndi N'iziraela, tjizekugwana tja Abhurahama ndili we nsha wa Bhenjamini.

²Ndzimu auzolamba bathu bawo, bawakaziba kuli kale. Apa amutoziba kuti Hwalo dzotini ngekwa Elija, se kwaanokumbila Ndzimu kuti ubone Iziraela nlandu?

³Kati, “She, Baiziraela bakabulaya balebesambeli benyu, bakapkhwanya zwibeso zwenyu zwe zwibhayilo, ndimi ndoga ndasala, ngono banoshaka ku ndibulaya.”

⁴Koga Ndzimu wakan'dabila uitini kene? Wakati, “Ndakazwibiganyidzila balume bali zwiwulu zwili kutendeka basakatongothigamila Bhaale.”

⁵Ndizo kwakajalo nangwenu, kuna malimbelimbe Ndzimu awakashalula nge ngoni dzawo.

⁶Koga ha akashalugwa kwakabigwa mu ngoni dzawo, kodwa kuti kushalula akuzotemelela mu mishingo, ha kwabe kwakajalo, ngoni dzawo dzingabe dzisitji ngoni.

⁷Ngono kee? Bathu be Iziraela bakakong'wa kuwana tjabakabe beshaka. Bashalugwa bakatjiwana, koga bakasala bose bakakukutala.

⁸Sekwa kwakakwagwa kuyi, “Ndzimu wakabapa meya ye wope, kuti mesho asibone ne zebe dzisihwe, kuswikila zhuba lino.”

⁹Ngono Dafite kati, “Dzene butjilo gwabo gungabe dati ne bhuzhu, ne tjinobakutha ne kulobgwa kwabo.

¹⁰Mesho abo ngaapofupadziwe, kuti ndizo basibone; bagogonyale nge kusingapele.”

¹¹Ndizo ndobhuzwa, apa bakakuthiwa, kuti ndizo bawe kene? Ndodwa! Koga ngotjinya kwabo, jidzo lakazha kuna Bezwitjaba, kuti ndizo Baiziraela babe ne fupa.

¹²Ngono ha kutjinya kwabo kufumisa shango, ne kukong'wa kwabo kufumisa Bezwitjaba. Kutjidziwa kwe Baiziraela kowopapha fumwa inopinda iyeyi kanjinji seni!

¹³Ngwenu ndolebeleka namwi Bezwitjaba. Se ndili ntumwa kuna Bezwitjaba, ndokudza nshingo wangu,

¹⁴kuti ndizo Bajuta, ibo be ludzi gwangu babe ne fupa, kuti ndizo bamwe babo batjidziwe.

¹⁵Ngobe ha kulambiwa kwabo kudwa kugadzanyiwa kwe shango, kuamutjigwa kwabo kowobeni ha isi kutjila kwe bafi koga?

¹⁶Ha ipemu tje tjiwunga tjidusiwa se tjipo tje kutanga, tjakayengemala, tjiwunga tjose tjobe tjakayengemala, ngono ha ndzi we nti wakayengemala ne thabi dzawo dzakayengemala.

¹⁷Koga ha thabi dzimwe dze ntoba wakadzwagwa dzakathubugwa, imwi lutabi gwe ntoba we shango mukamedzekiwa muuli, mu magalo abo kuti mube ne gobe mu nti we ntoba,

¹⁸musitongo zwikudza se munopinda thabi. Ha muzwikudza, mualakane kuti imwi ate imwi makabhata ndzi koga ndzi ndiwo wakabhata imwi.

¹⁹Koga mowoti, “Thabi dzakathubugwa kuti timedzekiwe.”

²⁰Ikoku malebeswa. Bakathubugwa nge kusagalamoyo kwabo, koga imwi musime nge kugalamoyo. Ndizo musizwikudze, koga mube ne kutja.

²¹Ha Ndzimu usakatjiba thabi dze wakadzwagwa, namwibo autowomutjiba.

²²Bonani nzhazho ne bushongola gwe Ndzimu. Una bushongola kuna ibabo bakawa, koga una nzhazho kumuli ha mudwilila mu nzhazho wawo. Koga kuzhe kwa ikoku, namwibo mowothubugwa.

²³Ngono ne bamwebo abasadwilila mu kusagalamoyo banowomedzekiwa kakale, ngobe Ndzimu una simba le kubamedzeka kakale.

²⁴Ngono ha imwi makathubugwa mu ntoba we shango nge mbumbiko, mube mu medzekiwa kusingayendidzane ne mbumbiko, mu ntoba wakadzwagwa, ngono kowobe kulelu kungapani kumedzeka kakale thabi idzedzi dzakathubugwa muna mayi badzo kene?

²⁵Kuti musizwipe butjenjedu gwa musinago, zwikamu, ndoshaka kuti muhwisise masazibgwe iyawa. Kukukutala kwakangina mu bamwe ba Iziraela, kuswikila Bezwitjaba betjidziwa nge buzhalo.

²⁶Ndizo Iziraela yose inowotjidziwa, sekwa kwakakwagwa kuyi, “Nsununguli unowodwa ku Ziyoni, unowodusa bubi gose mu ludzi gwa Jakubo.

²⁷Ngono etji nditjo tjinowobe tjidumano tjangu nabo, ha ndidusa zwibi zwabo.”

²⁸Nge kwe ndebo mbuya Baiziraela zwita zwe Ndzimu nge kwenyu, ngoshalugwa Baiziraela banodiwa ngekwa bobatategulu babo;

²⁹ngobe zwipo zwe Ndzimu ne kudana kwawo azwitoshanduka.

³⁰Sekwa makatongobe musingahwe Ndzimu, ngono ngwenu makahwigwa zogwadza nge kusahwa kwabo,

³¹ndizo naibo bakashaya kuhwa kuti se kwamakahwigwa zogwadza, na ibobo bahwigwe zogwadza.

³²Ndzimu wakathama bathu bose basungwa be kusahwa kwabo, kuti ndizo ubahwile ngoni bose.

³³Bathu bedu! Fumwa ye butjenjedu ne luzibo gwe Ndzimu zwikulu seni! Kusumikilisa kwawo akuna ungakutjenesa, ndiani ungalonda zila dzawo kene?

³⁴“Ndiani wakaziba nkumbulo wa She? Ndiani wakabe nkumbuludzi wabo?

³⁵Kene ndiani wakatongoupa tjipo kuti ekotjibuzigwa?”

³⁶Zwithu zose zwakabumbiwa ndiwo, zwithu zose zwiyapo ndiwo, kakale zwili zwawo. Ndzimu ngaukudziwe nge kusingapele kose! Ngakujalo.