Read Kalanga Baroma 12 Bible Online

Baroma 12 - Kalanga bible

Baroma 12

¹Ndizoke, zwikamu, ngekwe ngoni dze Ndzimu ndomukumbila kuti mupe Ndzimu mibili yenyu ili tjibhayilo tjinotjila, tjakayengemala tjinoamutjilika ku Ndzimu, kuli iko kunamata kwenyu kwe Tjimeya.

²Musizwifananye ne shango ino, koga shandugwani ngobumbiwa butshwa, ngobumbiwa butshwa kwe mikumbulo yenyu, kuti ndizo mulakidze tjingabe tjili kuda kwe Ndzimu ne tjakalulwama tjingaamutjilika kakale ne tjakapelela.

³Ngono nge ngoni dzandapiwa ndoti ku mmwe ne mmwe wenyu, asizwikumbule kupinda sekwa akafanila kuzwikumbula. Koga azwikumbule kulizana nge kugalamoyo kwawakapiwa nge Ndzimu.

⁴Koga se mu mbili nng'ompela tina ndungululo njinji ngono ndungululo idzedzi dzose dzina mishingo yakasiyana.

⁵Ndizo nenguba tili banjinji, ti mbili nng'ompela muna Kirisiti, koga mmwe ne mmwe i ndungululo ye mmwe.

⁶Setina zwipo zwakakasiyana kuyendidzana ne ngoni dzatakapiwa ngatizwishingeseni. Ha tjipo tje nthu ili kulebesambeli ngaakushingise kulizana nge kugalamoyo kukwe,

⁷ha kuli kushinga, ngaashinge; ha kuli kudiya, ngaadiye;

⁸ha kuli kukulumbidza bamwe, ngaakulumbidze; ha kuli kupa ngaape akasununguka; iye unobhatsha, ngaabhatshe akalonga meya; ha kuli mahwilozogwadza ngaakushinge nge kushatha.

⁹Ludo ngagube gwakwako. Bengani tjakabipa, mubhate makasimisa muna tjakalulwama.

¹⁰Danani nge ludo gwe zwikamu, pindanani mu kukudzana.

¹¹Shingani kwazo musibe simbe. Meya ngaimulonge nyota, shingayililani She.

¹²Shathani mu kugalabgwe kwenyu, ibeni ne moyonlefu mu kudziyidziwa, mutembezele misi yose.

¹³Ipani bagalimoyo zwabanosheta, muzwiwolobedze kuamutjila bezi mu mizi yenyu.

¹⁴Kombolelani banomudziyidza, mubakombolele musibalonge bhiso.

¹⁵Shathani ne bakashatha, lilani ne banolila.

¹⁶Gadzanani; musizwikudze, koga muzwishanganye ne be tjimo tjipasi mu butjilo, musitongo zwitola kuti makatjenjela moga.

¹⁷Musibgwilizile nge tjakabipa. Ibeni ne njele kushinga tjakafanila mu mesho e mmwe ne mmwe.

¹⁸Ha kutubuka muna sekwa munobona, tjilani nge kunyalala ne mmwe ne mmwe.

¹⁹Badiyiwa bangu musitongo bgwilizila, koga letjani bushongola gwe Ndzimu gushinge; ngobe kwakakwagwa kuyi, “Kubgwilizila nge kwangu, ndowobgwilizila, kojalo She.”

²⁰Kwakakwagwa muhwalo kuti, “Tjita tjitjo ha tjina zhala, utjipe zojiwa; ha tjina nyota, utjipe vula tjing'we; ngobe ngothama ikoku unowobe ubutitika masimbe anothuta mu nsholo uwe.”

²¹Musikuligwe nge bubi, koga kundani bubi nge ndulamo.