Read Kalanga Baroma 13 Bible Online

Baroma 13 - Kalanga bible

Baroma 13

¹Mmwe ne mmwe ngaazwiyise pasi kwe babusi, ngobe akuna bushe guyapo agusi gunodwa ku Ndzimu, bushe guyapo gwakabigwa nge Ndzimu.

²Ndizo iye unopandukila bushe gopandukila tjakalaugwa nge Ndzimu, ngono ibabo banothama sa ikoko banowozwizhisila kusumikilisiwa.

³Ngobe balauli abatotjisa kuna banoshinga ndulamo, koga banotjisa kuna banothama tjisakalulwama. Apa unoshaka kuti usitje unobusa kene? Ndizo thama tjakalulwama unowodumana nawe,

⁴ngobe balauli balanda be Ndzimu, kuti ndizo mululwamigwe. Koga ha ushinga tjakabipa, ipapo untje, ngobe aazosengela bukanu suli. Nlanda we Ndzimu unoshingikadza shamu ye Ndzimu kuna unoshinga mbipo.

⁵Ndizo ngekwa ikoku nthu wakafanila kuzwiyisa pasi kwe balauli kusi kuyitila shamu ye Ndzimu koga, ne kuyitila hana.

⁶Ndizo wali molipa lukhetho, ngobe babusi banoshingila Ndzimu abe shinga mishingo yabo nge buzhalo.

⁷Ndizo lipani bose bamunokolota, mulipe lukhetho kuna bakafanila gulipiwa, mulipe mari kuna bakafanila lipiwa, tetani bakafanila tetiwa mukudze bakafanila kudziwa.

⁸Musibe ne wamuna nlandu naye, koga danani, ngobe iye unoda mmwe walondolodza nlayo.

⁹Milayo inoti, “Usithame bupombgwe, usibulaye, usikwibe, usitjibe.” Milayo iyeyi ne mimwe yose, yakapetegwa mu nlayo nng'ompela unoti, “Ida mmwe nthu sekwa unozwida.”

¹⁰Ludo agutothamila mbakidzani mbipo ndizo wali, kuda hwulondolodza nlayo wose.

¹¹Kuzhe kwa ikoku moziba kuti tjibaka ndi tjipi, moziba kuti tjazha nge buzhalo kuti mumuke mu hwope dzenyu, ngobe jidzo lipejo naswi ngwenu kupinda patakatangisa kugalamoyo.

¹²Busiku gwapinda ntolo kwabe masikati. Ngatilashileni kutjena mishingo ye zhalima, ngono ngatiambaleni zwiambalo zwe ngwa zwe tjedza.

¹³Ngatizwibhateni zubuyanana se bathu banotjila mu masikati, kusina kusazwibhata kene kulaladza, kusina bupombgwe kene kusazwidziba, kusina ngwa kene fupa.

¹⁴Koga muzwiambadze She Jesu Kirisiti, ngono musikudze kugutsha mbumbiko dzenyu dze bubi.