Read Kalanga Baroma 14 Bible Online

Baroma 14 - Kalanga bible

Baroma 14

¹Amutjilani nthu usakasima mu kugalamoyo, koga musikakabadzane naye ngekwe mikumbulo iye.

²Nthu mmwe ungabe ne kugalamoyo kukulu kulu kwaanotubula kuja tjimwe ne tjimwe, koga nthu usakasima mu kugalamoyo unoja milibo koga.

³Nthu unoja tjimwe ne tjimwe ngaasilingile pasi usingaje, usingaje asibone nlandu unoja tjimwe ne tjimwe, ngobe Ndzimu wakan'amutjila.

⁴Uani iwe kubona nlandu nlanda we mmwe? Tetshi uwe ndiye unowobona kuti kene unopundula kene unokong'wa. Ngono unowopundula, ngobe Ndzimu uwe unotubula kunthama kuti apundule.

⁵Nthu unotola limwe zhuba se lakayengemala kupinda limwe, koga mmwe etola kuti mazhuba wose anofanana. Mmwe ne mmwe wakafanila kube ne malebeswa azhele mu nkumbulo uwe.

⁶Iye unokudza zhuba limwe unoshinga eijalo kukudza She, iye unoja tjimwe ne tjimwe unokushinga kukudza Ndzimu, ngobe unobokela Ndzimu zojiwa. Iye usingaje zwimwe zwithu unokushinga kukudza She, ngono unoboka Ndzimu.

⁷Akuna wedu unozwitjilila, akuna wedu unozwifila.

⁸Ha titjila totjilila She, ha tifa tofila She. Ndizo kene titjila kene tifa, ti ba She.

⁹Ngobe nangwenu Kirisiti wakafa, ngono kabgwilila mu butjilo kuti abe She we banotjila ne bakafa.

¹⁰Ini usumikilisa ikamu tjitjo kene? Kene ini ulingila ikamu tjitjo pasi kene? Tose towoma mbeli kwe Ndzimu kusumikilisiwa ndiwo.

¹¹Ngobe kwakakwagwa kukayi, “Nge malebeswa ha nditjila, kojalo She, mmwe ne mmwe unowondithigamila, ne mmwe ne mmwe unowoleba kuti ndi Ndzimu.”

¹²Mmwe ne mmwe wedu unowozwidabiligwa ku Ndzimu.

¹³Ndizo ngatimiseni kusumikilisa, koga tisitongo zwimisila kubiga mu zila ye ikamu tjedu tjimwe tjingatjikutha kene tjingandzinganyidza.

¹⁴Ndoziba nge buzhalo muna She Jesu kuti akuna zojiwa zwakatemapala nge kwazo, koga zwakatemapalila nthu unobe ekumbula kuti zwakatemapala.

¹⁵Ha uhwisa zogwadza ikamu tjitjo nge tjaunoja, ipapo autjashingila mu ludo. Usiti nge kuja kuko ukabulaya ikamu tjitjo itjo Kirisiti tjaakafila.

¹⁶Usiletje kululwama kuko kukalebgwa bubi,

¹⁷ngobe bushe gwe Ndzimu ate guli kuja ne kung'wa, koga nge gwe ndulamo ne kunyalala ne kushatha mu Meya yakayengemala.

¹⁸Ndizo iye unoshingila Kirisiti nge zila yakajali, unoshathisa Ndzimu kakale unokudziwa nge bathu.

¹⁹Ngatitjisalani shule tjimwe ne tjimwe tjinothama kunyalala ne kubhatshana mu kusimisana.

²⁰Musikolomodze nshingo we Ndzimu nge zila ye zojiwa. Zojiwa zose zwibuyanana, koga kwakabipa kuja tjimwe tjinowothama mmwe kawila mu tjibi.

²¹Akuzolulwama kuti uje nyama kene ung'we nkumbi kene uthame tjimwe koga tjingaliga ikamu tjitjo, kugalamoyo.

²²Kugalamoyo kwaunako ngakube pakati kuko ne Ndzimu. Kowoshatha iye usingazwisumikilise muna tjaanothama.

²³Koga ha edudumwa ngekwe tjaanoja, Ndzimu unombona nlandu ha etjija, ngobe tjaanothama atjizodwa mu kugalamoyo, ngono tjimwe ne tjimwe tjisingadwe mu kugalamoyo tjibi.