Read Kalanga Baroma 2 Bible Online

Baroma 2 - Kalanga bible

Baroma 2

¹Ndizo iwe unosumikilisa bamwe, auna tjaungabhatila patjili, kene uli ani; ngobe ha usumikilisa bamwe, ngono ube uthama izwezobo zwabanothama unozwisumikilisa.

²Toziba kuti kusumikilisa kwe Ndzimu kwakalulwamila ibabo banothama zwithu zwakajalo ngobe ku malebeswa.

³Ngono iwe, nthu koga unosumikilisa bamwe koga uzwithamabo. Apa unokumbula kuti unowodzeta kusumikilisa kwe Ndzimu kene?

⁴Kene unolingila pasi nzhazho wawo nkulukulu ne moyo wawo nyolo ne moyo wawo nlefu? Apa autoziba kuti nzhazho we Ndzimu wakathamigwa kukutungamilila mu kushandukila matjinyo awo?

⁵Koga ngekwe bukomba gugo nenge moyo uwo nkukutu kushanduka, unozwibiganyidzila shamu mu zhuba linowoti bushongola gwe Ndzimu ne kusumikilisa kwawo kwakalingisana kukazumbunuka.

⁶Ngobe Ndzimu unowopa mmwe ne mmwe mbhayilo kuyendidzana ne mishingo iye.

⁷Ibabo banodwilila nge moyonlefu beshinga ndulamo ngono beshaka kukudziwa ne kutetiwa ne kusafa, ibo Ndzimu unowobapa butjilo gusingapele.

⁸Koga ibabo banozwialakana boga, ngono basingahwe malebeswa, koga betobela bubi, Ndzimu unowobagwadzilamoyo ukabe ne bushongola mu bali.

⁹Kowobepo kudziyila ne kuhwazogwadza mu bali bose ibabo banoshinga bubi, kutanga ne Bajuta kukoti kuna Bezwitjaba.

¹⁰Koga kowobe ne kukudziwa ne kutetiwa ne kunyalala ku bali bose banoshinga ndulamo, kutangisa nge Bajuta kukoti Bezwitjaba,

¹¹ngobe Ndzimu auna shalaulo.

¹²Bose bakatjinya kusina nlayo, banowoloba kuzhe kwe nlayo, koga bose banotjinya bali pasi kwe nlayo banowosumikilisiwa nge nlayo.

¹³Ngobe ate kuli banohwa nlayo, banobe balulwami mbeli kwe Ndzimu, koga nge banolondolodza nlayo ndibo banolulwamisiwa.

¹⁴Ha Bezwitjaba ibo basina nlayo beshinga nge kwabo zwabo tjinoshakwa nge nlayo, ba nlayo nge kwabo, nenguba basakapiwa nlayo.

¹⁵Banolakidza kuti tjinoshakwa nge nlayo tjakakwagwa mu mimoyo yabo, ha hana dzabo dzipabo butendeki ne njalakang'wa dzabo tjimwe tjibaka dzibatilika nlandu koga tjimwe tjibaka dzibamila,

¹⁶mu zhuba Ndzimu usumikilisa nthu uzumbunula zwakasumbikala ndi Kirisiti Jesu, sekwa kuli iko mu ndebo mbuya yangu.

¹⁷Koga ha uzwidana Njuta wakabiga mu nlayo, uzwikudza ngekwe buzwalani gugo ne Ndzimu

¹⁸kakale uziba Ndzimu tjaunoshaka wakadiyiwa mu nlayo tjakalulwama,

¹⁹ngono ha una malebeswa kuti u nkwebi we mapofu, u tjedza tje bamu zhalima,

²⁰u nlayi we zwilengwe ne n'diyi we batjetjana, ngobe una nlayo unoziba tjimwe ne tjimwe nge buzhalo kakale tjaunoleba malebeswa.

²¹Iwe ngono unodiya bamwe autozwidiya kene? Iwe unodiya bamwe uti basikwibe, apa iwe unokwiba kene?

²²Iwe unoti bathu basithame bupombgwe, apa unothama bupombgwe kene? Unoshima midzimu yakabezhiwa, koga apa unokwiba mu ng'umba dze midzimu yakabezhiwa kene?

²³Iwe unozwikudza ngekwe nlayo, apa unolengudza Ndzimu ngokutjuluka nlayo kene?

²⁴Ngobe kwakakwagwa kuyi, “Zina le Ndzimu losapugwa nge Bezwitjaba nge kwenyu.”

²⁵Kuthumbigwa kuna nshingo ha ulondolodza nlayo, koga ha usingalondolodze nlayo kuthumbigwa kuko kowobe kusi kuthumbigwa.

²⁶Ndizo ha nthu usakathumbigwa elondolodza nlayo, apa kusathumbigwa kukwe akutowotogwa se thumbigwa kene?

²⁷Ngono ibabo basakathumbigwa koga belondolodza nlayo banowokubona nlandu iwe una nlayo wakakwagwa kakale wakathumba koga usingalondolodze nlayo.

²⁸Njuta wakwako ate Njuta tjakuzhe koga ne buthumbi gwe malebeswa ate gwakuzhe koga kakale guli gwe mbili.

²⁹Njuta wakwako Njuta tja mukati ne buthumbi gwe malebeswa ngegwe moyo, gwe Meya ate gwakakwagwa koga mu nlayo. Nthu wakajalo unokudziwa nge Ndzimu, kusi nge bathu.