Read Kalanga Baroma 3 Bible Online

Baroma 3 - Kalanga bible

Baroma 3

¹Apa ngono Bajuta banoyita pa bamwe ngeni kene? Kakale apa nshingo we buthumbi ini kene?

²Kobhatsha kwazo, nge zila dzose! Tje kutanga, Ndzimu wakabathama batjengeti be matama awo.

³Koga ha bamwe babo basakabe ne bugalimoyo kee? Apa kusagalamoyo ikoku kokolomodza bugalimoyo gwe Ndzimu kene?

⁴Ndodwa! Ndzimu una malebeswa misi yose, nenguba bathu bose bali banyepi, sekwa kwakakwagwa kuyi, “Kuti ndizo mululwamisiwe nge matama enyu, kakale mushayiwe nlandu ha musumikilisiwa.”

⁵Koga ha bubi gwedu gulakidza ndulamo ye Ndzimu tingatini wali? Apa tingati Ndzimu mbi ha utithamila bushongola kene? Ndoleba se kunoleba bathu.

⁶Ndodwa! Ha kwabe kwakajalo Ndzimu ungasumikilisa shango tjini kene?

⁷Koga ha manyepkhwa angu ezhisa kukudziwa kwe Ndzimu ngothama malebeswa e Ndzimu kuti aboneke nge buzhalo, ndi tja bongwa nlandu ntjini kene?

⁸Ini ngono tisingathame mbipo, kuti ndizo kunaka kuzhe? Bamwe bathu banotitjinya mazina beti tojalo. Kubong'wa nlandu kwabo kwakabafanila.

⁹Ngono ngwenu kee? Apa iswi Bajuta toyita pa bamwe kene? Ndodwa ne kutukununu! Ndakaleba kale kuti Bajuta kose ne Bezwitjaba tipasi kwe simba le tjibi,

¹⁰sekwa kwakakwagwa kuyi, “Akuna iye wakalulwama, ndodwa ne nng'ompela.

¹¹Akuna unohwisisa, akuna unoshaka Ndzimu.

¹²Bose bakafupatila Ndzimu, bose bakatjinya. Akuna unothama ndulamo, ndodwa ne nng'ompela.

¹³Wulo dzabo dzonga zwikumbu zwakaashama banotjengedza nge ndimi dzabo bana bushungu gunonga gwe nyoka mu milomo yabo,

¹⁴milomo yabo izhele bhiso ne bushongola.

¹⁵Banolibilidzila kutebula lopa,

¹⁶pabapinda matongo ne buyendasi,

¹⁷zila ye mbakiso abatoiziba.

¹⁸Akuna kutja Ndzimu mubali.”

¹⁹Ngwenu toziba kuti tjimwe ne tjimwe nlayo tjaunoleba, unotjileba kuna ibabo bapasi kwe nlayo, kuti milomo yose inyaladziwe ne shango yose ibe ne kuzwidabilila ku Ndzimu,

²⁰ngobe akuna nthu ungalulwamisiwa ngoshinga tjinoshakwa nge nlayo, nge kuti zibo ye tjibi inozha nge nlayo.

²¹Koga ngwenu zila ye Ndzimu ye kululwamisa bathu yakazumbunugwa kuzhe kwe nlayo, nenguba nlayo ne balebesambeli bepa butendeki nge kwayo.

²²Ndzimu unolulwamisa bathu nge kugalamoyo kwabo muna Jesu Kirisiti. Ngoti akuna shalaulo,

²³se bathu bose bakatjinya bakathayela gudzo le Ndzimu.

²⁴Koga banolulwamisiwa nge ngoni dze Ndzimu dzili tjipo nge kudzutunugwa kumuna Kirisiti Jesu,

²⁵Ndzimu wakadusa Nkololo wawo ili tjibhayilo kuti nge lopa lile tiamutjigwe nge kugalamoyo. Ikoku Ndzimu wakabe ulakidza kuti mu misi yakapinda wakabe ne moyo nlefu ukasibe ne hanya nge zwibi zwe bathu, koga ngwenu una hanya nazo kuti ndizo alakidze ndulamo yawo. Ikoku ekuthama ngoamutjila bathu bose bana kugalamoyo muna Jesu.

²⁷Tingazwikudza ngeni ngono? Akuna. Ini tisingazwikudze? Apa tingazwikudza nge mishingo kene? Aa, nge kugalamoyo koga.

²⁸Topedza titi, nthu unolulwamisiwa nge kugalamoyo, kusi nge kulondolodza nlayo.

²⁹Apa Ndzimu nge we Bajuta koga kene? Apa ate uli Ndzimu we Bezwitjababo kene? Ee, nge we Bezwitjababo.

³⁰Se Ndzimu uli nng'ompela unolulwamisa bakathumbigwa nge kugalamoyo kwabo ne basakathumbigwa nge kugalamoyo kwabobo.

³¹Apa ikoku kodwa kuti nge kugalamoyo ikoku tolasha nlayo kene? Ndodwa! Tosimisa nlayo.