Read Kalanga Baroma 4 Bible Online

Baroma 4 - Kalanga bible

Baroma 4

¹Tingatini ngono ngekwa batategulu bedu, Abhurahama?

²Ngobe ha Abhurahama akalulwamisiwa nge mishingo, ungabe ana tjimwe tjaangazwikudza nditjo, koga kusi mbeli kwe Ndzimu.

³Hwalo dzikatini? “Abhurahama wakagalamoyo Ndzimu, ngono kugalamoyo kukwe kukatogwa ili ndulamo.”

⁴Kuna iye unoshinga, ndipo iye aitotogwa ili tjipo, koga inotogwa ili fanilo.

⁵Kuna iye usingashinge koga egalabgwe Ndzimu, kuti ndiwo unolulwamisa babi, kugalamoyo kukwe kotogwa ili ndulamo.

⁶Ndizo Dafite naiye bo unoleba ngekwe kukombolegwa kwe nthu unoyi wakakombolegwa nge Ndzimu kuzhe kwe mishingo eti,

⁷“Bakakombolegwa ibabo bakazwiibhatigwa matjinyo abo, ne bana zwibi zwakabukushiwa.

⁸Kwakakombolegwa nthu She waasingobalila zwibi zwizwe.”

⁹Apa iko makombolelo iyawa nge ebakathumbigwa koga, kene nge ebasakathumbigwabo? Se tati, “Kugalamoyo kwa Abhurahama kwakatogwa ili ndulamo.”

¹⁰Kwakashingikala tjini kuti kutogwe nge zila iyeyo? Wakabe atjithumbigwa kene asathu kathumbigwa? Kwakashingikala asathu kathumbigwa.

¹¹Wakaamutjila kuthumbigwa kuli lutjwayo gwe ndulamo yaakabe nayo nge kugalamoyo kukwe asathu kathumbigwa. Ili kunthama tate ba bose bakagalamoyo basakathumbigwa ngono kukatogwa ili ndulamo ku bali.

¹²Sa ikoko ndi tatebo be bakathumbigwa, kusi kuti hwuthumbigwa koga, kuli kuti banogalamoyo mu Ndzimu sa Abhurahama tate bedu, basathu bakathumbigwa.

¹³Kugadziwabgwe kwa Abhurahama ne bana babe kuti bathuwe shango, akuzozha ngobe Abhurahama akabe elondolodza nlayo, koga kwakazha nge ndulamo yaakawana nge kugalamoyo.

¹⁴Ha kuli kuti balondolodzi be nlayo ndibo banowobe bagalithaka, kowobe kudwa kuti kugalamoyo akutodwa tjimwe kakale kugadziwabgwe akuna nshingo.

¹⁵Nge kuti nlayo unozhisa bushongola gwe Ndzimu, koga pasina nlayo apana tjibi.

¹⁶Ndizo kugadziwabgwe kwakateyiwa pezhugwi kwe kugalamoyo kuti bose bana ba Abhurahama babe ne gobe mu kugadziwabgwe kumu ngoni dze Ndzimu, kusi ibabo banolondolodza nlayo boga, koga na ibabo banogalamoyo sa Abhurahama. Abhurahama ndi tate bedu tose.

¹⁷Sekwa kwakakwagwa kuyi, “Ndakakuthama tate be zwitjaba zwi njinji.” Mbeli kwe Ndzimu iwo waakagalamoyo, iwo unopa bafi butjilo, unoti ukathama zwithu zwisakatongobe yapo zwikabe yapo.

¹⁸Mu kugalabgwe, Abhurahama wakagalabgwe nenguba kwakabe kusingagalikebgwe, ndizo kabe “tate be zwitjaba zwinjinji” sekwa akabe adwiwa, kuyi “Bana babo banowobe banjinji sa ikoku.”

¹⁹Aazonyala meya mu kugalamoyo kukwe ha ekumbula mbili uwe, iwo wakabe ungafanidzanyiwa ne wakafa nge kuti wakabe ana makole angabhata zana (100), kene ekumbula kusawana bana kwa Sara.

²⁰Aazodudumwa kene kuli sagalabgwe kugadzabgwe kwe Ndzimu, koga wakasima mu kugalamoyo, ekudza Ndzimu,

²¹egalamoyo nge buzhalo kuti Ndzimu unotubula kushinga tjawakagadzabgwe.

²²Ndizo wali nge kugalamoyo kukwe, “Ndzimu wakalulwamisa.”

²³Matama anoti, “kugalamoyo kwakatogwa ili ndulamo,” aazokwaligwa iye ega.

²⁴Akakwaligwa naswibo. Iswi tinogalamoyo, kugalamoyo kwedu kotogwa ili ndulamo muuli iwo wakamusa Jesu She wedu mu bafi.

²⁵Iye wakabulayigwa zwibi zwedu kamusigwa ndulamo yedu.