Read Kalanga Baroma 5 Bible Online

Baroma 5 - Kalanga bible

Baroma 5

¹Ndizo se takalulwamisiwa nge kugalamoyo tina kunyalala ne Ndzimu ndi Jesu Kirisiti, She wedu.

²Ngekukwe takawana zila ye kungina mu ngoni dze Ndzimu, dzatili mudzili, ngono nge kugalamoyo toshatha nge kugalabgwe kuti towobe ne gobe mu gudzo le Ndzimu!

³Tjikulu toshatha mu kudziyila kwedu, ngobe toziba kuti kudziyila kozhisa kusimisila.

⁴Kusimisila kozhisa mbumbiko yakasima inozhisa kugalabgwe.

⁵Ngono kugalabgwe akutotibhatisa shoni ngoti ludo gwe Ndzimu gwakadigwa mu mimoyo yedu nge Meya yakayengemala iyo yatakapiwa.

⁶Takati tisina sekwa tingazwibhatsha, Kirisiti kafila babi nge tjibaka tjakalingisana.

⁷Kwakasima kuti nthu afile nlulwami, nenguba pamwe kungathamika kuti mmwe afile nthu una nzhazho.

⁸Koga Ndzimu unolakidza ludo gwawo mutili nge kuti takati titji batjinyi Kirisiti katifila!

⁹Ndizo se ngwenu takalulwamisiwa nge malopa a Jesu, kukulu kwazo towotjidziwa mu bushongola gwe Ndzimu!

¹⁰Ha kuli kuti takati tili zwita zwe Ndzimu, tikagadzanyiwa ne Ndzimu nge lufu gwe Nkololo wawo, kutjidziwa kwedu ndiye kukulu.

¹¹Kusi ikoko koga, iswi toshatha mu Ndzimu ndi She Jesu Kirisiti, iye wakatigadzanya nge Ndzimu.

¹²Ndizoke, se tjibi tjakazha mu shango nge nthu nng'ompela, lufu gukazhisiwa nge tjibi, lufu gwakaandama nge bathu, ngobe bose bakathama tjibi.

¹³Tjibi tjakabe yapo mu shango nlayo usathu ukabigwa, koga pasina nlayo tjibi atjitobagwa.

¹⁴Koga lufu gwakabusa kudwa mu nsi wa Adamu kunoti muna wa Mushe ne muna ibabo bakabe basatjinya sa Adamu, iye wakabe ali ifano tje wakabe ewozha, iye Jesu.

¹⁵Koga tjipo tje Ndzimu atjitonga tjibi. Ha bathu banjinji bakafa nge tjibi tje nthu nng'ompela. Ngoni dze Ndzimu iwulu seni dzinodelukila banji dzinozha nge nthu nng'ompela Jesu Kirisiti.

¹⁶Tjipo tjoleyana ne tjibi tje nthu iwoyo nng'ompela: Ngobe kusumikilisiwa kwakazha nge jinyo ling'ompela, kwakazwala kubong'wa nlandu, koga tjipo tjinozha shule kwe matjinyo manji, tjozhisa kushayiwa nlandu.

¹⁷Ha ngekwe jinyo le nthu nng'ompela lufu gwakabusa nge nthu iwoyo, ibabo banoamutjila ngoni dzakawanda ne tjipo tje ndulamo, banowobusa kukulu seni mu butjilo nge nthu nng'ompela iye Jesu Kirisiti.

¹⁸Ngono se jinyo le nthu nng'ompela lakazhisa kubong'wa nlandu kwe bathu bose, kwakajalobo nshingo we ndulamo we nthu nng'ompela wakazhisila bathu bose kusabong'wa nlandu nenge kubapa bose butjilo.

¹⁹Ngobe se bathu banji bakabe batjinyi nge kusahwa kwe nthu nng'ompela, sa ikokobo, nge kuhwa kwe nthu nng'ompela, bathu bose banowolulwamisiwa.

²⁰Nlayo wakazha kuwandisa jinyo, koga tjibi pa tjakawanda, ngoni dze Ndzimu dzakawanda kupinda.

²¹Ndizo se tjibi tjakabusa mu lufu, ngoni dze Ndzimu dzobusa nge ndulamo dzititungamilila ku butjilo gusingapele ndi Jesu Kirisiti She wedu.