Read Kalanga Baroma 6 Bible Online

Baroma 6 - Kalanga bible

Baroma 6

¹Towotini ngono? Tidwilile mu tjibi, kuti ndizo ngoni dze Ndzimu dziwande kene?

²Ndodwa! Tingati iswi takafa ku tjibi, tikadwilila mutjili tjini wali?

³Apa amutoziba kuti iswi tose bakadubikiwa muna Kirisiti Jesu, takadubikiwa mu lufu gugwe kene?

⁴Nge kudubikiwa kwedu, takabiganyiwa naye ne kufa naye mu dubiko. Ndizo se Kirisiti akamusiwa mu lufu nge gudzo la Tate, sa ikoko naswibo titjile butjilo butshwa.

⁵Ha kuli kuti takabhatshanyiwa naye mu lufu gunonga gugwe, towobhatshanyiwa naye mu kumuka kunonga kukwe.

⁶Toziba kuti mbumbiko yedu yantolo yakabambugwa na Kirisiti, kuti mbumbiko mbi ilobesiwe, ndizo tisitongobe titji balanda be tjibi,

⁷ngobe iye wakafa, wakasunungugwa mu tjibi.

⁸Koga ha takafa na Kirisiti, togalamoyo kuti towotjilabo naye,

⁹ngobe toziba kuti Kirisiti wakamusiwa mu bafi, ngono aangatjafe kakale, lufu agutjina simba munli.

¹⁰Lufu gwaakafa, wakafa ku tjibi kang'ompela. Koga butjilo gwaanotjila unotjilila Ndzimu.

¹¹Ndizo namwibo makafanila kuzwitola muli bakafa ku tjibi, koga motjila ku Ndzimu muna Kirisiti Jesu.

¹²Musitjaletjedzele tjibi tjikalaula mibili yenyu inofa tjimuthama kuti muhwilile njemulo dzatjo.

¹³Musitongo pa ndungululo dze mibili yenyu tjibi, se zwishingisiwa zwe bubi, koga muzwipe Ndzimu se bathu bakamusiwa mu lufu bakayisiwa mu butjilo ne ndungululo dzenyu mudziyise ku Ndzimu, dzili zwishingisiwa zwinoshinga zwe ndulamo.

¹⁴Ngoti tjibi atjitjowobe ne simba mu muli, se musitjipasi kwe nlayo koga mabe pasi kwe ngoni.

¹⁵Ngonoke? Apa titjinye, ngobe tisi pasi kwe nlayo koga tili pasi kwe ngoni kene? Ndodwa!

¹⁶Apa amutoziba kuti ha muzwipa ku mmwe se balanda munhwa, mu balanda be wamunohwa, kene be tjibi tjinoyisa ku lufu, kene be kuhwa kunoyisa ku ndulamo?

¹⁷Koga ngakubokwe Ndzimu, kuti imwi makatongobe muli balanda be tjibi, motjihwa nge mimoyo yenyu yose zwidiyo zwamakapiwa.

¹⁸Ngono semakatjisunungugwa mu tjibi matjibe balanda be ndulamo.

¹⁹Ndoleba ngoleba kwe bathu, ngobe mbumbiko yenyu inasatubula kuhwisisa. Koga sekwa makabe mupa ndungululo dze mibili yenyu mu kutemapala ne mu bubi gusibushoma, ngwenu ipani ndungululo dze mibili yenyu ndulamo ndizo muyengemadziwe.

²⁰Makati muli balanda be tjibi, makabe makasununguka mu ndulamo.

²¹Koga ngwenu makabuyigwa ngeni mu kushinga zwithu zwamunobhatigwa nge shoni kene? Bhelelo le zwithu izwezo lufu!

²²Koga ngwenu se matjisunungugwa mu tjibi, ngono matjibe balanda be Ndzimu, mbhayilo wamunowana buyengemali, ne bhelelo lago butjilo gusingapele.

²³Ngobe mbhayilo we tjibi lufu, koga tjipo tje Ndzimu butjilo gusingapele mu na Kirisiti Jesu She wedu.