Read Kalanga Baroma 7 Bible Online

Baroma 7 - Kalanga bible

Baroma 7

¹Apa amutoziba kene zwikamu kuti nlayo unolaula nthu ha atjatjila koga? Ndolebeleka ne bathu banoziba nlayo.

²Kongasawoku nkadzi wakalobogwa wakasungwa nge nlayo ku nlume uwe ha nlume atjatjila, koga ha nlume uwe atjifa nkadzi wasununguka mu nlayo we ndobolo.

³Ndizo ha elobogwa nge mmwe nlume koga nlume uwe atjatjila, unowodang'wa phombgwekadzi. Koga ha nlume uwe afa, wasununguka mu nlayo iwoyu, ndizo ha elobogwa nge mmwe ate ali phombgwekadzi.

⁴Saikoko zwikamu zwangu makafa ku nlayo, ndi Kirisiti, kuti ndizo ngwenu mube be upoga ba iye wakamusiwa mu bafi, kuti ndizo mube nge zwizwalo mu Ndzimu.

⁵Takati titjatjilila tjinyama njemulo dzedu mbi dzinosasayidzigwa nge nlayo dzakabe dzishinga mu mibili yedu, dzakasima kuti dzizwale mitjelo ye lufu.

⁶Koga ngwenu takasunungugwa mu nlayo, ngoti takafa kuna itjo tjakatongobe tjakatisunga. Ndizo atitoshinga tili pasi kwe nlayo nkulukugwi wakabe wakakwagwa, timu butjilo butshwa gwe Meya.

⁷Towotini ngono? Towoti nlayo tjibi kene? Ndodwa! Koga ha nlayo wakabe usipo ndobe ndisakaziba tjibi. Ha nlayo wakabe usati, “Usitjibe” ndobe ndisakaziba kuti tjiba ini.

⁸Koga ngekwe nlayo tjibi tjakawana tjibaka tje kuthama zila dzose dze tjiba mundili. Kuzhe kwe nlayo tjibi tjakafa.

⁹Ndakatongobe ndili mpenyu kuzhe kwe nlayo, koga nlayo wakati uzha, tjibi tjikamuka, ngono afa.

¹⁰Ngono nlayo iwo wakabe wakafanila kuzhisa butjilo, ku ndili wakazhisa lufu.

¹¹Ngobe tjibi ngowana tjibaka tjakatubula mu nlayo tjikanditjebela, nge kwawo tjikandibulaya.

¹²Ndizo nlayo wakayengemala ne ndayo yakayengemala kakale yakalulwama imbuya.

¹³Apa ikoku kodwa kuti tjakalulwama tjakandizhisila lufu kene? Ndodwa! Tjibi nditjo tjakazhisa lufu ngoshingisa tjakalulwama, kuti ndizo tjibi tjiboneke kuti tjibi. Ngono ndizo nge nlayo tjibi tjolakidziwa tjakabipa kupindisa.

¹⁴Toziba kuti nlayo u tjimeya, koga imi ndi tjinyama, ndakatengesiwa kube nlanda we tjibi.

¹⁵Anditohwisisa mishingo yangu, ngobe anditoshinga tjandinoda koga ndoshinga itjo tjandisingashake.

¹⁶Ndizo ha ndishinga tjandisingashake ndoduma kuti nlayo wakalulwama.

¹⁷Ndizo akutji imi ndinotjithama koga i tjibi tjigele mundili.

¹⁸Ngobe ndoziba kuti akuna tjakalulwama tjinogala mundili, ndodwa kuti mu mbumbiko yangu ye tjinyama. Ndingayemula kushinga tjakalulwama koga asitubule kutjishinga;

¹⁹ngobe tjandinoshinga ate tjakanaka tjandinoshaka shinga, koga, mbipo yandisingashake shinga ndiyo yandinoshinga.

²⁰Koga ngwenu andishinga tjandisingashake shinga, akutji imi ndinotjishinga koga tjibi tjinogala mundili.

²¹Ndizo ndotjiwana kwabe nlayo kuti ha ndishaka kushinga tjakalulwama, mbipo ipejo nami.

²²Ngobe mukati kwangu ndoshathila nlayo we Ndzimu,

²³koga ndobona nlayo upoga ushinga mu ndungululo dze mbili wangu, ugwa ne nlayo we nkumbulo wangu, ngono undithama nsungwa we nlayo we tjibi unogala mu ndungululo dze mbili wangu.

²⁴Ndodziyila seni! Apa ndiani unowondiangulila mu mbili iwoyu we lufu kene?

²⁵Ngakubokiwe Ndzimu, iwo unoshinga ikoku ndi She wedu Jesu Kirisiti! Ndizo ngwenu imi nge kwangu mu nkumbulo wangu ndolondolodza nlayo we Ndzimu, koga mu tjinyama ndolondolodza nlayo we tjibi.