Read Kalanga Baroma 8 Bible Online

Baroma 8 - Kalanga bible

Baroma 8

¹Ndizo ngwenu akutjina unowobong'wa nlandu muna ibabo banotjilila muna Kirisiti Jesu,

²ngobe nlayo we Meya ye butjilo muna Kirisiti Jesu wakandisunungula mu nlayo we tjibi ne lufu.

³Ngoti Ndzimu wakathama tjakakona nlayo wakabe walelusiwa nge mbumbiko mbi ye tjinyama, ngotumila Nkololo wawo ezha ali mu mbumbiko mbi ye nthu ali tjibhayilo tjinodusa tjibi.

⁴Ndzimu wakathama ikoku, kuti ndizo ndulamo inoshakwa nge nlayo ishinge mutili, iswi banotjila kuyendidzana nge Meya, kusi kuyendidzana nge tjinyama.

⁵Ibabo banotjila tjinyama, mikumbulo yabo imu tjinyama, koga ibabo banotjilila mu Meya, mikumbulo yabo imu zwithu zwe Meya.

⁶Kutjilila mu mikumbulo ye zwe tjinyama kozhisa lufu, kutjilila mu mikumbulo ye zwe Meya kozhisa butjilo ne kunyalala.

⁷Nge kuti nkumbulo we tjinyama tjita ku Ndzimu, autohwilila nlayo we Ndzimu, ngobe dumbu usingatubule.

⁸Ibabo bamu tjinyama abangashathise Ndzimu.

⁹Koga imwi amute muli mu tjinyama, mumu Tjimeya ha kuli kuti dumbu Meya ye Ndzimu igele mu muli. Iye usina Meya ya Kirisiti ate ali nthu wa Kirisiti.

¹⁰Koga ha Kirisiti ali mu muli, nenguba mibili yenyu yakabulawa nge tjibi, meya yenyu inotjila ngekwe ndulamo.

¹¹Ha Meya ya iye wakamusa Jesu mu bafi igala mu muli, iye wakamusa Kirisiti Jesu mu bafi unowopabo mibili yenyu bupenyu, nge Meya iye inogala mu muli.

¹²Ndizo wali zwikamu akutotikombeledza kulaugwa nge tjinyama kene kuli kutjila tjinyama,

¹³ngobe ha mutjila kunoyendidzana nge tjinyama, mowofa. Koga ha mubulaya mishingo isakalulwama ye mbili nge Meya, mowotjila.

¹⁴Ngobe bose bakatungamigwa nge Meya ye Ndzimu, bana be Ndzimu.

¹⁵Ngobe amuzoamutjila meya ye bulanda kumubgwiliza mu lutjo, koga makaamutjila Meya inomuthama bana be Ndzimu, yatinoti ndiyo tikalila titi “Abha, Tate.”

¹⁶Meya nge kwayo inopa butendeki ne meya yedubo inopa butendeki kuti ti bana be Ndzimu.

¹⁷Ha tili bana bawo, tibagalithaka be bushe gwe Ndzimu, ti bagalithaka be Ndzimu tose na Kirisiti; ha kuli kuti todziyila naye, kuti ndizo tikudziwe naye.

¹⁸Ndobona kuti kudziyila kwe misi ino akuzolizana kufanidzanyiwa nge gudzo latinowozumbunuligwa.

¹⁹Ngekuti lubumbo gwakalindila nge kushuba kukulu kuzumbunugwa kwe bana be Ndzimu.

²⁰Ngobe lubumbo gwakalashisiwa mazwimisilo ago, kusi nge kuda kwago, koga kuli nge kuda kwa iye wakagulashisa ne kugalabgwe kuti gowosunungugwa.

²¹Lubumbo nge kwago gowosunungugwa mu busungwa gwago gwe kubola, gukazhisiwa mu gudzo le kusununguka kwe bana be Ndzimu.

²²Toziba kuti lubumbo gose gwagala guli mubuyendasi ngothumbgwa kuswikila ngwenu.

²³Ngono ate lubumbo goga gumubuyendasi, naswibo iswi tina mitjelo ye kutanga ye Meya timubuyendasibo tje mukati setakalindila kuti tithamiwe bana, nge kudzutunugwa kwe mibili yedu.

²⁴Ngobe mukugalabgwe ikoku takatjidziwa. Koga kugalabgwe muna tjinoboneka ate kugalabgwe. Ndiani ungagalabgwe tjaanobona kene?

²⁵Koga ha tigalabgwe tjatisingabone, totjilindila nge moyo nlefu.

²⁶Saikokobo Meya inotibhatsha, mu kusasima kwedu, ngobe atitoziba kutembezela sekwa takafanila; koga Meya nge kwayo inotilebelekela nge kugomela kusingake kukatjenesiwa nge matama.

²⁷Ngono Ndzimu iwo unoshakisisa mimoyo ye bathu, unoziba nkumbulo we Meya, ngobe Meya inolebelekela bayengamali kuyendidzana ne kuda kwe Ndzimu.

²⁸Toziba kuti mu zwithu zose Ndzimu unoshingila bubuya ibabo banouda, ibabo bakadang'wa kuyendidzana nge ndongoloso yawo.

²⁹Ibabo Ndzimu bawakaziba kale wakababigila ntomebo kuti bashandugwe bafanane ne Nkololo wawo, kuti abe mbano pakati kwe thobeledzani njinji.

³⁰Ngono ibabo Ndzimu bawakabigila ntome, wakabadana, ibabo bakadang'wa wakabalulwamisa, ngono ibabo bawakalulwamisa wakabakudza.

³¹Towotini ngono ngekwa ikoku? Ha Ndzimu uli mile naswi, ndiani unganyanyayidzana naswi?

³²Apa iwo usakatjiba Nkololo wawo koga wakanthama tjibhayilo nge kwedu tose, apa autowotipa bo zwithu zose naye kene?

³³Ndiani unowobona bashalugwa be Ndzimu nlandu kene? Ndzimu ndiwo unolulwamisa bathu.

³⁴Ndiani ngono unowobona nlandu? Apa ndi Kirisiti Jesu, iye wakafa, ee, iye wakamusiwa mu bafi uku luboko gwe luji gwe Ndzimu unotilebelekela kene?

³⁵Ndiani ungatithubukanya ne ludo gwa Kirisiti? Apa i manikano, kene kuhwazogwadza kukulukulu, kene kudziyidziwa, kene zhala, kene kuyenda mbujo, kene mbatsha, kene thumo linobulaya?

³⁶Sekwa kwakakwagwa kuyi, “Nge kwenyu tobulawa zhuba lose, tobhakhwa se pkhwizi dzinonobhayiwa.”

³⁷Aa, mu zwithu zose izwezwi topinda bakundi munli iye wakatida.

³⁸Ndina malebeswa ekuti akuna tjingatithubukanya ne ludo gugwe, lufu kene butjilo, batumwa be kudzimu kene meya mibi kene zwithu zwiyapo, kene zwithu zwinozha, kene masimba e babi,

³⁹kene pezhugwi, kene pasi akuna tjimwe mu lubumbo gose tjingatubula kutithubukanya ne ludo gwe Ndzimu igo gwatinowana ndi Kirisiti Jesu She wedu.