Read Kalanga Baroma 9 Bible Online

Baroma 9 - Kalanga bible

Baroma 9

¹Ndoleba malebeswa muna Kirisiti, anditonyepa. Hana yangu inonditendekela mu Meya yakayengemala,

²kuti ndina buyendasi bukulu ne kuhwa zogwadza mu moyo wangu kusingapele.

³Ngobe ndoyemula kuti imi nge kwangu ndingabe ndakalongwa bhiso athubukanyiwa na Kirisiti kuyitila makamu angu, ibabo be ludzi gwangu

⁴ibo bathu be Iziraela. Tjabo bakashalugwa kube bana, i gudzo le Ndzimu ne zwidumano ne kupiwa nlayo ne kunamata ne kugadziwabgwe.

⁵Bobatategulu babo ludzi gwa Kirisiti panyama, Ndzimu iwo upezhugwi kwa bose, ngaukudziwe nge kusingapele! Ngakujalo.

⁶Akutodwa kuti dama le Ndzimu lakakong'wa, ngobe ate kuli kuti bose bana be Iziraela, Baiziraela.

⁷Kakale akutodwa kuti bose bana ba Abhurahama, ngobe bali be ludzi gwa Abhurahama. Koga Ndzimu wakati kuna Abhurahama, “Bana babo banowodang'wa nge zina la Isaki.”

⁸Nge imwe zila kodwa kuti bana bakazwagwa ngekwe nyama ate ibo bana be Ndzimu, be kugadziwabgwe ndibo bana be Ndzimu bakwako;

⁹ngobe kugadzabgwe kwakalebgwa sahwoku, “Nge tjibaka tjakabigwa ndowobuya ngono Sara unowowana nkololo.”

¹⁰Kusi ikoko koga, Rebheka wakati awana bana ne nlume nng'ompela, ibo tate bedu Isaki,

¹¹nenguba kwakati basathu bakazwagwa kakale basathu bakathama tjimwe tjakanaka kene tjakabipa, kuti ndizo kushalula kwe Ndzimu kudwilile, kusi nge mishingo, kuli nge kushalula kwawo,

¹²Rebheka wakadwiwa kukayi, “Hwola inowoshingila ntjetjana.”

¹³Sekwa kwakakwagwa, kuyi “Jakubo ndakan'da, koga Esau ndakambenga.”

¹⁴Towotini ngono? Apa tingati Ndzimu autosumikilisa nge ndingisanyo kene? Ndodwa!

¹⁵Ngobe ukati kuna Mushe, “Ndowohwila ngoni iye wandinohwila ngoni, ngono ndowohwila zogwadza iye wandinoda kuhwila zogwadza.”

¹⁶Ndizo akutodwa mu kuda kene mu matatabuko e nthu koga kodwa mu ngoni dze Ndzimu.

¹⁷Hwalo dze Ndzimu dzoti kuna Faro we Egipiti, “Ndakamusila ikoku, kuti ndilakidze simba langu mukuli kakale kuti zina langu lilebgwe mu shango yose.”

¹⁸Ndizo Ndzimu unohwila ngoni iye waunoda kuhwila ngoni, koga unokukutadza moyo iye waunoda kukukutadza.

¹⁹Mmwe wenyu ungati kundili, “Ngono ini Ndzimu utjatibona nlandu? Ndiani unganyanyayidzana ne kuda kwawo?”

²⁰Koga uani iwe ungadabidzana ne Ndzimu? Apa tjakabumbiwa tjingati kuna wakatjibumba, “Ini wakandibumba uijali kene?”

²¹Apa mbumbi we hali aana simba mu ntapkhwi kubumba hali dze mishingo ipezhugwi ne dze mishingo ipasi nge ntapkhwi iwo zwawo kene?

²²Kungayingwi ha Ndzimu wakabe ushaka kulakidza bushongola gwawo ne kuyita kuti simba lawo lizibgwe, koga ukabe ne moyonlefu kuna bawakagwadzilamoyo, ibo bakabe bakafanila kuloba,

²³kuti ndizo ulakidze fumwa ye gudzo lawo kuna bawakahwila zogwadza ibo bawakagala washalulila gudzo,

²⁴naswibo takadang'wa, kusi Bajuta koga, ne Bezwitjababo.

²⁵Sekwa unoleba mu lukwalo gwa Hosea uti, “Ibabo bakabe basi bathu bangu, ndowobadana ‘Bathu bangu,’ na iye wandakabe ndisingade, ndowon'dana ‘N'diwa wangu.’

²⁶Ne mu bugalo kwakayi ku bali, ‘Ate muli bathu bangu,’ banowodang'wa ‘Bakololo be Ndzimu unotjila.’ ”

²⁷Isaya unomimila ngekwe Iziraela eti, “Nenguba bunji gwe Baiziraela gunga nsetje we gungwa, kowotjidziwa malimbelimbe koga.

²⁸Ngobe She banowoshinga ngolibilidza kakale ne buzhalo kusumikilisa kwabo mu shango.”

²⁹Kakale se kwakalebegwa mbeli ndi Isaya eti, “She bana masimba ha babe basakatisiyila bana, tobe takanga Sodoma, tikathamiwa se Gomora.”

³⁰Towotini ngono? Towoti Bezwitjaba bakabe basingashake ndulamo, ngono bakayiwana iyo ndulamo nge kugalamoyo,

³¹koga Iziraela, iyo yakatemelela mu ndulamo inozha nge nlayo aizotubula kushingikadza nlayo.

³²Nge kutini? Nge kuti abazobe beshaka nge kugalamoyo, koga bakabe beshaka ndulamo nge mishingo. Bakakuthiwa nge bgwe linokutha,

³³sekwa kwakakwagwa kuyi, “Bonani, ndobiga mu Ziyoni bgwe linowokutha bathu, shongwe inowobaliga, iye unogalamoyo munli aatowobhatisiwa shoni.”