Read Kalanga 1 Bakorinta 10 Bible Online

1 Bakorinta 10 - Kalanga bible

1 Bakorinta 10

¹Ndoshaka kuti mualakane zwikamu kuti bobatategulu bedu bose bakabe bali kusi kwe gole nenge kuti bose bakatjuluka gungwa.

²Bose bakadubikwa kube batobeli ba Mushe mu gole ne mu gungwa.

³Kakale bose bakaja zojiwa zwe tjimeya

⁴kakale bose bakang'wa tjing'o tje tjimeya. Ngobe bakang'wa mu shongwe ye kudzimu, iyeyo yakabe yakabatobela, ngono shongwe iyeyo ndi Kirisiti.

⁵Bunji gwabo abazoshathisa Ndzimu, ndizo bakabulawa mu tjilambanyika.

⁶Zwithu izwezwi zwakashingikala kutjenjedza iswi kuti tisiyemule bubi sa ibo.

⁷Musibe bathigamili be midzimu se kwakathama bamwe babo, ngobe kwakakwagwa kuyi, “Bathu bakagala pasi kuja ne kung'wa, kakale bakamilika bakazana.”

⁸Tisithameni bupombgwe se kwakathama bamwe babo, ngono zwiwulu zwili makumi mabili ana kutatu (23 000) zwikafa zhuba ling'ompela.

⁹Tisilikeni She, se kwakathama bamwe babo, ngono bakalobesiwa nge nyoka,

¹⁰kene kuli kung'ong'ola se kwakathama bamwe babo, ngono bakalobesiwa nge nlobesi.

¹¹Zwithu izwezwi zwakabashingikalila kuli kutjenjedza, ngono zwakakwagwa kudiya iswi banotjila mu misi ye bupelo.

¹²Ndizo iye unokumbula kuti umile wakasima ngaabe nge njele kuti asiwe.

¹³Akuna ndiko yakamuwila isakatongowila nthu. Ndzimu unogalikabgwe ndizo aungakuletjedzele kuti ulikiwe kunopinda matatabuko awo, koga ne ndiko Ndzimu unozhisa zila yaungabhuda ndiyo, kuti usimisile.

¹⁴Ndizo badiwa bangu, mu zwikupe tjose mu kunamata midzimu.

¹⁵Ndolebeleka ne bathu bakatjenjela, muzwibonegwe kene tjandinoleba malebeswa.

¹⁶Bhepe le makombolelo latinopa latinokombolela, apa ate kukobana mu malopa a Kirisiti kene? Tjiwunga tjatinokwamula, apa ate kukobana mbili wa Kirisiti kene?

¹⁷Sekuna tjiwunga tjing'ompela, iswi banjinji ti mbili nng'ompela, ngobe iswi tose tokobana tjiwunga itjetjo tjing'ompela.

¹⁸Kumbulani bathu be Iziraela, apa ibaba banoja zwibhayilo abana gobe mu tjibeso tje zwibhayilo kene?

¹⁹Apa ndodwani kene? Apa ndodwa kuti zojiwa zwakapiwa midzimu zwi tjimwe kene, kene iyo midzimu i tjimwe?

²⁰Aa! Ndodwa kuti basinganamate Ndzimu banopa zwibhayilo meya mibi. Anditoshaka kuti mube ne buzwalani ne meya mibi.

²¹Amungang'we mu bhepe la She ne bhepe le meya mibi. Amungaje mu ndilo ya She ne mu ndilo ye meya mibi.

²²Apa toshaka yita kuti She babe ne fupa kene? Apa takasima kubapinda kene?

²³“Zwithu zose zodumiligwa,” koga ate zwithu zose zwinobhatsha, “Zwithu zose zodumiligwa,” koga ate zwithu zose zwinobumba.

²⁴Ngakushete unozwishakila bubuya, koga ngaagushakile bamwe.

²⁵Ijani tjinotengesiwa mu matengeselo e nyama musingabhuzwe muyitila hana.

²⁶Ngobe “Shango nge ya She ne tjimwe ne tjimwe tjimuili.”

²⁷Ha mmwe we basingagalemoyo ekudanila zojiwa ha ushaka kuyenda, yenda, uje kene ilini tjawapiwa, usinabhuzo.

²⁸Koga aangati ku kuli, “Zojiwa izwezwi zwapiwa midzimu,” ipapo usije zojiwa izwezo uthamila iwoyo wakubudza kakale uthamila hana,

²⁹Anditodwa hana iyo, ndodwa iye. Kusununguka kwangu kungalaugwa nge hana ye mmwe nthu tjini?

³⁰Ha ndija nge kuboka, ini ndingongobolegwa itjetjo tjandinobokela?

³¹Ndizo kene unoja kene ung'wa, kene unothamani koga, thama kose kukudza Ndzimu.

³²Usigwadzisemoyo kene ali Njuta kene N'giriki kene gubungano le Ndzimu,

³³sekwa ndinogwisa kushathisa bathu bose mu tjimwe ne tjimwe tjandinothama, ndisingazwishakigwe mbuzilo koga ndikudza bose kuti ndizo batjidziwe.