Read Kalanga 1 Bakorinta 12 Bible Online

1 Bakorinta 12 - Kalanga bible

1 Bakorinta 12

¹Ngwenu ngekwe zwipo zwe tjimeya, zwikamu, anditoshaka kuti musizibe nge kwazo.

²Moziba kuti makati musathu mukaziba Ndzimu makabe muwongiwa kakale mudzimidziwa kutobela midzimu isingalebeleke.

³Ndizo ndoti muzibe kuti akuna ungati elebeleka nge Meya ye Ndzimu kati, “Jesu ngaabe ne bhiso,” kakale akuna ungati, “Jesu ndi She,” asingalebesiwe nge Meya yakayengemala.

⁴Kuna zwipo zwakasiyana, koga Meya ili iyo zwayo.

⁵Kuna kushingila kwakasiyana, koga kushingigwa She iyezwe.

⁶Kuna mishingo yakasiyana, koga Ndzimu ndiwo zwawo unoizhisa mu mmwe ne mmwe.

⁷Mmwe ne mmwe unopiwa kuzwilakidza kwe Meya yakayengemala munli kubhatsha bose.

⁸Mmwe unopiwa matama e butjenjedu, mmwe kapiwa matama e luzibo ne Meya iyo zwayo.

⁹Mmwe unopiwa kugalamoyo nge Meya iyo zwayo, mmwe kapiwa nge Meya iyeyobo zwipo zwe kupodza,

¹⁰koga mmwe kapiwa kushinga masazibgwe, ngono mmwe kapiwa bulebesambeli, mmwe unopiwa kuthubukanya pakati kwe meya, mmwe kapiwa tjipo tje ndimi dzipoga, koga mmwe kapiwa simba le kutjenesa ndimi.

¹¹Kose ikoku kopiwa nge Meya iyo zwayo, iyo inokobela mmwe ne mmwe sekwa yada.

¹²Se mbili uli nng'ompela una ndungululo njinji, kakale ndungululo dzose dze mbili, nenguba dzili njinji, dzi mbili nng'ompela, kwakajalobo na Kirisiti.

¹³Ngobe takadubikiwa nge Meya ing'ompela tose mu mbili nng'ompela, Bajuta kene Bezwitjaba, kene balanda kene bathu bakasunuguka, kakale tose takang'wa Meya ing'ompela.

¹⁴Kwakajalo mbili auna ndungululo ing'ompela koga una ndungululo njinji.

¹⁵Ha gumbo lingati, “Ngobe ndisi luboko, andite ndili ndungululo ye mbili,” ikoku akungalithame likasibe ndungululo ye mbili.

¹⁶Ne zebe ha ingati, “Ngobe ndisi zhisho, andite ndili ndungululo ye mbili.” Ikoku akungaithame ikasibe ndungululo ye mbili.

¹⁷Ha mbili wose wabe uli zhisho, kuhwa kobe kuli ngayi? Ha mbili wose wabe uli zebe, kunuhwidza kobe kuli ngayi?

¹⁸Koga sekwa kuli iko, Ndzimu wakalongolosa ndungululo mu mbili, imwe ne imwe sekwa unoda.

¹⁹Ha kose kwabe kuli ndungululo ing'ompela, mbili unobe uli ngayi?

²⁰Sekwa kuli iko, kuna ndungululo njinji, koga mbili nng'ompela.

²¹Ndizo ngwenu zhisho alingati ku luboko, “Imi andina nshingo nawe,” Ne nsholo aungati ku makumbo, “Imi andina nshingo nawe.”

²²Koga na idzo ndungululo dze mbili dzinolingika dzisina nshingo nkulu atingatjile tisinadzo.

²³Ndungululo dze mibili yedu dzatinotola se dzi pasi ndidzo dzatinokudza kwazo ne ndungululo dze mbili dzisingadusigwe patjena dzobhakwa nge njele hwulu kupinda

²⁴ndungululo dzinodusigwa patjena. Koga ndiko Ndzimu sekwa akabumba mbili ngokudza ndungululo dzi pasi,

²⁵kuti ndizo kusibe ne kusahwanana mu mbili, koga kuti ndungululo dzitjengetane kwakafanana.

²⁶Ha ndungululo ing'ompela idziyila, dzose dzodziyila, koga ha ndungululo ing'ompela ikudziwa, dzose dzoshatha nayo.

²⁷Imwi mu mbili wa Kirisiti, ngono mmwe ne mmwe i ndungululo yawo.

²⁸Mu gubungano Ndzimu wakabiga ndungululo dzose nge kutobedzana, kutanga batumwa, gwe bubili balebesambeli, gwe butatu badiyi, betobegwa nge bashingi be masazibgwe, kutobela bapodzi, babhatshi, kukowoti bayendisi be mishingo, kudwapo kuti balebi be ndimi dzipoga.

²⁹Apa bose batumwa kene? Apa bose balebesambeli kene? Apa bose badiyi kene? Apa bose banoshinga masazibgwe kene?

³⁰Apa bose bana zwipo zwe kupodza kene? Apa bose banolebeleka nge ndimi dzipoga kene? Apa bose banotjenesa ndimi dzipoga kene?

³¹Koga imwi yemulani nge malebeswa zwipo zwipezhugwi. Ndowomulakidza zila inopinda dzimwe dzose.