Read Kalanga 1 Bakorinta 13 Bible Online

1 Bakorinta 13 - Kalanga bible

1 Bakorinta 13

¹Ha ndilebeleka nge ndimi dze bathu nenge dze batumwa be kudzimu, koga ndisina ludo, ndonga tshipi inolidziwa ilonga zhoba, kene tiloko inolobana.

²Ngono ha ndina simba le bulebesambeli ndihwisisa masazibgwe wose, ndina zibo yose, kakale ha ndina kugalamoyo kose kunomilidza matombo, koga ndisina ludo, ate ndili tjimwe.

³Ha ndikoba kose kwandinako nenguba ndingapa mbili wangu kuti upisiwe, koga ndisina ludo, anditobuyigwa nge tjimwe.

⁴Ludo guna moyonlefu, guna nzhazho, ludo aguna fupa kene kuzwikudza kene kuzwida,

⁵agutoshaya mazwibhato. Ludo agutozwishakila; agutogwadzisiwamoyo kene kuli kubhata mmwe nge moyo;

⁶agutoshathila mbipo, koga goshathila ndulamo.

⁷Ludo agutonyalamoyo mu zwithu zose, gogalamoyo zwithu zose, gogalabgwe zwithu zose, gosimisila mu zwithu zose.

⁸Ludo agutopela, ha kuli kusumikila kowopinda ne ndimi dzowoma, ha guli luzibo gowopinda.

⁹Nge kuti zibo yedu ne kusumikila dama le Ndzimu azwizopelela,

¹⁰koga panowozha tjakapelela, tjisakapelela tjowopinda.

¹¹Pandakabe nditji mwana, ndakabe ndilebeleka se mwana, ndialakana se mwana ndishingisa mikumbulo ye bumwana; ndakati ndabe nlume athubukana ne zwithu zwe bumwana.

¹²Nge kuti ngwenu tobona mu iponi kusingaboneseseke, koga ipapo towobe takalingisana nge mesho. Ngwenu ndoziba ntome koga, koga ipapo ndowobe ndihwisisa nge buzhalo sekwa ndakahwisisiwa.

¹³Ndizo ngwenu zwithu zwitatu ezwi: kugalamoyo ne kugalabgwe ne ludo azwitoyenda kumwe, koga tjikulu muna izwezwi ludo.