Read Kalanga 1 Bakorinta 14 Bible Online

1 Bakorinta 14 - Kalanga bible

1 Bakorinta 14

¹Thamani kuti ludo gube mazwimisilo enyu, muyemule nge malebeswa kube ne zwipo zwe tjimeya, kwazo kwazo tjipo tje kusumikila dama nge bulebesambeli!

²Ngobe iye unolebeleka nge lulimi gupoga aatolebeleka ne bathu, koga unolebeleka ne Ndzimu, ngobe akuna unonhwisisa. Unoleba masazibgwe e malebeswa nge simba le Meya.

³Koga iye unosumikila dama le bulebesambeli unolebeleka ne bathu kubasimisa ne kubakulumbidza ne kubanyaladza.

⁴Iye unolebeleka ne lulimi gupoga unozwisimisa, koga iye unosumikila dama le bulebesambeli unobhatsha gubungano.

⁵Ndoshaka kuti mose mulebeleke nge ndimi dzipoga; koga tjikulu dzene mungabe ne tjipo tje kusumikila dama le bulebesambeli. Iye unosumikila dama le bulebesambeli nkulu pana unolebeleka nge ndimi dzipoga, kuzhe kwe kungabe kuna mmwe unotjenesa, kuti gubungano libhatshike.

⁶Ndizo wali, zwikamu, ha ndizha kumuli ndilebeleka nge ndimi dzipoga, apa ndingamubuzila tjimwe kuzhe kwe ndingamuzhisila zumbunulo imwe kene zibo kene dama le bulebesambeli kene tjidiyo?

⁷Ne zwilidzo zwisingatjile, zwinonga nyele kene dende, ha zwithama nlidzo usingahwisisike, nthu ungaziba tjini kuti kolidziwani?

⁸Ne lunyanga ha gusingathame nlidzo unohwisisika ndiani ungazwilulwamisila ngwa kene?

⁹Ndizo kwakajalobo nge kwenyu, ha imwi nge ndimi dzipoga muleba ndebo isingahwisisike, mmwe nthu ungaziba tjini tjinolebgwa? Ngobe molebelekela mu phepo koga.

¹⁰Kuna ndimi dzili njinji dzakasiyana mu shango, ngono akuna gumwe gwadzo gusina tjagunodwa.

¹¹Koga andisingazibe tjeneso ye lulimi, ndowobe ntaya ku nlebeleki ne nlebeleki kabe ntaya kundili.

¹²Se imwi makazwimisila kube ne zwipo zwinopiwa nge Meya, makafanila kuti mugwise kuzwishingisa kwazo kubaka gubungano.

¹³Ndizo iye unolebeleka nge ndimi dzipoga ngaatembezelele simba le kutjenesa tjaanoleba.

¹⁴Ngobe ha nditembezela nge ndimi dzipoga, meya yangu inotembezela, koga nkumbulo wangu auna tjinoubuyila.

¹⁵Ndingashingani ngono? Ndowotembezela nge Meya yangu atembezela nenge nkumbulo wangubo, ndowomba nge meya amba nenge nkumbulo.

¹⁶Ha ukudza Ndzimu mu meya iyo, nthu upakati kwa ibabo basingahwisise ungati “Ngakujalo” tjini mu kuboka kuko ngono asingazibe tjaunoleba?

¹⁷Ungabe uboka Ndzimu nge buzhalo, koga mmwe nthu aatobhatshika.

¹⁸Ndobokela Ndzimu kuti ndolebeleka nge ndimi kumupinda mose.

¹⁹Koga mu gubungano bukulu ndingaleba matama mashanu anohwika kudiya bamwe pana kuti ndilebe matama ali zwiwulu zwili gumi mu lulimi gupoga.

²⁰Zwikamu, letjani kukumbula se bana; ibeni ngawana mu bubi, koga mu kukumbula ibeni bahwola.

²¹Kwakakwagwa mu nlayo kuyi, “Nge bathu be ndimi dzipoga nenge milomo ye bataya ndowolebeleka ne bathu ibaba ngono na ipapo abatowondihwilila,” kojalo She.

²²Ndizo wali ndimi dzipoga tjilakidzo kuna basingagalemoyo kusi kuna banogalamoyo, koga bulebesambeli tjilakidzo kuna banogalamoyo kusi basingagalemoyo.

²³Ndizo ha gubungano lose lakakubungana, ngono mmwe ne mmwe elebeleka nge ndimi dzipoga, kube kuti bamwe basingahwisise kene basingagalemoyo bebe bengina, apa abangati mopenga kene?

²⁴Koga bose ha besumikila dama le bulebesambeli, ngono usingagalemoyo kene nthu koga ebe engina, ungatjemegwa nge dama le Ndzimu linodwa mu gubungano lose kuti ntjinyi ngono mahwi wose aanohwa anowonsumikilisa,

²⁵ngono zwakasumbikala zwe moyo uwe zowodusigwa patjena. Ndizo unowowila pasi kanamata Ndzimu, kaleba eti, “Ndzimu upakati kwenyu dumbu.”

²⁶Towotini ngono zwikamu? Ha mukubungana kunamata Ndzimu, mmwe ana lumbo kumba, mmwe ana tjidiyo kudiya, mmwe ana tjaazumbunuligwa nge Ndzimu kutjileba, mmwe ana tjaangaleba nge ndimi dzipoga, mmwe etjenesa tjalebgwa. Izwezwi zose ngazwithamwe kusimisa gubungano.

²⁷Ha bamwe belebeleka nge ndimi dzipoga, ngababe babili koga kene batatu, ngono basipinde ipapo. Balebeleke ngotobedzana; ngono mmwe upoga ngaatjenese tjinolebgwa.

²⁸Koga ha kusina ungatjenesa, mmwe ne mmwe wabo ngaanyalale mu gubungano, ngono azwilebese iye koga, kakale alebese ne Ndzimu.

²⁹Balebesambeli babili kene batatu ngabalebeleke, ngono bamwe ngababone bashakisise ngekwe mahwi alebgwa.

³⁰Koga ha Ndzimu ungazumbunulila tjimwe mmwe ugele pasi, ihwouje unolebeleka ngaanyalale.

³¹Ngobe imwi mose mungasumikila dama le bulebesambeli, nng'ompela ne nng'ompela, kuti mmwe ne mmwe azwidiye, kakale mukulumbidzike.

³²Meya ye balebesambeli inolaugwa ne balebesambeli,

³³ngobe Ndzimu ate uli Ndzimu we phiphiti, koga ngewe mbakiso. Oku ndiko sekwa kunoshingikala mu makubungano e bayengemali,

³⁴bakadzi bakafanila nyalala mu makubungano. Ngobe abatodumigwa kulebeleka, koga ngabasitungamile mu zwithu zose, se kunoleba nlayo.

³⁵Ha beshaka kubhuzwa ngekwe tjimwe, ngababhuzwe balume babo kanyi. Ngobe kobhatisa shoni kuti nkadzi alebeleke mu gubungano.

³⁶Ini! Dama le Ndzimu lakatangisa ndimwi kene? Kene ndimwi moga balakaswika ku bali?

³⁷Ha mmwe ekumbula kuti nlebesambeli, kene ana tjipo tje tjimeya, wakafanilo amutjila kuti tjandinomukwalila i ndayo ya She.

³⁸Koga ha eshayila hanya ikoku na iye unowoshayigwa hanya.

³⁹Ndizo wali, zwikamu zwangu, muzwimisile kusumikila dama le bulebesambeli koga musidzibise bathu kulebeleka nge ndimi dzipoga.

⁴⁰Koga tjimwe ne tjimwe tjakafanilo thamiwa zubuyanana nge ndongoloso.