Read Kalanga 1 Bakorinta 16 Bible Online

1 Bakorinta 16 - Kalanga bible

1 Bakorinta 16

¹Ngwenu ngekwe zwipo zwinopiwa bayengemali: Thamanibo sekwa ndakadwa makubungano aku Galatiya.

²Zhuba le kutanga mu tshipi imwe ne imwe, mmwe ne mmwe wenyu abigile tjimwe ntome atjibiganye, sekwa angabe awana, kuti kusibe ne kukubunganya ha ndazha.

³Ngono ndowotindizha, ndowotuma ibabo bamunowobe mashalula, bana lukwalo kuyisa tjipo tjenyu ku Jerusalema.

⁴Ha kwakafanila kuti ndingayendabo, banowoyenda nami.

⁵Ndowomukumba ndisinodwa ku Makedoniya, ngobe ndakazwimisila kunopinda nako,

⁶pamwe ndowogala namwi lubaka gushomanana, pamwe apitsha nsi wose we mbaba, kuti mundibhatshe kudwilidza gwendo gwangu, kumwe ne kumwe kwandinoyenda.

⁷Anditoshaka kumubona sangwenu ndipinda koga; ndogalabgwe kupitsha tjibaka namwi, ha She eduma.

⁸ Koga ndowobe mu Efeso kuswikila Pentekosite,

⁹ngobe nkoba wakaashama wandizhukila kuti ndishinge, koga banonyanyayidzana nami banjinji.

¹⁰Ha Timoti ezha, mun'amutjile, ngobe unoshinga nshingo wa She sekwa ndinoshinga.

¹¹Ndizo kushete unon'lingila pasi. Mumbhatshe adwilidze gwendo gugwe nge kunyalala, kuti abuye kundili; ngobe takanlingilila ne zwikamu.

¹²Ngekwe ikamu tjedu Apolosi, ndakankulumbidza kwazo kumukumba ne zwimwe zwikamu, koga kwakabe kusi kuda kukwe[3] koga unowozha ha kutubuka.

¹³Tjenjelani, mume makasima mu kugalamoyo kwenyu, ibeni nge tjilopa, simani.

¹⁴Mubone kuti tjimwe ne tjimwe tjamunothama motjithama nge ludo.

¹⁵Moziba kuti Sitifani ne nsha uwe ndibo bashanduki be Bakirisiti be kutanga mu Akaiya, kakale bakazwipa kushingila bayengemali. Ndomukulumbidza imwi zwikamu,

¹⁶kuti muzwiyise pasi kuna banonga ibaba ne ku mmwe ne mmwe unobhatabo nshingo kakale kashinga.

¹⁷Ndakashatha kuti Sitifani, na Fotunato, na Akaiko bazha ngeno; kubepo kwabo kumilile imwi ne musipo pano,

¹⁸ngono bashathisa meya yangu ne yenyu. Bathu bakajali koda kuti bazibgwe.

¹⁹Makubungano amu Ezhiya anomudumilisa. Akhwila na Purisila ne gubungano linoshanganila mu nzi wabo banomudumilisa kwazo muna She.

²⁰Zwikamu zose ngeno zomudumilisa. Dumilisanani ngobutjilana kwakayengemala.

²¹Imi Paulo ndokwala nge gwangu luboko ndimudumilisa.

²²Ha mmwe asingade She, ngaabe ne bhiso! “Maranata” She wedu izha!

²³Ngoni dza She Jesu ngadzibe namwi.

²⁴Ludo gwangu gube namwi mose muna Kirisiti Jesu. Ngakujalo.