Read Kalanga 1 Bakorinta 2 Bible Online

1 Bakorinta 2 - Kalanga bible

1 Bakorinta 2

¹Pandakazha kumuli zwikamu, andizozha ndisumikila masazibgwe[1] e Ndzimu ndishingisa matama makulu kulu kene butjenjedu,

²ngobe andizoda kuziba tjimwe pakati kwenyu kuzhe kwa Jesu Kirisiti, iye wakabambugwa.

³Ndakabe ndi namwi ndisakasima kakale ndina kutja nditetema,

⁴ne ndebeleko yangu ne kudiya kwangu azwizobe zwili nge matama e butjenjedu anolobegwa phande koga zwakabe zwilakidza simba le Meya yakayengemala,

⁵kuti ndizo kugalamoyo kwenyu kusigale mu butjenjedu gwe bathu koga kugale mu simba le Ndzimu.

⁶Koga kuna ibabo bakakula tjimeya toleba butjenjedu nenguba gusi butjenjedu gwe bathu bangwenu kene gwe babusi bangwenu ibabo be masimba anopela.

⁷Koga toleba butjenjedu gwe Ndzimu gwe masazibgwe gwakasumbikala, igo Ndzimu gwawakashaka kuti tikudziwe ndigo shango isathu ikathamwa.

⁸Akuna mmwe we babusi bangwenu wakahwisisa ikoku, ngobe abakabe behwisisa banobe basakabulaya She we gudzo.

⁹Koga, se kwakakwagwa kuyi, “Tjisakatongo bongwa, kene tjikahwika nge zebe, tjisakatongoti mmwe katjikumbula, nditjo Ndzimu tjawakalulwamisila ibabo banouda.”

¹⁰Ndzimu wakatilakidza zwithu izwezwi nge Meya yawo. Ngobe Meya inoshakisisa tjimwe ne tjimwe, nenge zwithu zwimukatikati zwe Ndzimu.

¹¹Apa ndiani unoziba tjimu moyo we nthu kuzhe kwe meya ye nthu, iyo imukati kukwe kene? Ndizo akuna unohwisisa zwithu zwimukatikati kwe Ndzimu kuzhe kwe Meya ye Ndzimu.

¹²Ngwenu atizoamutjila meya ye shango, koga takaamutjila meya inodwa ku Ndzimu kuti ndizo tizibisise zwipo zwatinopiwa nge Ndzimu.

¹³Ndizo atitolebeleka nge matama atakadiyiwa nge butjenjedu gwe nthu, koga nge matama atakadiyiwa nge Meya, titjenesa malebeswa e Meya ye Ndzimu kuna ibabo bana Meya ye Ndzimu.

¹⁴Nthu tjinyama aatoamutjila zwipo zwe Meya ye Ndzimu, ngobe bulengwe kunli, kakale aatozwihwisisa, ngobe zwakafanila lingisisiwa zwikazibgwa nge bhatsho ye Meya.

¹⁵Nthu tjimeya unotubula kulingisisa kaziba zwithu zose, koga iye aana unotubula kunlingisisa kanziba,

¹⁶ngobe kwakakwagwa kuyi, “Ndiani unoziba nkumbulo wa She kwaangadzina kadiya She?” Koga iswi, tina nkumbulo wa Kirisiti.