Read Kalanga 1 Bakorinta 3 Bible Online

1 Bakorinta 3 - Kalanga bible

1 Bakorinta 3

¹Koga imi zwikamu, ndakabe ndisingake alebeleka namwi se ndinolebeleka ne bathu tjimeya, koga ndabe ndingalebeleka namwi se bathu tjinyama kene se bana muna Kirisiti.

²Ndakamupa nkaka, kusi zojiwa zwakabhata, ngobe zwakabe zwisathu zwikamulizana, ngono nangwenu azwithu zwikamulizana,

³ngobe mu bathu tjinyama. Ngoti se kutjina ndandala ne zhoba pakati kwenyu, apa ate muli bathu tjinyama kakale muzwibhata se bathu koga kene?

⁴Ha mmwe eti, “Imi ndiwa Paulo,” ngono mmwe eti, “Imi ndiwa Apolosi” ate muli bathu koga kene?

⁵Apa Apolosi ini? Na Paulo ini? Balanda koga bamakagalamoyo ndibo. Sekwabakapiwa nshingo ndi She.

⁶Imi ndakadzwala, ngono Apolosi wakadilidzila, koga Ndzimu ndiwo wakakudza.

⁷Ndizo unodzwala ne unodilidzila ate bali tjimwe, koga Ndzimu iwo unokudza ndiwo tjimwe.

⁸Iye unodzwala ne unodilidzila bakalizana, ngono mmwe ne mmwe wabo unowopiwa mbhayilo kuyendidzana ne nshingo waakashinga.

⁹Ngobe iswi toshinga tose tishingila Ndzimu, ngono imwi mu nnda we Ndzimu. Kakale mu mbako ye Ndzimu.

¹⁰Kuyendidzana nge ngoni dzandakapiwa nge Ndzimu, ndakateya ng'umba se nyambi ye mbaki, ngono mmwe upoga unobaka pezhugwi kwe thiwa iyeyi. Mmwe ne mmwe nthu ngaabe ne njele kuti unobaka tjini pezhugwi kwayo.

¹¹Ngobe akuna ungateya thiwa imwe kuzhe kwe yakateyiwa kale, iyo ili Jesu Kirisiti.

¹²Ha bamwe be baka mu thiwa iyeyi nge golide bamwe nge siliva bamwe nge mabgwe e themba ipezhugwi, bamwe nge mapango bamwe nge bushwa bamwe nge mashanga,

¹³nshingo we nthu mmwe ne mmwe unowoboneka, ngobe zhuba la Kirisiti lowolakidza, ngobe inowolikiwa nge moto, ngono unowolakidza kuti mmwe ne mmwe nthu wakashinga nshingo wakatini.

¹⁴Ha tjakabakwa tjingakona moto, mbaki mmwe ne mmwe unowowana mbhayilo.

¹⁵Ha nshingo we mmwe ungatshwa, unowolashikigwa ngono iye nge kukwe unowotjidziwa, koga ebhugwa mu moto.

¹⁶Apa amutoziba kuti imwi mu ng'umba ye Ndzimu nenge kuti Meya ye Ndzimu inogala mu muli kene?

¹⁷Iye unokolomola ng'umba ye Ndzimu, Ndzimu unowonkolomola, ngobe ng'umba ye Ndzimu yakayengemala, ngono imwi nge kwenyu mu ng'umba iyeyo.

¹⁸Kusibe ne unozwitjengedza. Ha mmwe wenyu ekumbula kuti wakatjenjela mu mazhuba ano, ngaabe tjilengwe, kuti ndizo abe ntjenjedu.

¹⁹Ngobe butjenjedu gwe shango ino bulengwe mu mesho e Ndzimu, nge kuti kwakakwagwa kuyi, “Ndzimu unobhatshila batjenjedu mu butjakwani gwabo.”

²⁰Kakale kukayi, “She banoziba kuti mikumbulo ye batjenjedu madatha.”

²¹Ndizo ngakusibe ne unozwiloba ifuba nge mmwe nthu, ngobe zwithu zose nge zwenyu,

²²Paulo, kene Apolosi kene Pita kene shango, kene butjilo kene lufu, kene misi ino kene misi inozha, kose ikoku nge kwenyu,

²³ngono imwi mu bathu Bakirisiti, ngono Kirisiti nge we Ndzimu.