Read Kalanga 1 Bakorinta 4 Bible Online

1 Bakorinta 4 - Kalanga bible

1 Bakorinta 4

¹Ndizo bathu bakafanila kutitola tili balanda ba Kirisiti kakale tili batjengeti be masazibgwe e Ndzimu.

²Tjikulu hwuti batjengeti koshakika kuti bagalikebgwe.

³Kundili tjithu tjitukununu kwazo kusumikilisiwa ndimwi kene mu mabazhe e bathu. Naiko anditozwisumikilisa.

⁴Nenguba ndisingazwibone nlandu, akutodwa kuti andina nlandu. Imi ndosumikilisiwa ndi She.

⁵Ndizo musisumikilise tjibaka tjisathu tjikaswika, She basathu bakazha, ndibo banowodusila mu tjedza zwakasumbikala mu zhalima bakadusila patjena mazwimisilo e moyo. Ipapo mmwe ne mmwe unowoamutjila ku Ndzimu kukudziwa kwakanlizana.

⁶Ndaleba zwithu izwezwi zose ndizwilingisanya nami na Apolosi kubhatsha imwi zwikamu kuti muzwidiye ndiswi sahwoku “Mushinge tjakakwagwa koga,” kuti kushete mmwe wenyu unozwikudza ema nge mmwe nthu koga elingila mmwe pasi.

⁷Ndiyani unobona tjakathubukana mu muli kene? Ini tjamunatjo tjamusakapiwa? Ha makatjipiwa mungazwikudza tjini, se munonga musakatjipiwa?

⁸Makaguta kale! Makafuma kale! Mabe bomambo kale kuzhe kwe bhatsho yedu. Ndoyemula seni kuti dzene mabe bomambo dumbu kuti ndizo naswi tibe bomambo namwi!

⁹Imi ndobona kuli kuti Ndzimu wakapa iswi batumwa mamo apasi pasi se balume basumikilisigwa kubulawa mu mesho e mmwe ne mmwe, ngobe tolingiligwa nge shango yose, nge batumwa be kudzimu ne bathu.

¹⁰Iswi ti zwilengwe ngekwa Kirisiti, koga imwi makatjenjela muna Kirisiti! Iswi atizosima koga imwi makasima! Imwi molumbidziwa koga iswi tolengudziwa.

¹¹Kuswikila tjibaka tina zhala ne nyota, takaambala makandana, tolobgwa ne mizi atina,

¹²kakale toshinga tishinga nge maboko edu. Ha tigongobogwa tokombolela, ha tidziyidziwa todzikitadza,

¹³ha titjinyiwa mazina togwisa kugadzana. Tofanana ne malala e shango ino, tishambgwa mu zwithu zose!

¹⁴Anditomukwalila ikoku kumubhatisa shoni koga kumutjemela se bana bangu banodika.

¹⁵Nenguba muna babhabhi banjinji muna Kirisiti, amuna botate banjinji, ngobe ndakabe tate benyu muna Kirisiti Jesu nge kumuzhisila ndebo mbuya.

¹⁶Ndomukulumbidza, ibeni bayedzi bangu.

¹⁷Ngekwa ikoku ndakatuma Timoti kumuli, mwanangu unodika kakale unogalikabgwe muna She, kuti amukumbuludze zila dzangu muna Kirisiti nenge sekwa ndinodiya pamwe ne pamwe mu gubungano limwe ne limwe.

¹⁸Bamwe benyu banozwikudza bekumbula kuti anditowomukumba.

¹⁹Koga ndowozha kumuli tjinyolotjo ha She beda, ngono ipapo anditowobe ndizhila kuwohwa ndebeleko dze bathu ibabo banozwikudza koga ndowobe ndizhila kuwobona simba labo.

²⁰Ngobe bushe gwe Ndzimu ate matama koga, gumu simba.

²¹Apa moyemulani? Apa ndizhe kumuli ne shamu, kene ne ludo gwe moyo nnyolo kene?