Read Kalanga 1 Bakorinta 5 Bible Online

1 Bakorinta 5 - Kalanga bible

1 Bakorinta 5

¹Tjoselele kolebgwa kuti kuna kuwalilana thobo pakati kwenyu kusingawang'we nemu bathu basinganamate Ndzimu dumbu, ngoti nlume unowalilana thobo ne nkadzi wa tate babe.

²Ngono mozwikudza seni! Apa amuzofanila lila kene? Iye wakathama sa ikoko ngaadusiwe mu muli.

³Ngono nenguba ndisipo pamuli ndi namwi mu meya, ndizo ndasumikilisa kale se ndiyapo nge zina la She Jesu ngekwe nlume wakathama tjithu tjakajalo. Ha makakubungana meya yangu i pakati kwenyu nge simba la She Jesu,

⁵mupe iwoyo nlume Satani kuti mbili uwe ukolomogwe koga meya iye itjidziwe mu zhuba la She Jesu.

⁶Kuzwikudza kwenyu akuzolulwama. Apa amutoziba kuti, “Mbidzo tukununu inobidza bgwisa gose gwavangwa kene?”

⁷Dusani mbidzo ya ntolo, ndizo mube bgwisa butshwa, se muli igo bgwisa gusina mbidzo. Ngobe Kirisiti, i pkhwizana yedu ye Nzano we Kupinda pezhugwi, wakathamiwa tjibhayilo.

⁸Ndizo ngatitini tilondolodza Nzano we Kupinda pezhugwi, kusibe ne mbidzo ya ntolo, mbidzo ye mbengano ne bubi, koga kube ne tjiwunga tjisina mbidzo, tjiwunga tje bubuya ne malebeswa.

⁹Ndakamukwalila mu lukwalo gwangu nditi musishingidzane ne nthu unowalilana thobo kusakalingisana.

¹⁰Ndakabe ndisingadwe nthu unowalilana kusakalingisana we shango ino, ndisingadwe iyawo magovu ne batoleli kene banothigamila midzimu, ngobe oko kungadwa kuti mufuluke mu shango ino.

¹¹Koga ndakamukwalila kuti musizwizwadzanye ne ikamu tjina nlandu we kuwalilana kusi iko, kene bugovu, kene unothigamila midzimu kene etjinya bamwe mazina kene ali tjilaladzi kene ntoleli, musitongo kuma kuja ne nthu wakajalo.

¹²Apa nshingo wangu kene, kusumikilisa bakuzhe? Ate ibo bamukati kwe gubungano bamakafanila sumikilisa kene?

¹³Ndzimu unosumikilisa bakuzhe. Hwalo dze Ndzimu dzoti “Tatani nthu mbi pakati kwenyu.”