Read Kalanga 1 Bakorinta 6 Bible Online

1 Bakorinta 6 - Kalanga bible

1 Bakorinta 6

¹Ha mmwe wenyu ana ndebo ne mmwe, apa ungayiisa mbeli kwe basingazibe Ndzimu mu bumo gwe kuti ayiise mbeli kwe bayengemali kene?

²Apa amutoziba kuti bayengemali banowosumikilisa shango kene? Ngono ha shango yosumikiliswa ndimwi apa amuzolizana kusumikilisa mu zwithu zwitukununu kene?

³Apa amutoziba kuti towosumikilisa batumwa be kudzimu kene? Ndizo totubula kusumikilisa zwithu zwe butjilo guno.

⁴Ndizo ha muna ndebo dzakajalo, ini mudzibiga mbeli kwe bathu basingatolegwe pezhugwi nge gubungano?

⁵Ndoleba ikoku kumubhatisa shoni. Apa kungabe kusina pakati kwenyu nthu wakatjenjela kubakisanya zwikamu?

⁶Koga ikamu tjoyisa tjimwe ikamu ku nlayo, ngono ikoku kushingikala mbeli kwe bathu basina kugalamoyo.

⁷Kube ne ndebo pakati kwenyu dzinoyenda ku nlayo kolakidza kuti makakong'wa. Apa akutoyita kuti udzikitadzile kukombeledzwa nlandu usiuwo kene? Apa akutoyita kuti utolegwe kene?

⁸Koga imwi nge kwenyu mokombeledza mukatolela naizo zwikamu dumbu.

⁹Apa amutoziba kuti bathu basakalulwama habatongina mu bushe gwe Ndzimu kene? Musitjengedzeke, banowalilana kuzhe kwe ndobolo kene banothigamila midzimu kene phombgwe kene nlume unowalilana ne mmwe nlume kene nkadzi unowalilana ne mmwe nkadzi

¹⁰kene mbava kene magovu kene zwilaladzi kene, banotjinya bamwe mazina kene banotjebela, akuna wabo unowongina mu bushe gwe Ndzimu.

¹¹Bamwe benyu bakatongobe bakajalo. Koga makangudziwa, makayengemadziwa, makashayisiwa nlandu mu zina la She Jesu Kirisiti nemu Meya ye Ndzimu.

¹²“Zwithu zose zodumiligwa mundili,” koga ate zwithu zose zwinobhatsha, “Zwithu zose zodumiligwa mundili,” koga anditowoduma kuti kube ne tjinowondithama nlanda watjo.

¹³“Zojiwa zwakathamigwa ntumbu ne ntumbu wakathamigwa zojiwa.” Koga Ndzimu unowozwilobesa zose. Mbili auzothamigwa bupombgwe koga wakathamigwa She, na She bakathamigwa mbili.

¹⁴Ndzimu wakamusa She mu lufu, ngono naswibo unowotimusa mu lufu nge simba lawo.

¹⁵Apa amutoziba kuti mibili yenyu i ndungululo dza Kirisiti kene? Apa ndingatola ndungululo dza Kirisiti ndikadzithama ndungululo dze fukula kene? Ndodwa!

¹⁶Apa amutoziba kene kuti iye unozwibhatshanya ne fukula unobe mbili nng'ompela nayo? Ngobe kwakakwagwa kuyi, “Babili banowobe mbili nng'ompela.”

¹⁷Koga iye wabhatana na She unobe meya ing'ompela nabo.

¹⁸Thubukanani ne bupombgwe. Jinyo limwe ne limwe nthu laanothama li kuzhe kwe mbili uwe koga phombgwe inotjinyila mbili wayo.

¹⁹Apa amutoziba kuti mibili yenyu bugalo gwe Meya yakayengemala, imumuli yamakapiwa nge Ndzimu kene? Mibili iyeyo ate yenyu.

²⁰Makatengwa nge themba. Ndizo shingisani mibili yenyu nge zila inoshathisa Ndzimu.