Read Kalanga 1 Bakorinta 7 Bible Online

1 Bakorinta 7 - Kalanga bible

1 Bakorinta 7

¹Ngwenu, ndoleba ngekwe zwithu zwamakakwala nge kwazo. Kwakalulwama kuti nlume asitongowalilana thobo ne nkadzi.

²Koga ngobe bupombgwe gowonga bathu banjinji, nlume mmwe ne mmwe ngaabe ne nkadzi uwe ne nkadzi mmwe ne mmwe abe ne nlume uwe.

³Nlume ngaape nkadzi uwe fanilo dzidze dze ndobolo ne nkadzi ngaape nlume uwe fanilo dzidze dze ndobolo.

⁴Nkadzi aatolaula mbili uwe, koga unolaugwa nge nlume, ne nlume aatolaula mbili uwe koga unolaugwa nge nkadzi.

⁵Musinyimane kuwalilana kuzhe kwe madumana kwe tjibaka tjifutshwanana kuti muzwipe mu kutembezela, koga kudwapo shanganani kakale kuti ndizo Satani asimuwonge nge kong'wa kuzwidziba.

⁶Ndomubudza ikoku nge ndetjedzelo koga kusi ndayo.

⁷Ndoyemula kuti dzene bathu bose babe benga imi, koga mmwe ne mmwe una tjipo tjitje tjinodwa ku Ndzimu, mmwe una etji mmwe una etjije.

⁸Kuna ibabo basakalobola ne basakalobogwa ne tjilikadzi ndikati kwakanaka kuti bagale boga sami.

⁹Koga ha bekong'wa kuzwibhata ngabalobole, ngobe koyita kulobola pa kupisika nge njemulo.

¹⁰Kuna bakalobola, ndopa ndayo, kusi imi koga kuli She kuti nkadzi ngaasithubukane ne nlume uwe,

¹¹koga ha ethubukana ne nlume, ngaagale asakalobogwa kene abgwililane ne nlume uwe, nlume na iyebo asilambe nkadzi uwe.

¹²Ku bamwe bose, imi kusi She, ati, ha ikamu tjina nkadzi usi n'galimoyo ngono iwoyu nkadzi eduma kugala naye, ngaasinlambe.

¹³Ha nkadzi ana nlume usi n'galimoyo koga eduma kugala naye ngaasinlambe.

¹⁴Ngobe nlume usingagalemoyo unoyengemadziwa nge nkadzi uwe, usingagalemoyo unoamutjigwa nge Ndzimu nge zila ye nlume uwe unogalamoyo. Kuzhe kwa ikoku bana benyu banobe bakatemapala, koga sekwa kuli iko bakayengemala.

¹⁵Koga ha nkwinya usingagalemoyo eyemula kuti kuthubukaniwe ngakube sa ikoko. Pakajalo n'galimoyo we tjilume kene we tjikadzi wakasununguka. Ndzimu wakamudana kutjilila mu kunyalala.

¹⁶Nkadzi, unoziba tjini? Pamwe ungatjidza nlume uwo. Iwe nlume unoziba tjini? Pamwe ungatjidza nkadzi uwo.

¹⁷Tjing'ompela hwuti mmwe ne mmwe atjile butjilo gwaakapiwa ndi She, igo gwaakadang'wa kutjilila muguli nge Ndzimu. Oyu nlayo wandinobigila makubungano wose.

¹⁸Apa kuna wakabe akathumbigwa kale mu lubaka gwaakadang'wa? Ngaasiduse tjwayo dze kuthumbigwa kukwe. Apa kuna wakabe asakathumbigwa mu tjibaka tjaakadang'wa kene? Ngaasishake kuti athumbigwe.

¹⁹Kuthumbigwa akutodwa tjimwe ne kusathumbigwa akutodwa tjimwe. Tjinodwa tjimwe ulondolodza milayo ye Ndzimu.

²⁰Mmwe ne mmwe ngaagale mu tjimo tjaakadang'wa ali mutjili nge Ndzimu.

²¹Apa wakabe uli nlanda pawakadang'wa kene? Kusikudziyidze ikoku. Koga ha uwana tjibaka tje kusununguka, sununguka!

²²Ngobe nthu wakadang'wa ndi She ali mu bulanda watjibe nthu wa She wakasununguka. Kakale na iye wakadang'wa ali mu sununguko watjibe nlanda wa Kirisiti.

²³Makatengwa nge themba, ndizo musibe balanda be bathu.

²⁴Ndizo zwikamu, tjimo kene tjili tjipi nthu tjaakadang'wa ali mutjili, ngaabe mutjili ne Ndzimu.

²⁵Ngwenu ngekwe basakalobogwa nenge basakalobola, imi andina nlayo unodwa kuna She, koga ndopa nkumbulo wangu se nthu unogalikabgwe kuli nge ngoni dza She.

²⁶Ndobona kuti ngekwe dziyidzika kwe misi ino, koyita, kuti nlume agale sekwa ali iko.

²⁷Ha wakalobola, usigwise kulamba nkadzi. Ha usakalobola, usishake ndobolo.

²⁸Koga ha ulobola autotjinya, ne mwanadi ha elobogwa aatotjinya. Koga ibabo banolobola, bana mang'oni mu butjilo igogu, ngono ndoyemula kumubakilila muna ikoku.

²⁹Ndodwa kuti zwikamu, tjibaka tjakabigwa tjatjibe tjifutshwanana. Kudwa nasi kuyenda mbeli, ibabo bana bakadzi ngabatjile se basinabo,

³⁰ne bamu tjililo se basimu tjililo ne bakashatha se bakashoba ne banotenga ngabange basina thundu,

³¹ne banoshingidzana ne shango ngabatjile se basingashingidzane nayo; ngobe shango iyeyi sekwa ili iko ngwenu ino pinda.

³²Ndoshaka kuti musidziyidzike. Nlume usakalobola unolongamoyo mu nshingo wa She, ngobe eshaka kushathisa She.

³³Koga nlume wakalobola unolongamoyo muna zwe shango, ngobe eshaka kushathisa nkadzi uwe,

³⁴ne mikumbulo iye mibili. Nkadzi kene mwanadi usakalobogwa unolongamoyo mu mishingo ya She ne kuti ungayengemala mu mbili ne mu meya tjini, koga nkadzi wakalobogwa unolongamoyo muna zwe shango kuti ungashathisa nlume uwe tjini.

³⁵Ndoleba ikoku kubhatsha imwi, ndisingamudzibise, koga ndoshaka kuti mutjile nge zila yakalulwama muzwipe kwakapelela kuna She musina mimoyo mibili.

³⁶Ha mmwe ekumbula kuti aatozwibhata ku mwanadi waakabigilidza, ebona kuti unokong'wa kuzwidziba, kobe kwatjifanila kuti anlobole, ndizo ngaanlobole sekwa anoyemula, ate tjibi.

³⁷Koga iye wakapedza tjose mu moyo uwe, asina tjinommanikanya koga elaula njemulo dzidze, ngono akazwimisila ikoku mu moyo uwe kugala akambiganyidza, unothama zubuyanana.

³⁸Ndizo iye unolobola mwanadi iwoyu unothama zubuyanana, koga iye usingalobole unopinda unolobola.

³⁹Nkadzi wakasungwa nge tjidumano tjaakathama tje ndobolo butjilo gwe nlume uwe gose. Ha nlume efa, nkadzi watjisunuguka kulobogwa nge waanoyemula kulobogwa ndiye, koga wakafanila kube ali Nkirisiti.

⁴⁰Ngono ungashatha kugala sekwa ali iko kupinda akalobogwa. Imi ndiko sekwa ndinobona, ngono ndoduma kuti ndina Meya ye Ndzimu.