Read Kalanga 1 Bakorinta 8 Bible Online

1 Bakorinta 8 - Kalanga bible

1 Bakorinta 8

¹Ngwenu, ngekwe zojiwa zwakapiwa midzimu toziba kuti, “Tose tina zibo.” Zibo inoshiyisa nthu, koga ludo gosimisa nthu.

²Iye unokumbula kuti unoziba tjimwe, aathukaziba sekwa akafanila atjizibe.

³Koga ha nthu eda Ndzimu unozibgwa nge Ndzimu.

⁴Ndizo, ngekwe kuja zojiwa zwakapiwa midzimu, toziba kuti midzimu ate ili tjimwe tjinotjila nge kuti akuna Ndzimu kuzhe kwe nng'ompela.

⁵Nenguba kungabe kuna banodang'wa “midzimu,” kudzimu kene mu shango, dumbu nenguba ili yapo “midzimu” na “boshe” banjinji,

⁶ku tili kuna Ndzimu nng'ompela, ibo Tate, zwithu zose zodwa ku bali kakale totjila nge kwabo, kakale kuna She nng'ompela iye Jesu Kirisiti. Zwithu zose zwiyapo ndiye, naswibo tiyapo ndiye.

⁷Koga ate mmwe ne mmwe unoziba ikoku. Bamwe bathu nge kuwolobela midzimu koti ha beja zojiwa zwakajali banokumbula nge kwazo se zwakapiwa midzimu, ngono se hana dzabo dzisakasima dzotemapala.

⁸Zojiwa azwingatisedzedze ku Ndzimu. Ate tili babi kupindisa atisingaje kakale atitoyita atija.

⁹Koga yelani njele kuti kusununguka kwenyu kusibe tjikuthi kuna basakasima.

¹⁰Ha mmwe una hana isakasima ekubona iwe una zibo iyeyi uja mu ng'umba ye midzimu, apa angakulumbidzike kuja zwakapiwa midzimu kene?

¹¹Ndizo nge zibo iyo, ikamu itjetji tjisakasima, Kirisiti tjaakafila, tjalobesiwa.

¹²Ha utjinyila zwikamu zwizo ukubadza hana dzabo dzisakasima, unotjinyila Kirisiti.

¹³Ndizo ha zojiwa zwithama kuti ikamu tjangu tjiwe, anditjowoja nyama, ngobe ndingadwa ndithama kuti ikamu tjangu tjiwe.