Read Kalanga 2 Bakorinta 10 Bible Online

2 Bakorinta 10 - Kalanga bible

2 Bakorinta 10

¹Imi Paulo, nge kwangu ndomukumbila nge kuzwiyisa pasi nenge buthu gwa Kirisiti, imi ndinoyi ndigwala ha ndakalingisana namwi, koga ndakasimamoyo ha ndili kule namwi.

²Ndomukumbila kuti musithame kuti ndisisime moyo sekwa ndakazwimisila nge buzhalo, kuna ibabo banotialakanila kuti tozwibhata nge mazwiibhato e shango.

³Nenguba tigala mu shango atitogwa ngwa ye shango,

⁴ngobe zwibhayano zwatinogwa ndizo ate zwibhayano zwe shango, koga zwina simba lakayengemala kulobesa matizhilo akasima.

⁵Tokolomola kukakabadzana kose, ne kuzwikudza kumwe ne kumwe kunodzinganyidza zibo ye Ndzimu, tikasunga nkumbulo mmwe ne mmwe kuti uhwe Kirisiti.

⁶Ngono towobe takazwilulwamisila kuloba shamu kusahwa kumwe ne kumwe, ha kuhwa kwenyu kwapelela.

⁷Imwi lingani zwi mbeli kwe mesho enyu. Ha mmwe egalabgwe kuti nge wa Kirisiti, ngaazwikumbuludze kuti iswi ti Bakirisitibo.

⁸Nenguba ndizwikudza kupindisa ngekwe ndaulo yedu iyo She yabakatipa kumubaka koga kusi kumukolomola, anditowoibhatigwa nge shoni.

⁹Anditoshaka kuti kulingike ndinga ndinoshaka kumupalusamoyo nge hwalo dzangu.

¹⁰Bamwe banoti, “Hwalo dzidze dzolema, dzakasima, koga iye nge kukwe aali pano nlelu lelu, zwilebo zwizwe ate zwili tjimwe.”

¹¹Bathu bakajalo ngabazibe kuti tjatinoleba nge lukwalo tisipo, nditjo tjatinowothama ha tili yapo.

¹²Iswi atizozwilizanya kene kuli kuzwifananya na ibabo banozwikudza. Koga ha mmwe ezwifananya nge mmwe, ngono mmwe ezwiyelesedza ne mmwe pakati kwenyu, kodwa kuti abatohwisisa.

¹³Koga iswi atingazwikudze kupinda tjilizanyo, towoma mu tjilizanyo tjatakapiwa nge Ndzimu, kushinga namwi na iko kuli mukatibo.

¹⁴Takabe tisingapindilile mu tjilizanyo tjedu patakazha kumuli, ngobe ndiswi bekutanga kuzhisa ndebo mbuya ya Kirisiti kumuli.

¹⁵Atitozwikudza kwakapindilila nge mishingo ye bamwe bathu, i kuzhe kwe tjilizanyo tjedu, koga kugalabgwe kwedu hwuti se kugalamoyo kwenyu kukula, nshingo wedu pakati kwenyu unowokula kwazo.

¹⁶Kuti ndizo tisumikile ndebo mbuya mu shango dzimwe dzi mbeli kwe yenyu tisingazwikudze nge nshingo wakashingwa kale mu nnda we mmwe nthu.

¹⁷Koga “Iye unoshaka kuzwikudza ngaazwikudze nge tjakashingwa ndi She.”

¹⁸Ngobe nthu unozwikudza ate iye unoamutjigwa, koga nthu unokudziwa ndi She ndiye unoamutjigwa.