Read Kalanga 2 Bakorinta 11 Bible Online

2 Bakorinta 11 - Kalanga bible

2 Bakorinta 11

¹Ndoyemula kuti mube ne moyonlefu ne bulengwe gwangu. Ibeni ne moyonlefu nami!

²Ndohwa ndina kubinda mu muli kunodwa ku Ndzimu, ngobe ndakamubigilidza ndobolo kumuyisa kuna Kirisiti muli mwanadi mbuyanana una nlume nng'ompela, iye Kirisiti.

³Koga ndodziyidzika nge kuti se nyoka yakatjengela Efa nge kutjenjelela ntome kwayo, mikumbulo yenyu inowotjinyiwa, mube musiya kuzwipa kwe malebeswa kakale kwakatjena muna Kirisiti.

⁴Moamutjila nge kushatha mmwe ne mmwe unozha esumikila Jesu upoga muna watakasumikila, mukaamutjila meya ipoga muna yamakaamutjila kakale mukaamutjila ndebo mbuya ipoga muna yamakaamutjila mutili!

⁵Anditoduma kuti ndi ntukunu pa batumwa ibabo banoyi bakulukulu.

⁶Nenguba ndisi nyambi yelebeleka, koga ndina zibo. Ikoku takakutjenesa kumuli misi yose ne mu zwithu zose.

⁷Apa ndakathama jinyo nge kuzwiyisa pasi kuti imwi mukudziwe, nge kusumikila ndebo mbuya ye Ndzimu kumuli kuzhe kwe kushaka bhatsho imwe mu muli kene?

⁸Ndakakwibila makubungano mamwe ngoamutjila bhatsho muali kushingila imwi.

⁹Ngono pandakabe ndi namwi, koga ndisheta, andina wandakabe ntolo kunli, ngobe zwandakabe ndisheta zwakadusiwa nge zwikamu zwinodwa ku Makedoniya. Ndizo ndakaletja kumulemesela, kene anditowomulemesela.

¹⁰Se malebeswa a Kirisiti ali mundili, kuzwikudza kwangu ikoku akutowonyaladziwa mu mituthu ye Akaiya.

¹¹Apa ndoleba ikoku ngekutini? Ngekuti ndisingamude kene? Ndzimu unoziba kuti ndomuda!

¹²Tjandinoshinga ngwenu ndowodwilila nditjishinga, kuti ndishayise ibabo mazwikudzo ibaba banoshaka kuti batogwe se banolizana naswi muna tjabanozwikudza nditjo.

¹³Bathu bakajali batumwa be manyepkhwa, bashingi banotjebela, banozwithama batumwa ba Kirisiti.

¹⁴Ngono akutotjenamisa, ngobe na iye Satani unozwithama ntumwa we kudzimu we tjedza.

¹⁵Ndizo akutotjenamisa ha balanda babe na ibobo bezwithama balanda be ndulamo. Bhelelo labo lowofanana ne mishingo yabo.

¹⁶Ndobgwililula nditi ngakusibe ne unokumbula kuti ndi tjilengwe. Koga ha mungakumbula sa ikoko, mundiamutjile se tjilengwe, kuti ndizo namibo ndizwikudze kutukununu.

¹⁷Tjandinoleba anditotjileba nge simba la She, koga ndolebeleka se tjilengwe mu kuzwikudza kwakajali.

¹⁸Se banji bezwikudza ngekwe zwe shango namibo ndowozwikudza,

¹⁹ngobe mothamila zwilengwe moyonlefu na iko makashatha, imwi nge kwenyu makatjenjela.

²⁰Mobe ne moyonlefu ha nthu emuthama balanda, kene emutjebela kene emubhatilapo, kene emulingila pasi, kene emulonga shaula mate.

²¹Ndina shoni kuleba kuti iswi takakong'wa kuthama zwithu izwezo! Koga tjimwe ne tjimwe tjaanozwikudza nditjo, ndolebeleka se tjilengwe, namibo ndingazwikudza nditjo.

²²Kene Bahebheru? Namibo ndi iye. Kene Baiziraela? Namibo ndi iye. Kene be ludzi gwa Abhurahama? Namibo ndi igo.

²³Kene balanda Bakirisiti? Imi ndi nlanda unoyita pabali. Ndoleba se mpengo! Ndakashinga kwakasima kubapinda kwazo, ndakabe mu ng'umba ye busungwa kanjinji kubapinda, ndakalobgwa kanjinji abe pejo nge lufu kanjinji.

²⁴Ndakalobgwa kashanu nge Bajuta shamu dzili makumi manna anodusa ing'ompela.

²⁵Ndakalobgwa katatu nge zwikombo nge Baroma, akikithidziwa nge mabgwe. Katatu kose ikepe tjandakabe ndiyenda nditjo tjakanyumbgwila mu gungwa ha angama mu vula nge kuzwibhatilila mu zwipithu zwe ikepe busiku gose amuka ndishwa ndakajalo zhuba lose.

²⁶Ndakayenda njendo njinji, abe mu mbatsha dze njizi ne dze zwigebeng'a, abe mu mbatsha dze bakanyi kwangu ne be zwitjaba, abe mu mbatsha mu mizi mikulu, abe mu mbatsha mu tjilambanyika nenge mu gungwa, abe mu mbhatsha mu zwikamu zwe manyepkhwa.

²⁷Ndakashinga kunolema, apitsha masiku manjinji ndisingayizele, muzhala ne nyota, kanjinji ndisingaje, ndipota ndisina zwiambalo.

²⁸Ngono kuzhe kwe zwimwe zwithu, ndodziyidzika zhuba ne zhuba ndikumbula ngekwe makubungano wose.

²⁹Panobe mmwe asakasima, imi ndozwihwa ndisakasimabo, panobe mmwe awila mu jinyo imi ndozhala buyendasi.

³⁰Ha kuli kuti ndina kuzwikudza, ndowozwikudza ngekwe zwithu zwinolakidza kusasima kwangu.

³¹Ndzimu ibo Tate ba She Jesu, iwo unokudziwa kusingapele, unoziba kuti anditonyepa.

³²Pandakabe ndili mu Damasiko, nlauli wakabe ali pasi kwa Mambo Aretasi wakabiga balindi pa nkoba we nzi nkulu kundibhata.

³³Koga ndakadelusigwa kuzhe nge buli limu guma ndili mu itundu, abe ndileya mbatsha dze mazwimisilo awe.