Read Kalanga 2 Bakorinta 12 Bible Online

2 Bakorinta 12 - Kalanga bible

2 Bakorinta 12

¹Ndakafanila ndizwikudze, nenguba kusingabuzile tjimwe. Koga ngwenu ndowoleba ngekwe mbono nenge zumbunulo dza She.

²Ndoziba mmwe nlume muna Kirisiti iye wakati makole ali gumi lina manna (14) akapinda, kadzamuligwa kudzimu kwe butatu, kene kuti kwakashingikala kene yakabe ili mbono koga anditoziba, koziba Ndzimu.

³Ngono ndoziba kuti nlume iwoyu kene wakabe ali mu mbili kene kuzhe kwe mbili anditoziba, koziba Ndzimu,

⁴wakadzamuligwa ku Paradaisi[5] ngono kahwa zwithu zwisingalebgwe, zwithu zwisingadumigwe nthu kuti azwilebe.

⁵Ndowozwikudza ngekwa iwoyu nlume, koga nge kwangu anditowozwikudza, kuzhe kwe kuzwikudza ngekwe kusasima kwangu.

⁶Ha kuli kuti ndoshaka kuzwikudza, ndowobe ndisi tjilengwe, ngobe ndowobe ndileba malebeswa. Koga ndozwidziba mu kuzwikudza, kuti ndizo kusibe ne mmwe unondikumbulila kupinda tjaanobona mundili kene tjaanohwa tjidwa mundili.

⁷Ngono kundidziba kuti ndisizhale mazwikudzo ngekwe zumbunulo dzandakabona hwulu kupindisa, ndakalongwa mihwa mu nyama yangu, iye ntumwa wa Satani kundidziyidza kuti ndizo ndisizwikudze.

⁸Katatu kose ndakakumbila She ngekwa ikoku, kuti kubhude mundili,

⁹koga She wakati kundili, “Ngoni dzangu dzakakulizana, ngobe simba langu lozhadzisika mu kusasima kuko.” Ndowozwikudza kwazo ndakashatha mu kusasima kwangu, kuti simba la Kirisiti libe mundili.

¹⁰Ndizo ngekwa Kirisiti ndoamutjila nge kushatha kusasima ne masapa ne zogwadza ne kudziyidziwa ne dzimanikano, ngobe pandisakasima, ipapo ndakasima.

¹¹Ndakabe tjilengwe! Makandikombeledza kube itjo, kwakajalo ndabe ndakafanila kudziwa ndimwi. Ate ndili ntukunu pana ibabo batumwa banoyi bakulukulu, nenguba imi ndisi tjimwe.

¹²Zwilakidzo zwe ntumwa wa Jesu wakwako zwakashingwa pakati kwenyu nge moyonlefu, nge zwilakidzo ne matjenamiso ne mishingo mikulu.

¹³Makabhakhwa nge zila ipi inogwadza kupinda makubungano mamwe kene, kuzhe kwe kuti imi nge kwangu andizobe ntolo kumuli? Mundizwiibhatigwe nlandu iwoyu!

¹⁴Ndakazwilulwamisila kumukumba gwe butatu ngwenu. Koga anditowobe ntolo kumuli, ngobe anditoshaka tjimwe tjenyu, koga ndoshaka imwi. Ngobe bana ate ili ibo banobiganyidzila bazwadzi, koga bazwadzi ndibo banobiganyidzila bana babo.

¹⁵Ndowoshatha kwazo kushingisa tjandinatjo, azwipila na kose kwandili iko. Apa ha ndimuda kwazo imwi mowondida kutukununu kene?

¹⁶Ngatitini ndakabe ndisi ntolo kumuli. Koga mmwe unowoti ndakabe ndili tjakwani, ngono amuteya nge butjakwani.

¹⁷Apa ndakashaba ndimwi nge mmwe wa ibabo bandakatuma kumuli kene?

¹⁸Ndakakulumbidza Tito kuzha kumuli, ngono antuma ne tjimwe ikamu. Apa Tito wakashaba ndimwi kene? Apa atizozwibhata nge meya dzinofanana kene? Apa atizotola thambo dzinofanana kene?

¹⁹Apa mabe mualakana tjibaka tjose kuti takabe tizwivikilila mbeli kwenyu kene? Tabe tilebeleka muna Kirisiti mbeli kwe Ndzimu, ngono kose kuli kumubaka, badiwa bangu.

²⁰Ndotja kuti pamwe ndowozha ndiwana muli bapoga musi tjandinoyemula kuti mube itjo, namwi mukawana ndili upoga ndisi tjamunoyemula kuti ndibe ndili itjo. Ndotja kuti ndowowana kukakabadzana ne fupa ne bushongola ne kuzwikumbula ne kutjinyana mazina ne bung'wa, kuzwida ne kusayendidzana.

²¹Ndotja kuti pandinowozha kakale Ndzimu wangu unowondiyisa pasi mbeli kwenyu, ngono ndowozwiwana ndililila banjinji bakatjinya mu misi yakapinda koga bakasishandukile matjinyo abo e kuwalilana thobo kunobhatisa shoni ne kuwalilana thobo kusakalingisana ne njemulo dzisakanaka dzekuwalilana thobo.