Read Kalanga 2 Bakorinta 13 Bible Online

2 Bakorinta 13 - Kalanga bible

2 Bakorinta 13

¹Nge gwe butatu ndizha kumuli, “Ndebo imwe ne imwe yakafanila kusimisiwa nge butendeki gwe bathu babili kene batatu.”

²Ndakatjemela ibabo bakatjinya kutanga ne bamwe bose, ngono ndobatjemela ngwenu ndisipo, sekwa ndakathama ndilipo mu kukumba kwangu kwe bubili, nditi ha ndizha kakale anditowobaletja,

³se moshaka butendeki gwe kuti Kirisiti unolebeleka mundili. Ate ili kuti aazosima kushinga namwi, koga una masimba pakati kwenyu.

⁴Wakabambugwa mu kusasima, koga unotjila nge simba le Ndzimu. Ngobe atizosima munli, koga mu kushingidzana namwi, towotjila naye nge simba le Ndzimu.

⁵Muzwishakisise kubona kene makabhatilila mu kugalamoyo kwenyu. Muzwibhuzwisise. Apa amutoziba kuti Jesu Kirisiti umumuli kene? Kuzhe kwe musawana tjimwe mukuzwibhuzwisisa kwenyu!

⁶Ndogalabgwe kuti mowobona kuti iswi atizokong'wa.

⁷Koga totembezela Ndzimu kuti tshene musingasathama tjisakalulwama. Kusi kuti iswi tingabe takunda ndiko, koga kuti imwi muthama tjakalulwama nenguba tinganga takakong'wa.

⁸Ngobe atina simba lingakunda malebeswa, koga tina simba le kumilila malebeswa koga.

⁹Ngobe toshatha ha tisakasima imwi makasima. Tjatinotembezelela hwuti ndulamo yenyu ipaphidzike.

¹⁰Ndokwala ikoku ndisipo pamuli, kuti nditi ndiswika ndisibe nkukutu kumuli mu kushingisa simba landakapiwa ndi She kubumba ndilo kusi kukolomodza ndilo.

¹¹Zwikamu, ndopedza nditi, salani zubuyanana, lulwamisani matjilo enyu, teedzani kukumbila kwangu, hwililanani, galani nge kunyalala ngono Ndzimu we ludo ne kunyalala unowobe namwi.

¹²Dumilisanani nge kubutjilana kwakayengemala.

¹³Bayengemali bose banomudumilisa.

¹⁴Ngoni dza She Jesu Kirisiti ne ludo gwe Ndzimu ne kubhatana kwe Meya yakayengemala ngakube namwi mose.