Read Kalanga 2 Bakorinta 2 Bible Online

2 Bakorinta 2 - Kalanga bible

2 Bakorinta 2

¹Ndizo ndakapeleledza ndabona kuti ndisitjamukumbe kunowodwa kumuhwisa zogwadza kakale.

²Ngobe ha ndingamuhwisa zogwadza, ndiani ungandishathisa kene, kuzhe kwenyu imwi bandahwisa zogwadza?

³Ngono ndakakwala gumwe lukwalo sekwa ndakakwala ndisingashake, kuti ndisihwisiwe zogwadza ndi ibabo bakafanila kundishathisa, ngobe ndakabe ndina malebeswa nge kwenyu mose, kuti kushatha kwangu kowobe kushatha kwenyu mose.

⁴Ndakamukwalila ndili mukudziyidzika, ndihwa zogwadza mu moyo, nditebula mishodzi kusi kuti ndimuhwise zogwadza, koga ili kumuzibisa ngekwe ludo gwandinago mu muli.

⁵Ngono, ha mmwe akahwisa mmwe zogwadza, aazokuthama kundili, koga wakakuthamila imwi mose, kene bamwe benyu zwako. Ndoleba ikoku, ngobe anditoshaka kupaphidza.

⁶Shamu yaalobgwa nge bunji gwenyu yakanlizana.

⁷Ndizo ngwenu munzwiibhatigwe mun'nyaladze, kuti ndizo asikuligwe nge buyendasi gwakapindilila.

⁸Ndomukumbila kuti munlakidze kakale kuti mon'da.

⁹Ndakakwala lukwalo igoguje, ngobe ndakabe ndishaka kumulika ne kubona kene mondihwa mu tjimwe ne tjimwe.

¹⁰Ani naani wamunonzwiibhatigwa namibo ndonzwiibhatigwabo; ngobe tjandanzwiibhatigwa mutjili, akuli kuti kuna tjandakafanila kunzwiibhatigwa, ndatjizwinbhatigwa mbeli kwa Kirisiti nge kwenyu.

¹¹Kudzibila Satani kuti asitibhatilepo, ngobe ate kuli kuti atitoziba njalakang'wa dzidze.

¹²Ngwenu ndakati ndayenda ku Tiroasi kunosumikila ndebo mbuya ya Kirisiti, ndikawana She bandizhulila nkoba,

¹³koga nkumbulo wangu ukasigadzikane, ngobe andizowana ikamu tjangu Tito ikoko. Ndizo ndakabawoneka apindila ku Makedoniya.

¹⁴Koga ngakubokwe Ndzimu, iwo unotitungamila misi yose mu kukunda ndi Kirisiti. Ndzimu unoyendisa zibo ye nnuhwo unozipa ngekwa Kirisiti kumwe ne kumwe ndiswi.

¹⁵Ngobe ti nnuhwo unozipa wa Kirisiti unopiwa Ndzimu, muna ibabo banotjidziwa ne muna banoloba.

¹⁶Kuna unolobesiwa ti nnuhwo we lufu, kuna unotjidziwa ti nnuhwo we butjilo. Ndiani ngono wakalizanila nshingo wakajali?

¹⁷Iswi atitonga bunji gunoshaba nge dama le Ndzimu, koga ti bathu ba Kirisiti bakashanduka bana malebeswa, bakatumwa nge Ndzimu, tolebeleka mu mesho e Ndzimu muna Kirisiti.