Read Kalanga 2 Bakorinta 3 Bible Online

2 Bakorinta 3 - Kalanga bible

2 Bakorinta 3

¹Apa tatangisa kuzwikudza kakale kene? Kene tonga bamwe bathu banoshaka hwalo dzinomuzibisa kuti ndiswi boani, kene dzinodwa kumuli dzizibisa bamwe kuti ndiswi kene.

²Imwi nge kwenyu, mu lukwalo gwedu, gwakakwagwa mu mimoyo yedu, gunozibgwa ne gunobagwa ne mmwe ne mmwe.

³Molakidza kuti mu lukwalo gunodwa kuna Kirisiti guzha ndiswi, gusakakwagwa nge inki, koga gwakakwagwa nge Meya ye Ndzimu unotjila. Gusakakwagwa mu mabgwe, koga gwakakwagwa mu mimoyo ye bathu.

⁴Ikoku ishaladuko yatinayo ngekwa Kirisiti mu Ndzimu.

⁵Kusingadwe kuti takalizanila nge kwedu kwatingati tjimwe ne tjimwe tjodwa mutili, kulizanila kwedu kodwa ku Ndzimu,

⁶iwo wakatithama kulizanila kube bashingile be Tjidumano tjitshwa, tjisi tje nlayo wakakwagwa, koga tje Meya. Ngobe nlayo wakakwagwa unobulaya, koga Meya inopa butjilo.

⁷Ngwenu ha kushingila kunozhisa lufu kwakakwagwa mu mabgwe, kwakazha nge tjedza tjingapa, tjakayita Baiziraela kuti basilinge Mushe mu buso, nenguba kupenya ikoku kwakabe kopela,

⁸apa kushingila kwe Meya akungabe nge tjedza tjikulu kupinda kene?

⁹Ha kwakabe kuna tjedza mu kushingila kunolobesa, kushingila kwe ndulamo kwakafanila kupinde nge tjedza.

¹⁰Nge malebeswa ipapa tjakabe tjina tjedza atjitjina tjedza, ngwenu kwatjibe ne tjedza tjinotjikulila.

¹¹Ngobe ha ili kuti kunopinda kwakazha nge tjedza, kunogalila tjose kwakafanila kube nge tjedza tjikulu.

¹²Se tina kugalabgwe kwakajali, tina tjilopa.

¹³Atitonga Mushe, iye wakabe ekwididza buso gugwe nge jila kuti ba Iziraela basibone bhelelo le tjedza tjakabe tjipela.

¹⁴Koga mikumbulo yabo yakabe yakakukutala, ngobe na nasi ha bebala Tjidumano tjikulukugwi jila ilelije litjiyapo halizofukunugwa, ngobe lofukunugwa ndi Kirisiti koga.

¹⁵Ee, kuswikila nasi ha bebala nlayo jila lokwididza mikumbulo yabo,

¹⁶koga ha nthu eshandukila kuna She, jila ileli lofukunugwa.

¹⁷Ngwenu, She ndibo Meya, ngono pana Meya ya She, pana sununguko.

¹⁸Ngono iswi tose be njiso dzakafukunugwa tilakidza tjedza tja She, toshandugwa kunga iye ne tjedza tjinokula misi yose, ngobe ikoku kodwa muna She iye Meya.