Read Kalanga 2 Bakorinta 4 Bible Online

2 Bakorinta 4 - Kalanga bible

2 Bakorinta 4

¹Ndizo atitonyalamoyo, ngobe Ndzimu nge ngoni dzawo wakatipa kushingila ikoku.

²Takalambana ne zila dzakasumbikala dzinobhatisa shoni, atitoshinga nge bupitipiti, kene kuli kutjinya dama le Ndzimu, koga nge kuleba malebeswa a patjena kuzwilakidza kumwe ne kumwe kuti togalikabgwe mbeli kwe Ndzimu.

³Ha ndebo mbuya yatinosumikila yakasumbikala, yakasumbikalila ibabo banoloba koga.

⁴Nge kwabo ndzimu we shango ino, iye Satani wakapofupadza mikumbulo ye basingagalemoyo kuti basibone tjedza tje ndebo mbuya ye kupenya kwa Kirisiti, iye mbumbiko ye Ndzimu.

⁵Ngobe atitozwisumikila iswi, koga tosumikila Jesu Kirisiti ali She, koga iswi tili balanda benyu ngekwa Jesu.

⁶Ngobe Ndzimu ndiwo wakati, “Tjedza ngatjipenye kudwa mu zhalima” Ndiwozwawo wakathama kuti tjedza tjawo tjipenye mu mimoyo yedu kutipa zibo ye kupenya kwe Ndzimu mu buso gwa Kirisiti.

⁷Koga tina fumwa iyeyi mu majegwa, kulakidza kuti simba gulu lodwa ku Ndzimu, alitodwa ku tili.

⁸Iswi togwadzisiwa nge zila dzose, koga atitokundiwa, mimwe misi todudumwa, koga tikasinyalemoyo,

⁹Todziyidziwa, koga Ndzimu autotisiya, mimwe misi tolobgwa tikawila pasi koga tikasife.

¹⁰Misi yose takasenga lufu gwa Jesu mu mibili yedu, kuti ndizo butjilo gwa Jesu gubonekebo mu mibili yedu.

¹¹Ngobe atitjatjila, togala takalingisana ne lufu tibulayigwa Jesu, kuti ndizo butjilo gwa Jesu gubonekebo mu mibili yedu inobola.

¹²Ndizo wali lufu goshinga mutili, koga butjilo goshinga mu muli.

¹³Setina meya iyo zwayo ye kugalamoyo sa iye akakwala eti, “Ndakagalamoyo, ndizo alebeleka,” naswibo togalamoyo, ndizo tolebeleka,

¹⁴tiziba kuti iwo wakamusa She Jesu mu bafi unowotimusabo na Jesu kakale ukatizhisa namwi paulipo.

¹⁵Ikoku kose kobuzila imwi, kuti ndizo ngoni dze Ndzimu dzinodwilila dzitjidza bathu banjinji dzipaphidze mitembezelo ye kuboka ne kukudza Ndzimu.

¹⁶Ndizo atitonyalamoyo. Nenguba mbumbiko yedu ya kuzhe itjinyika, mbumbiko yedu ya mukati inobumbiwa butshwa zhuba limwe ne limwe.

¹⁷Ngobe kudziyila ikoku kwe tjibaka tjifutshwanana kotilulwamisila gudzo gulu lisingapele lisina tjalingafananidziwa natjo.

¹⁸Ngobe atitolinga zwinobong'wa, koga tolinga zwisingabong'we; ngobe zwinobong'wa zopinda, koga zwisingabong'we zogalila tjose.